អន្តរជាតិ
នយោបាយអន្តរជាតិ
តួកគីលុបចោលការដេញថ្លៃប្រព័ន្ធមីស៊ីលរបស់ចិនតម្លៃពាន់លានដុល្លារ
× តួកគីបានលុបចោលការដេញថ្លៃប្រព័ន្ធមីស៊ីលដែលមានតម្លៃរហូតដល់៣.៤ពាន់លានដុល្លារ របស់ក្រុមហ៊ុនចិន ពីព្រោះអាមេរិកនិងអឺរ៉ុបមានការព្រួយបារម្ភខ្លាំងលើបញ្ហានេះ។ នេះបើយោងតាមទីភ្នាក់ងារព័ត៌មានរ៉យទ័រ ដែលបានដកស្រង់សំដីរបស់មន្ត្រីការិយាល័យនាយករដ្ឋមន្ត្រីតួកគី ម្សិលមិញ។
រដ្ឋាភិបាលតួកគីបានសម្រេចចិត្តលុបចោលការដេញថ្លៃគម្រោងផ្គត់ផ្គង់ប្រព័ន្ធមីស៊ីលរយៈចម្ងាយឆ្ងាយដែលមានតម្លៃ៣.៤ពាន់លានដុល្លារបស់ក្រុមហ៊ុនចិន។ ការផ្ដល់សិទ្ធិទៅឲ្យចិនផ្គត់ផ្គង់លើប្រព័ន្ធការពារនេះ បានបង្កឲ្យមានការព្រួយបារម្ភជាខ្លាំងពីសំណាក់សមាជិកបក្សសម្ព័ន្ធណាតូមានអាមេរិកនិងអឺរ៉ុបដែលជាមិត្តជិតស្និទ្ធរបស់តួកគី។
កាលពីឆ្នាំ២០១៣ តួកគីដែលជាសមាជិកមួយរបស់ ណាតូ បានចរចាជាមួយក្រុមហ៊ុនចិន Precision Machinery Import and Export Corp ដោយអនុញ្ញាតឲ្យក្រុមហ៊ុននេះជាអ្នកទទួលបន្ទុកក្នុងការផ្គត់ផ្គង់ប្រព័ន្ធការពារអាកាសដល់ខ្លួន។ ភ្លាមៗលោកខាងលិចក៏បានបង្ហាញការព្រួយបារម្ភដោយលើកហេតុផលថា បច្ចេកវិទ្យារបស់ចិនអាចបង្កឲ្យមានបញ្ហាផ្នែកសន្តិសុខ។
បើតាមមន្ត្រីដដែល លោកនាយករដ្ឋមន្ត្រីតួកគី Davutoglu សម្រេចចិត្តលុបចោលគម្រោងនេះ ហើយលោកបានចុះហត្ថលេខាលើសេចក្ដីសម្រេចចិត្តនេះរួចហើយ។ មន្ត្រីរូបនោះបន្តថា តួកគីមានគម្រោងចាប់ផ្ដើមផលិតប្រព័ន្ធការពារមីស៊ីលនេះដោយខ្លួនឯង។
ចំពោះមូលហេតុនៃការលុបចោលនេះ មន្ត្រីការពារជាតិតួកគីបញ្ជាក់ថា អាចពាក់ព័ន្ធនឹង ការស្ទាក់ស្ទើររបស់ចិនក្នុងការផ្ទេរបច្ចេកវិទ្យាដែលអនុញ្ញតឲ្យតួកគីមានសមត្ថភាពក្នុងចាត់ចែងប្រព័ន្ធបាននិងអាចឈានដល់ការអភិវឌ្ឍប្រព័ន្ធនេះដោយខ្លួនឯងបាននាពេលអនាគត៕
© រក្សាសិទ្ធិដោយ thmeythmey.com