ជាតិ
CNRPទិញដីបានតម្លៃជាង១០ម៉ឺន ដើម្បីបង្កើតទូរទស្សន៍ព្រះអាទិត្យ
× គណបក្សសង្គ្រោះជាតិ បានទិញដីតម្លៃជាង ១០ម៉ឺន ៧ពាន់ដុល្លារជាផ្លូវការហើយ ដើម្បីបង្កើតស្ថានីយទូរទស្សន៍ព្រះអាទិត្យ។ ទីតាំងសម្រាប់ការបង្កើតស្ថានីយទូរទស្សន៍នេះ ស្ថិតក្នុងក្រុងតាខ្មៅ ខេត្តកណ្តាល។
គណបក្សសង្គ្រោះជាតិ កំពុងតែរង់ចាំបណ្ណផ្ទេរកម្មសិទ្ធចេញពីក្រសួងដែនដី មកឲ្យគណបក្សប៉ុណ្ណោះ។នេះជាការបញ្ជាក់របស់លោក យឹម សុវណ្ណ មុននឹងបន្ថែមថា ក្រោយពីបានបណ្ណផ្ទេរកម្មសិទ្ធិរួច គណបក្សលោកនឹងបន្តស្នើសុំហ្វ្រេកង់ពីក្រសួងព័ត៌មាន ដើម្បីលើកដំឡើងអង់តែនតែម្តង។
តែយ៉ាងណាក៏ដោយ លោក យឹម សុវណ្ណ មិនទាន់អាចប្រាប់ពីទីតាំងដីពិតប្រាកដ ដែលត្រូវរៀបចំស្ថានីយទូរទស្សន៍នោះបាននៅឡើយទេ ដោយលោកគ្រាន់តែបញ្ជាក់ថា «បើសិនជាអាជ្ញាធរចេញបណ្ណផ្ទេរកម្មសិទ្ធិ ហើយគណបក្សស្នើសុំហ្វ្រេកង់ពីក្រសួងព័ត៌មានបានរួចរាល់ហើយនោះ ទូរទស្សន៍ព្រះអាទិត្យរបស់គណបក្សសង្គ្រោះជាតិ នឹងលេចចេញជារូបរាងហើយនៅឆ្នាំ២០១៦ ខាងមុខ»។
ថ្លែងប្រាប់សារព័ត៌មានថ្មីៗ អ្នកនាំពាក្យរូបនេះ បញ្ជាក់ដូច្នេះថា៖«បញ្ហាធំបំផុតនៅពេលនេះ គឺគណបក្សកំពុងរង់ចាំ ការអនុញ្ញាតពីក្រសួងរៀបចំដែនដី នគរូបនីយកម្ម និង សំណង់ ក្នុងការផ្ទេរកម្មសិទ្ធដី និងអាជ្ញាបណ្ណពីក្រសួងព័ត៌មាន ក្នុងការដំឡើងបង្គោលស្ថានីយ»។
លោក យឹម សុវណ្ណដ បន្ថែមថា បើទោះបីជាទូរទស្សន៍នេះ មិនទាន់កើតចេញពីគណបក្សសង្គ្រោះជាតិក៏ពិតមែន តែជំហរនិងគោលការណ៍នៃការផ្សព្វផ្សាយ គឺបម្រើផលប្រយោជន៍ជាតិទាំងមូល ពោលគឺមិនបម្រើតែប្រយោជន៍បក្សតែម្យ៉ាងនោះទេ។
សូមបញ្ជាក់ថា គណបក្សសង្គ្រោះជាតិបានចាប់ផ្តើមប្រមូលថវិកាចាប់តាំងពីថ្ងៃទី២៥ ខែមិថុនា ឆ្នាំ២០១៥មកម្ល៉េះដើម្បីទ្រទ្រង់ការបង្កើតស្ថានីយទូរទស្សន៍ដែលគាំទ្រនយោបាយគណបក្សប្រឆាំងលើកទីមួយនៅកម្ពុជា។ រហូតមកដល់ពេលនេះ គណបក្សប្រមូលថវិកាបានប្រមាណជា៨០ម៉ឺនដុល្លារហើយ។
តាមគម្រោង គណបក្សត្រូវការថវិកាប្រមាណជា ១,៥លានដុល្លារ ទៅ៣លានដុល្លារ ដើម្បីដំណើរការទូរទស្សន៍របស់ខ្លួន៕
Tag:
CNRP
ទូរទស្សន៍ព្រះអាទិត្យ
© រក្សាសិទ្ធិដោយ thmeythmey.com