លោក នី ចរិយា ធ្លាប់ត្រូវសម្តេច ចាត់ទុកជា«ក្មេងឈ្លើយ»នឹងធ្វើការជាមួយលោក ស៊ិក ប៊ុនហុក

ជាតិ

នយោបាយជាតិ

លោក នី ចរិយា ធ្លាប់ត្រូវសម្តេច ចាត់ទុកជា«ក្មេងឈ្លើយ»នឹងធ្វើការជាមួយលោក ស៊ិក ប៊ុនហុក

16, Jan 2016 , 12:13 pm

រូបភាព

ដោយ:

មន្ត្រីការពារសិទ្ធិមនុស្សដ៏ល្បី ដែលធ្លាប់តែរិះគន់រដ្ឋាភិបាលមិនសំចៃមាត់ ត្រូវបានគណៈកម្មាធិការជាតិរៀបចំការបោះឆ្នោតជ្រើសរើសជាអគ្គលេខាធិការរង កាលពីថ្ងៃសុក្រទី ១៥ ខែមករា។ លោក នី ចរិយា នឹងចូលទៅធ្វើការក្នុងស្ថាប័នគ.ជ.ប ក្នុងនាយកដ្ឋានដែលស្ថិតនៅក្រោមការបង្គាប់បញ្ជាផ្ទាល់របស់លោក ស៊ិក ប៊ុនហុន ប្រធានគ.ជ.ប តែម្តង។

សូមស្តាប់លោក ជា ធីរិទ្ធ
**audio3**

« ឲ្យតែធ្វើកើត ខ្ញុំមិនគិតថា អ្នកធ្លាប់ប្រឆាំងឬមិនប្រឆាំងនោះទេ»។ នេះជាការអះអាងរបស់លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត នៅពេលដែលលោក ប្រកាសថា លោក នី ចរិយា បានជាប់ធ្វើជាអគ្គលេខាធិការរងគ.ជ.ប កាលពីថ្ងៃសុក្រ។ លោក ស៊ិក ប៊ុនហុកបញ្ជាក់ថា លោក នី ចរិយា ជាប់ជាអគ្គលេខាធិការរងទទួលបន្ទុក នាយកដ្ឋានសវនកម្មផ្ទៃក្នុង នឹងធ្វើការជាមួយលោកផ្ទាល់តែម្តង ពីព្រោះនាយកដ្ឋាននេះ ប្រធានគ.ជ.ប ជាអ្នកទទួលខុសត្រូវផ្ទាល់។

ស្តាប់ប្រសាសន៍លោក ស៊ិក ប៊ុនហុក

កាលពីថ្ងៃទី ២១ ខែសីហា ឆ្នាំ ២០១៤ សម្តេចនាយករដ្ឋមន្ត្រី ហ៊ុន សែន ធ្លាប់ប្រតិកម្មខ្លាំងៗនឹងពាក្យរិះគន់របស់លោក នី ចរិយា មកលើរដ្ឋាភិបាល។ ប្រមុខរដ្ឋាភិបាល បាននិយាយសំដៅទៅលោក នី ចរិយា ដោយមិនបញ្ចេញឈ្មោះចំៗថា (លោក នី ចរិយា) «ជាក្មេងឈ្លើយ» ។ ប្រតិកម្មរបស់សម្តេច ហ៊ុន សែន ធ្វើឡើង បន្ទាប់ពីលោក នី ចរិយា អត្ថាធិប្បាយចំអកឲ្យលោកនាយករដ្ឋមន្ត្រី ដែលមានប្រសាសន៍ថា ខ្លួនមិនដែលបានទទួលញត្តិតវ៉ារបស់ពលរដ្ឋរងគ្រោះរឿងដីធ្លីកន្លងមកនោះទេ។

តែយ៉ាងណាក៏ដោយ នៅពេលឆាប់ៗនេះ មន្ត្រីសង្គមស៊ីវិល ដែលតែងតែរិះគន់រដ្ឋាភិបាលមិនសំចៃមាត់រូបនេះ នឹងចូលទៅបម្រើការងារនៅស្ថាប័នគ.ជ.ប ស្ថិតនៅក្រោមឱវាទលោក ស៊ិក ប៊ុនហ៊ុក ដែលជាអតីតតំណាងរាស្ត្រគណបក្សប្រជាជនកម្ពុជា។

នៅក្នុងវេទិកាអ្នកស្តាប់វិទ្យុអាស៊ីសេរី កាលពីយប់ថ្ងៃសុក្រ លោក នី ចរិយា បានថ្លែងថា បើទោះបីជាខ្លួនបានជាប់ជាតំណែងអគ្គលេខាធិការរងគ.ជ.ប ក៏ពិតមែន តែក្នុងចិត្តរបស់លោក នៅមិនទាន់ស្ងប់នៅឡើយ។ មិនស្ងប់ដោយសារលោកមានមន្ទិលថា តើលក្ខខណ្ឌនិងបរិយាកាសនៅក្នុងគ.ជ.ប នេះ នឹងអាចផ្តល់ឱកាសឲ្យលោកបានធ្វើអ្វីខ្លះ ឆ្លើយតបនឹងការចង់បានរបស់ប្រជាពលរដ្ឋ ដែលចង់ឲ្យមានការបោះឆ្នោតដោយសេរី ត្រឹមត្រូវ និងយុត្តធម៌។ ជាមួយគ្នា លោក នី ចរិយា អះអាងថា បើទៅបីជាខ្លួនទៅធ្វើការក្នុងស្ថាប័នបោះឆ្នោតក្តី ក៏ខ្លួនមិនអាចបញ្ឈប់បញ្ចេញយោបល់បានដែរ តែគ្រាន់តែការបញ្ចេញយោបល់នេះ គោរពទៅតាមបទបញ្ជាផ្ទៃក្នុង និងច្បាប់មួយចំនួនរបស់គ.ជ.ប៕