ពីនេះ ពីនោះ
ប្រយ័ត្ន៤យ៉ាងដើម្បីកសាងជីវិតប្រកបដោយសេចក្ដីថ្លៃថ្នូរ និងជោគជ័យ!
× ភ្នំពេញ៖ ជីវិតថ្លៃថ្នូរ អ្នកណាថាមិនចង់បាន កិច្ចការជោគជ័យអ្នកថាមិនត្រូវការ កសាងទង្វើជាសម្បុរសគ្មានអ្នកណាដែលមិនចង់ធ្វើឲ្យតែមានលទ្ធភាពអាចធ្វើបាន។ ប៉ុន្តែក្នុងការទទួលបាន របស់ទាំងនេះ ធ្វើកិច្ចការទាំងនេះ ចាំបាចត្រូវតែមានការប្រុងប្រយ័ត្នជានិច្ច។
១/. កុំប្រើមនុស្សកាចរម៉ាំងរម៉ោក៖ មនុស្សកាច គឺជានមនុស្សដែលមានសន្ដានចិត្ត ប្រក្រតី ជាមនុស្សច្រឡើសបើស មិនងាយស្ដាប់បង្គាប់នរណាទេ។ បើសិនជាយើងប្រើ មនុស្សប្រភេទនេះ ឲ្យធ្វើការអ្វីមួយនោះ ប្រាកដណាស់លទ្ធផល នឹងមិនបានដូចអ្វីដែលយើងបាននោះទេ។ ព្រោះថាមនុស្សប្រភេទនេះ ធ្វើការងារអ្វីៗដោយខ្វះភាពអំណត់ និងធ្វើការដោយខ្ជះខ្ជាយ។ ហេតុដូច្នេះហើយទើប គេប្រុងប្រយ័ត្ន ក្នុងការប្រើមនុស្សណាស់ ដើម្បីចៀសវាងកុំឲ្យខូចការរបស់គេ។
២/. ការងារណាពិបាកត្រូវធ្វើឲ្យរួច៖ មនុស្សដែលចេះធ្វើការងារពិតប្រាកដ គឺមិនឡេះឡោះ មានភាពឆ្លាតវៃ ចេះលៃលក រកកលឧបាយ ស្រាយបញ្ហាដោយបញ្ញា ទោះបីការងារនោះតូច ឬធំ ស្រួលឬលំបាកក្ដី។ បុគ្គលភាគច្រើនចូលចិត្តធ្វើកិច្ចណាដែលស្រួលៗ មុននឹងបន្តទៅធ្វើកិច្ចការណាដែលលំបាកៗហើយនិងសំខានតាមក្រោយ។ នៅពេលដែលអ្នកទាំងនោះទៅធ្វើកិច្ចដែលលំបាកៗនិងសំខាន់ ក៏ចាប់ផ្ដើមមានភាពធុញទ្រាន់ជាមួយកិច្ចការនោះ ច្របូកច្របល់ ហើយធ្វើកិច្ចការទាំងនោះមិនត្រូវតាមកាល មិនអាចធ្វើកិច្ចការឲ្យរួចតាមកាលកំណត់ ធ្វើការងារចុងដៃចុងជើង ប្រចាំគេ និងគ្មានការទទួលខុសត្រូវលើមុខងាររបស់ខ្លួនជាដើម។ ហេតុនេះ បុគ្គលគ្រប់រូបត្រូវចេះបែងចែកការងារធ្វើឲ្យបានច្បាស់លាស់ ការងារណាមកមុន ពេលកំណត់ខ្លីត្រូវធ្វើឲ្យហើយ ការងារណាដែលសំខាន់ត្រូវចំណាយពេលធ្វើឲ្យបានច្រើន កុំទុកពេលធ្វើតក់ក្រហល់ ព្រោះវានាំឲ្យការងាររបស់អ្នកច្របូកច្របល់ ហើយធ្វើឲ្យកិច្ចរបស់អ្នកបរាជ័យ។
៣/. ឲ្យទានកុំឲ្យរើសមុខ៖ ទាន គឺជាអំណោយ ការឲ្យអ្វីៗដែលគួរឲ្យ ត្រូវធ្វើការដោយសទ្ធាប្រកបដោយបញ្ញាទើបបានបុណ្យ។ សទ្ធា គឺជាការជឿ ការចុះចិត្តស៊ប់ ការដោតជាប់ដោយចិត្ត ព្រោះបានពិចារណាឃើញហេតុ ផលអាក្រក់ ល្អ សខ្មៅ ដោយបញ្ញា។ ចំពោះការឲ្យទានទៅអ្នកដទៃ គួរណាស់កុំមានចិត្តប្រកាន់ពណ៌សម្បុរ អាក្រក់ល្អ សខ្មៅ មនុស្សល្អ មនុស្សអាក្រក់ ជាតិសាសន៍ ជំនឿ ទិដ្ឋិ លទ្ធិ និងសាសនារបស់មនុស្សឡើយ។ តែទានត្រូវតែស្ដែងចេញពីសន្ដានខាងក្នុងនៃចិត្ត ដែលចង់កែប្រែមនុស្ស ចង់ឃើញមនុស្សទូទៅមានសេចក្ដីសុខ មានសន្ដិភាព ដែលជាសេចក្ដីប្រាថ្នារបស់មនុស្សទាំងអស់គ្នា។
៤/. កុំមានចិត្តជោរតាមគេចាក់៖ មនុស្សខ្លះ កាលខ្លួនបានយសខ្ពស់មុខ សុខសាន្ត មានតម្លៃហើយ ក៏មានចិត្តជោរ តាមគេបញ្ចើចបញ្ចើ ក៏តម្លើងឬកក្រអឺតឡឺត ព្រហើន មើលងាយមិត្តភក្តិ ញាតិសន្ដាន និងមនុស្សទាំងឡាយ។ មនុស្សប្រភេទនេះ គឺជាមនុស្សត្រចៀកស មនុស្សឆាប់ជឿគេ មនុស្សខ្វះការពិចារណា មនុស្សខ្វះមូលដ្ឋានហេតុនិងផល។ ប្រសិនបើយើង គឺជាមនុស្សដែលជោរតាមគេចាក់ដូច្នេះប្រាកដណាស់ នឹងត្រូវវិនាសអស់ទ្រព្យសម្បត្តិ អស់យស ឬបាត់បង់ញាតិមិត្ត បងប្អូន ឪពុកម្ដាយ បងប្អូនជាទីស្រឡាញ់ជាក់ជាពុំខាន។ តែបើអ្នកជាមនុស្សចេះដឹង ថ្លៃថ្នូរ អ្នកប្រាកដជាមិនងាយត្រេកត្រអាលជាមួយពាក្យបញ្ជោរបស់អ្នកដទៃឡើយ៕
© រក្សាសិទ្ធិដោយ thmeythmey.com