ជាតិ
នយោបាយជាតិ
តំណាងរាស្រ្តគណបក្សសង្គ្រោះជាតិទាំងអស់ស្នើឲ្យលោក សម រង្ស៊ី ពន្យារពេលត្រឡប់មកកម្ពុជា
× មន្រ្តីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង បានបញ្ជាក់ថា ក្រុមតំណាងរាស្រ្តរបស់គណបក្សសង្គ្រោះជាតិដែលកំពុងមានវត្តមាននៅក្នុងប្រទេសកម្ពុជា និងសមាជិកព្រឹទ្ធសភាគណបក្សសម រង្ស៊ី បានប្រជុំគ្នាជាបន្ទាប់ចំពោះដំណើរមកកាន់កម្ពុជាវិញរបស់លោក សម រង្ស៊ី។ លោក អេង ឆៃអ៊ាង បានបញ្ជាក់ប្រាប់សារព័ត៌មានថ្មីនៅប៉ុន្មាននាទីមុននេះថា ក្រុមតំណាងរាស្រ្តគណបក្សសង្គ្រោះជាតិទាំងអស់បានសម្រេចរូមគ្នាស្នើឲ្យលោក សម រង្ស៊ី ពន្យារពេលត្រឡប់មកកម្ពុជាវិញពីរ ឬបីថ្ងៃទៀត ដើម្បីកុំឲ្យមានអំពើហិង្សាកើតឡើង។
លោកអេង ឆៃអ៊ាង បានបញ្ជាក់យ៉ាងនេះថា៖ « នៅមុននេះបន្តិចយើងបានផ្ញើអ៊ីមែលទៅលោកប្រធានហើយ ដើម្បីឲ្យគាត់ពន្យារពេល។ តែយើងមិនដឹងថា គាត់ទទួលបានឬនៅទេ។ យើងរង់ចាំចម្លើយពីគាត់។ ក្រុមតំណាងរាស្រ្តយើងធ្វើបែបនេះ ក្រោយសិក្សាលើព័ត៌មានមើលទៅថា អាចនឹងមានអំពើហិង្សាកើតឡើងទើបយើងសុំឲ្យពន្យារពេល ពីរឬបីថ្ងៃ ចាំត្រឡប់មក»។ លោក អេង ឆៃអ៊ាង បន្តយ៉ាងនេះថា៖« តែយើងគោរពលើការសម្រេចចិត្តរបស់គាត់ថា បើគាត់ត្រឡប់មកយប់នេះ យើងគោរពលើការសម្រេចចិត្តរបស់គាត់។ យើងរង់ចាំសារឆ្លើយតបរបស់លោកប្រធាន»។
ចំពោះអ្នកគាំទ្រលោក សម រង្ស៊ី ដែលទន្ទឹងរង់ចាំមើលដំណើរវិលត្រឡប់របស់លោក សម រង្ស៊ី នៅយប់នេះ លោក អ៊ាង ឆៃអ៊ាង លើកឡើងថា ពួកគេនឹងមិនអន់ចិត្ត ឬគិតថា លោក សម រង្ស៊ី កំសាកឡើយ។ « ខ្ញុំគិតថាពួកអ្នកគាំទ្រយើងយល់ពីបញ្ហានេះ។ តំណាងរាស្រ្តយើង ឬលោក សម រង្ស៊ី មិនខ្លាចទេ បើគ្រាប់តែចាប់គាត់នោះ យើងខ្លាចអំពើហិង្សាកើតឡើង» ។ នេះជាការអះអាងបន្ថែមរបស់មន្រ្តីខាងលើ៕ © រក្សាសិទ្ធិដោយ thmeythmey.com