អន្តរជាតិ
មេដឹកនាំអាស៊ានរួមគ្នាបង្កើត «សហគមន៍សេដ្ឋកិច្ចអាស៊ាន» ជាផ្លូវការហើយ
×
នៅថ្ងៃអាទិត្យនេះមេដឹកនាំអាស៊ានទាំង ១០ បានចុះហត្ថលេខាលើសេចក្តីថ្លែងការណ៍កូឡាឡាំពួ ដើម្បីប្រកាសជាផ្លូវការពីការបង្កើតសហគមន៍សេដ្ឋកិច្ចអាស៊ាន ដោយមានការចូលរួមពីបណ្តាមេដឹកនាំប្រទេសជាដៃគូសន្ទនាផង។ សហគមន៍សេដ្ឋកិច្ចអាស៊ាននេះជាសរសរស្តម្ភមួយក្នុងចំណោមសរសរស្តម្ភទាំងបី ហើយប្រទេសសមាជិកចំណាយពេល៨ឆ្នាំសម្រាប់បង្កើតសហគមន៍មួយនេះ។
នៅថ្ងៃនេះបណ្តាប្រមុខរដ្ឋប្រមុខរដ្ឋាភិបាលអាស៊ានទាំង១០ បានប្រមូលផ្តុំគ្នាចុះហត្ថលេខានិងប្រកាសជាផ្លូវការពីការបង្កើតសហគមន៍សេដ្ឋកិច្ចអាស៊ាន Asean Economic Community (AEC) ដែលនឹងផ្តើមឡើងចាប់ពីឆ្នាំដើមឆ្នាំ ២០១៦នេះតទៅ។ ការចុះហត្ថលេខានេះមានការចូលរួមពីបណ្តាមេដឹកនាំប្រទេសនានាជាដៃគូសន្ទនារបស់អាស៊ានផងដែរ ហើយការចុះហត្ថលេខានេះជាព្រឹត្តិការណ៍ប្រវត្តិសាស្ត្រសម្រាប់ប្រជាជាតិអាស៊ានទាំងមូល។
ចាប់ពីថ្ងៃទី ០១ ខែមករាខាងមុខនេះ រដ្ឋសមាជិកទាំង១០របស់អាស៊ាន នឹងក្លាយជាសហគមន៍សេដ្ឋកិច្ចដែលមានប្រជាជនសរុប ៦៣០លាននាក់ មានទីផ្សារតែមួយ ពឹងផ្អែកលើការផលិត មានលំហរចេញចូលទំនិញនិង លំហូរកម្លាំងពលកម្មជាដើម។ បើយោងតាមការជជែកពិភាក្សាកន្លងមកមុខជំនាញចំនួន ៨ រួមទាំងវេជ្ជបណ្ឌិត គិលានុបដ្ឋាក និងគណនេយ្យករអាចធ្វើការងារនៅរាល់បណ្តាប្រទេសទាំង១០ជាសមាជិក គេសង្កេតឃើញថា ការលេចឡើងនៃសហគមន៍សេដ្ឋកិច្ចអាស៊ាននេះជាសញ្ញាវិជ្ជមាននិងជំរុញដល់ការឈានទៅរៀបចំសមាហរណកម្មក្នុងតំបន់ឲ្យកាន់តែស៊ីជម្រៅនៅពេលខាងមុខផង។ ហើយប្រជាជនក្នុងប្រទេសអាស៊ានហាក់កំពុងត្រៀមខ្លួនស្វាគមន៍សហគមន៍សេដ្ឋកិច្ចនេះដែរ។
ដោយសារ សហគមន៍សេដ្ឋកិច្ចអាស៊ាន នឹងមានច្បាប់ទម្លាប់តែមួយពាក់ព័ន្ធការធ្វើជំនួញ ហើយអាស៊ានជាប្លុកសេដ្ឋកិច្ចដែលមានកម្លាំងពលកម្មលំដាប់លេខបីលើពិភពលោកនោះ វានឹងអាចទាញយកការវិនិយោគបរទេសកាន់តែច្រើន។ ហើយគេរំពឹងថាកំណើនវិនយោគទុនបរទេសនោះនឹងជួយឲ្យមានកំនើនសេដ្ឋកិច្ចចន្លោះពី ៥ទៅ ៦ភាគរយរាល់ឆ្នាំផង។
យ៉ាងណាក៏ដោយចុះ អ្នកជំនាញបានវាយតម្លៃថាប្រទេសសមាជិកមួយចំនួននឹងប្រឈមមុខជាមួយបញ្ហាច្រើនក្នុងដំណើរសមាហរណកម្មនេះដោយសារភាពខុសគ្នានៃកំណើនសេដ្ឋកិច្ច និងអភិវឌ្ឍន៍របស់សមាជិកនីមួយ ។ ហើយម្យ៉ាង ការយល់ដឹងពីសហគមន៍សេដ្ឋកិច្ចអាស៊ាន ផលចំណេញ និងបញ្ហាប្រឈមក្នុងចំណោមអ្នកជំនួញ ឬប្រជាជនក្នុងប្រទេសសមាជិកអាស៊ានមានកម្រិតទាបនៅឡើយ។
បើយោងតាមរបាយការណ៍ស្ទង់មតិរបស់ម៉ាឡេស៊ី សហគ្រាសធុនតូចនិងមធ្យម រួមជាមួយស្ថាប័នឯកជនផ្សេងទៀតហាក់បីដូចជាមិនបានដឹងទាល់តែសោះថាតើសហគមន៍សេដ្ឋកិច្ចនេះជាអ្វី និងការបង្កើតសហគមន៍នេះផ្តល់ប្រយោជន៍អ្វីខ្លះដល់ពួកគេ។ ក្នុងចំណោម សហគ្រាសជាង១០០០ សហគ្រាសច្រើនជាងពាក់កណ្តាលមិនបានដឹងសោះថាអ្វីទៅជាសហគមន៍អាស៊ាននេះ។
ប៉ុន្តែ វាគ្រាន់តែជាការចាប់ផ្តើមប៉ុណ្ណោះ ដូច្នេះសមាជិកអាស៊ាននីមួយៗចាំបាច់ត្រូវចាប់ដៃគ្នា ដោយជិះលើទូកតែមួយ ប្រឹងប្រែងធ្វើយ៉ាងណាធ្វើឲ្យសមាហរណកម្មតំបន់កាន់តែស៊ីជម្រៅ និង ជំរុញការកាត់បន្ថយគម្លៀតនៃចំណូល និងការអភិវឌ្ឍន៍រវាងសមាជិកចាស់និងសមាជិកថ្មី។ ហើយម្យ៉ាងសហគមន៍មួយនេះមិនអាចទៅមុខរួចទេ បើគេមិនផ្តល់តម្លៃលើការរក្សាសន្តិសុខ សន្តិភាព និងស្ថិរភាពក្នុងតំបន់ នៅពេលគេដើរលើផ្លូវរួមគ្នា៕
© រក្សាសិទ្ធិដោយ thmeythmey.com