ជាតិ
កម្មករនិយោជិតនឹងមានប្រាក់ចូលនិវត្តន៍នៅឆ្នាំ ២០១៧
× រដ្ឋាភិបាល នឹងដាក់ឲ្យមានប្រាក់ចូលនិវត្តដល់កម្មករនិយោជិតនៅឆ្នាំ ២០១៧ ខាងមុខ។ នេះបើតាមការអះអាងរបស់អ្នកនាំពាក្យក្រសួងការងារ លោក ហេង សួ។
លោក ហេង សួ បានប្រាប់សារព័ត៌មានថ្មីៗនៅមុននេះបន្តិចថា កម្មករនិយោជិត ដែលអាចទទួលប្រាក់ចូលនិវត្តន៍បាន ត្រូវមានអតីតភាពការងារយ៉ាងតិច ១៨ ឆ្នាំ ហើយបានបង់ប្រាក់សមាជិកភាពជាមួយបេឡាជាតិរបបសន្តិសុខសង្គម(បសស)ចំនួន១៨ឆ្នាំ។ តែយ៉ាងណាអ្នកនាំពាក្យក្រសួងការងាររូបនេះ នៅមិនទាន់អាចបញ្ជាក់ឲ្យច្បាស់ថា កម្មករនិយោជិតត្រូវបង់ប្រាក់ចូល បបស ចំនួនប៉ុន្មានភាគរយក្នុងមួយខែនោះឡើយ។ « នៅឆ្នាំ ២០១៧ យើងនៅសល់ពេល ១ ឆ្នាំទៀត ដើម្បីពិចារណាថា គួរឲ្យកម្មករនិយោជិតបង់ចូល បបស ប៉ុន្មាន និងការងារមួយចំនួនទៀតដែលយើងត្រូវធ្វើជុំវិញប្រាក់ចូលនិវត្តន៍នេះ។ យើងនឹងធ្វើឲ្យបាននៅមុនដំណាច់ឆ្នាំ ២០១៧»។ លោក ហេង សួ បន្ថែមដូច្នេះហើយ ក៏ថ្លែងទៀតថា គម្រោងផ្តល់ប្រាក់ចូលនិវត្តន៍ដល់កម្មករនិយោជិតនៅឆ្នាំ ២០១៧ នេះ ជាផែនការរបស់បេឡាជាតិរបបសន្តិសុខសង្គម និងស្មារតីកិច្ចប្រជុំជាមួយក្រសួងសេដ្ឋកិច្ច និងហិរញ្ញវត្ថុ។
បើតាមលោក ហេង សួ ផែនការថ្មីរបស់រដ្ឋាភិបាលនេះ នឹងធ្វើឲ្យកម្មករនិយោជិត មានលំនឹងជីវិត ហើយកាត់បន្ថយការបារម្ភពេលខ្លួនឈប់ធ្វើការងារគ្មានលុយចិញ្ចឹមជីវិត។ លោក ពន្យល់បែបនេះថា៖ « កុំឲ្យពួកគាត់គិតថា ពេលខ្លួនមានកម្លាំងទើបបានធ្វើការចិញ្ចឹមជីវិត តែដល់ពេលចាស់ទៅអត់មានកម្លាំង ឈប់ធ្វើការអត់មានលុយ។ ដូច្នេះបងប្អូនមិនបាច់ព្រួយខ្លាចពេលចាស់អត់មានប្រាក់ខែទៀតទេ»។ ជាងនេះទៅទៀតលោក ហេង សួ ក៏លើកឡើងដែរថា ផែនការនេះ ក៏អាចធ្វើឲ្យកម្មករនិយោជិតលែងចាញ់បោកការឃោសនានយោបាយផងដែរ។«បក្សនយោបាយសន្យាឲ្យប្រាក់ពេលចាស់ តែកម្មករមានប្រាក់ចូលនិវត្តន៍ខ្លួនឯង ដោយសារគាត់សន្សំ គឺបង់ចូលបបសនេះឯង ពួកគាត់ឈប់ចាញ់បោកនយោបាយ»។
ពាក់ព័ន្ធនឹងសេវាសុខភាពរបស់កម្មករនិយោជិតវិញ រដ្ឋាភិបាលក៏ចេញអនុក្រឹត្យឲ្យកម្មករនិយោជិតចំណាយថវិកាបង់វិភាគទានតែ ១ ភាគរយនៃប្រាក់ខែចូលបេឡាជាតិរបបសន្តិសុខសង្គម នឹងទទួលបានសេវាថែរក្សាសុខភាពដោយអត់គិតថ្លៃ។ បើតាមលោក ហេង សួ កន្លងមក ដើម្បីទទួលបានសេវាសុខភាព កម្មករនិយោជិតត្រូវចំណាយពី ១៥-២០ ភាគរយនៃប្រាក់ខែ ទើបអាចទទួលបានសេវាសុខភាព៕
© រក្សាសិទ្ធិដោយ thmeythmey.com