អន្តរជាតិ
ហូឡង់នឹងបង្កើតឧទ្យានរំឭកដល់ជនរងគ្រោះក្នុងគ្រោះថ្នាក់ធ្លាក់យន្តហោះMH17
× ហូឡង់នឹងបង្កើតសួនឧទ្យានមួយនៅក្បែរព្រលានយន្តហោះអាំស្ទែរដាំសម្រាប់ជាការរំឭកដល់ជនរងគ្រោះក្នុងហេតុការណ៏ធ្លាក់យន្តហោះរបស់ក្រុមហ៊ុនហោះហើរម៉ាលេស៊ីអ៊ែរឡាញជើង MH17 កាលពីខែកក្កដា ឆ្នាំ២០១៤។ នេះបើយោងតាមការរាយការណ៏របស់សារព័ត៌មានរបស់ហូឡង់។
មូលនិធិ MH17 ដែលបានបង្កើតក្រោយការធ្លាក់យន្តហោះ MH17 បានឲ្យដឹងថា សួនឧទ្យានមួយនឹងត្រូវលេចជារូចរាង ហើយដើមឈើ២៩៨ដើមនឹងត្រូវដាំនៅទីនោះ ដែលដើមឈើនីមួយៗគឺតំណាងឲ្យជនរងគ្រោះម្នាក់ៗក្នុងហេតុការណ៏ធ្លាក់យន្តហោះនោះ។
មូលនិធិដដែលបន្តថា ក្រុមគ្រួសារនៃជនរងគ្រោះបានសម្រេចចិត្តជ្រើសរើសឧទ្យាន Vijhuizen ជាទីតាំងដាំដើមឈើទាំង២៩៨ដើម។
ម្យ៉ាងទៀត បើយោងតាមមូលនិធិMH17 ដំបូងមានគម្រោងចំនួនបីសម្រាប់ជាការរំឭកដល់ជនរងគ្រោះដែលបាត់បង់ជីវិតក្នុងការធ្លាក់យន្តហោះនៅភាគខាងកើតអ៊ុយក្រែន ដែលភាគច្រើនជាជនជាតិហូឡង់។ ក្រោយមក គម្រោងសួនឧទ្យានក៏ត្រូវបានជ្រើសរើស ពីព្រោះវាមានទីតាំងនៅក្បែរព្រលានយន្តហោះដែលជាកន្លែងចាកចេញចុងក្រោយរបស់យន្តហោះ។
ទាក់ទិននឹងមូលហេតុនៃការធ្លាក់នេះ ក្រុមអ្នកស៊ើបអង្កេតដែលដឹកនាំហូឡង់បានបញ្ជាក់ថា យន្តហោះដឹកអ្នកដំណើរជើងនេះត្រូវបានបាញ់ទម្លាក់ដោយមីស៊ីលផលិតដោយរុស្សីប្រភេទ BUK ដែលបានបាញ់ចេញពីតំបន់ពួកឧទ្ទាមនៅភាគខាងកើតអ៊ុយក្រែន។ អ្នកដំណើរទាំងអស់បានស្លាប់ នៅពេលដែលយន្តហោះនៅលើមេឃក្នុងដំណើរពីអាំស្ទែដាំទៅកាន់កូឡាឡាំពួរ។
ជាមួយគ្នានេះដែរ ក្រោយជំនួបជាមួយនាយករដ្ឋមន្ត្រីហូឡង់ ប្រធានាធិបតីអ៊ុយក្រែនលោកPetro Poroshenko ដែលកំពុងតែទស្សនកិច្ចនៅហូឡង់ បានអរគុណដល់ចំពោះការស៊ើបអង្កេតនេះ និងបាននិយាយថា យើងសង្ឃឹមថា ភស្តុតាងនឹងពីអ្នកនៅពីក្រោយរឿងនេះ។ ឯលោកនាយករដ្ឋមន្ត្រី Mark Rutte ក៏បានប្រកាសដែរថា យើងធ្វើការទាំងយប់ទាំងថ្ងៃដើម្បីស្វែងរកឃាតករ។
© រក្សាសិទ្ធិដោយ thmeythmey.com