លីបង់ចាប់ខ្លួនមនុស្ស៩នាក់ពាក់ព័ន្ធនឹងការបំផ្ទុះគ្រាប់បែកសប្ដាហ៍មុន

អន្តរជាតិ

នយោបាយអន្តរជាតិ

លីបង់ចាប់ខ្លួនមនុស្ស៩នាក់ពាក់ព័ន្ធនឹងការបំផ្ទុះគ្រាប់បែកសប្ដាហ៍មុន

16, Nov 2015 , 5:14 pm

រូបភាព

ដោយ: តន ចាន់រិទ្ធារ៉ា

អាជ្ញាធរលីបង់បានចាប់ខ្លួនមនុស្ស៩នាក់ដែលបានជាប់ពាក់ព័ន្ធនឹងករណីបំផ្ទុះគ្រាប់បែកកាលពីសប្ដាហ៍មុនដែលសម្លាប់មនុស្សប្រហែល ៤៤នាក់នៅក្នុងទីក្រុងបៃរ៉ូត។ នេះបើយោងតាមមន្ត្រីជាន់ខ្ពស់លីបង់។ ជនទាំង៩នាក់នោះ មាន៧នាក់ជាជនជាតិស៊ីរីនិង២នាក់ទៀតជាជនជាតិលីបង់ផ្ទាល់។

រដ្ឋមន្ត្រីមហាផ្ទៃលីបង់លោក Nuhad Mashnuq បញ្ជាក់ថា កងកម្លាំងសន្តិសុខរបស់លីបង់បានចាប់ខ្លួនមនុស្សចំនួន៩នាក់ ដែលបានចូលរួមក្នុងការបំផ្ទុះគ្រាប់បែកចំនួនពីរគ្រាប់កាលពីសប្ដាហ៍មុន ដោយបានសម្លាប់មនុស្សយ៉ាងតិច៤៤នាក់និងរាប់សិបនាក់ផ្សេងទៀតរងរបួស។

ក្នុងសន្និសីទសារព័ត៌មានតាមរយៈទូរទស្សន៍កាលពីថ្ងៃអាទិត្យ លោក Mashnuq និយាយថា៖« មកទល់ពេលនេះ យើងបានចាប់ខ្លួនជនជាតិស៊ីរី៧នាក់និងជនលីបង់២នាក់។ ក្នុងចំណោមជនជាតិលីបង់ទាំងពីរ មានម្នាក់ជាអ្នកបំផ្ទុះគ្រាប់បែកនិងម្នាក់ទៀតជាអ្នករត់ពន្ធមនុស្សខុសច្បាប់ចូលមកពីប្រទេសស៊ីរីជិតខាង»។ លោកបន្តទៀតថា អ្នកនៅពីក្រោយការដាក់គ្រាប់បែកនិងបណ្ដាញរបស់គេ ត្រូវបានចាប់ខ្លួនក្នុងរយៈពេល៤៨ម៉ោងក្រោយការផ្ទុះ។

តាមរយៈសន្និសីទសារព័ត៌មានដដែលលោក Mashnuq បន្ថែមទៀតថា ជនជាតិស៊ីរីទាំង៧នាក់ខ្លះត្រូវបានចាប់ខ្លួនក្នុងជំរំជនភៀសខ្លួនប៉ាលេស្ទីន Burj al-Barajneh និងខ្លះទៀតនៅឯទីតាំងមួយកន្លែងក្នុងសង្កាត់ Ashrafieh ដែលទីតាំងនោះត្រូវបានប្រើសម្រាប់រៀបចំគ្រាប់បែក។ លើសពីនេះទៅទៀត លោកក៏បានបញ្ចេញគម្រោងការរបស់ពួកគេផងដែរ។ បើតាមគម្រោង ក្រុមភេរវករចំនួន៥នាក់ ប៉ងទៅបំផ្ទុះគ្រាប់បែកក្នុងមន្ទីរពេទ្យមួយកន្លែង តែដោយសារមានការយាមកាមតឹងរឹង ក៏ប្ដូរទៅកាន់តំបន់មានមនុស្សទីប្រជុំជនវិញ។

គួរបញ្ជាក់ដែរថា កាលពីសប្ដាហ៍មុន មនុស្សយ៉ាងតិច៤៤នាក់ បានស្លាប់ និងប្រហែល២៤០នាក់ផ្សេងទៀតបានរងរបួសក្នុងហេតុការណ៍ផ្ទុះគ្រាប់បែកចំនួនពីរគ្រាប់ក្នុងសង្កាត់ Burj al-Barajneh របស់ទីក្រុងបៃរ៉ូតប្រទេសលីបង់។គ្រាប់បែកបានផ្ទុះនៅលើផ្លូវមួយដែលសម្បូរដោយអ្នកលក់ដូរជាច្រើន៕