អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
អគ្គលេខាធិការអង្គការសហប្រជាជាតិ (UN) លោក បាន គីមូន នឹងទៅទស្សនកិច្ចកូរ៉េខាងជើងនៅសប្ដាហ៍នេះ។ ដំណើរទស្សនកិច្ចនេះ ប្រហែលជារឿងដ៏កម្រមួយរបស់កូរ៉េខាងជើងក្នុងការបើកចំហការទូតរបស់ខ្លួន។ នេះបើយោងតាមការរាយការណ៏របស់ទីភ្នាក់ងារព័ត៌មានកូរ៉េខាងត្បូង Yonhap នៅថ្ងៃច័ន្ទនេះ ដោយដកស្រង់ប្រភពរបស់ UN។
លោក បាន គីមូន នឹងទស្សនកិច្ចទីក្រុងព្យុងយ៉ាងរដ្ឋធានីរបស់កូរ៉េខាងជើងនៅសប្ដាហ៍នេះ។ ទស្សនកិច្ចលើកដំបូងរបស់អគ្គលេខាធិការ UN ទៅកាន់រដ្ឋផ្តាច់ការនេះ ជារឿងថ្មីបំផុតក្នុងរយៈពេលជិត២០ឆ្នាំចុងក្រោយនេះ។ លោក បាន គីមូន នឹងក្លាយជាអគ្គលេខាធិការ UN ទី៣ ដែលធ្វើទស្សនកិច្ចនៅកូរ៉េខាងជើង បន្ទាប់ពីលោក Kurt Waldheim និង លោក Boutros Boutros-Ghali។
តាមពិតទៅ អគ្គលេខាធិការ UN ដែលជាជនជាតិកូរ៉េខាងត្បូងរូបនេះ មានគម្រោងទស្សនកិច្ចនៅកូរ៉េខាងជើងតាំងពីដើមឆ្នាំមកម្ល៉េះ ប៉ុន្តែត្រូវបានរដ្ឋាភិបាលក្រុងព្យុងយ៉ាងលុបចោលនៅនាទីចុងក្រោយដោយមិនបញ្ជាក់ពីមូលហេតុឡើយ។ ទីភ្នាក់ងារព័ត៌មាន Yonhap ដដែលបន្តថា ក្នុងដំណើរទស្សនកិច្ចលើកនេះ លោក បាន គីមូន នឹងជួបជាមួយមេដឹកនាំកំពូលកូរ៉េខាងជើង លោក គីម ជុងអ៊ុន ផងដែរ។ ទស្សនកិច្ចនេះដែរ នឹងក្លាយជាជំហានការទូតដ៏សំខាន់ដល់ដំណើរការដោះស្រាយបញ្ហាសន្តិសុខនៅឧបទ្វីបកូរ៉េ។
យ៉ាងណាក៏ដោយ គេមិនទាន់ច្បាស់ទេថា របាយការណ៏នៃទស្សនកិច្ចនេះពិតប្រាកដឬនោះទេ។ ក្រសួងការបរទេសកូរ៉េខាងត្បូងមិនទាន់អាចបញ្ជាក់ពីរឿងនេះទេ ឯការិយាល័យអ្នកនាំពាក្យរបស់ UN ក៏មិនបានធ្វើអត្ថាធិប្បាយច្រើនពីរឿងនេះដែរ។
គួរបញ្ជាក់ដែរថា រយៈពេលចុងក្រោយនេះ រដ្ឋាភិបាលក្រុងព្យុងយ៉ាងហាក់មានការបើកចំហរច្រើននិងភ្ជាប់ទំនាក់ទំនងជាមួយសហគមន៍អន្តរជាតិជាងមុខ។ ថ្មីៗនេះ ក្រុងព្យុងយ៉ាងធ្លាប់បើកឲ្យអ្នកសារព័ត៌មានបរទេសចូលទៅទឹកដីខ្លួន ហើយក៏បានអញ្ជើញមន្ត្រីផ្នែកសិទ្ធិមនុស្សរបស់អឺរ៉ុបមកកាន់ទីក្រុងព្យុងយ៉ាង តែក៏ត្រូវលើកពេលទៅវិញ។ បន្ទាប់មក ទីក្រុងព្យុងយ៉ាងក៏បានអញ្ជើញមន្ត្រីសិទ្ធិមនុស្សជាន់ខ្ពស់របស់ UN មកត្រួតពិនិត្យរបាយការណ៍ម្ដងទៀត ដោយកាលបរិច្ឆេទកំពុងតែពិភាក្សាគ្នានៅឡើយ៕
Tag:
បាន គីមូន
គីមជុងអ៊ុន
© រក្សាសិទ្ធិដោយ thmeythmey.com
«នាំអាត» និង«នាំអាទិ៍»មួយណាត្រឹមត្រូវ?
1 សប្តាហ៍
