ជាតិ
អភិបាលរាជធានី៖ ពីរឆ្នាំទៀត ភ្នំពេញលែងមានទឹកជំនន់ទាំងស្រុង
× ភ្នំពេញ៖ លោក ប៉ា សុជាតិវង្ស អភិបាលរាជធានីភ្នំពេញបានប្រកាសថា រយៈពេលពីរឆ្នាំទៀត រាជធានីភ្នំពេញនឹងអាចបញ្ចៀសពីការជន់លិចដោយជំនន់ទឹកភ្លៀង នៅតាមដងផ្លូវក្នុងភូមិសាស្ដ្ររាជធានីភ្នំពេញទាំងស្រុង។ នេះបើតាមការផ្សាយរបស់ទីភ្នាក់ងារសារព័ត៌មាន កម្ពុជា (AKP)។
បើយោងតាម AKP លោក ប៉ា សុជាតិវង្ស បានថ្លែងក្នុងពិធីបញ្ចុះបឋមសិលាសាងសង់អគារសិក្សាជំនួយរបស់រដ្ឋាភិបាលជប៉ុនចំនួន ៤ខ្នង នៅក្នុងរាជធានីភ្នំពេញ នៅថ្ងៃទី២៧ ខែមករា ឆ្នាំ២០១៦ថា អាជ្ញាធររាជធានីភ្នំពេញបានធ្វើសកម្មភាព ៤សំខាន់ៗ ក្នុងនោះ រួមមាន ការតបណ្តាញប្រពន្ធ័លូមេធំៗចំនួន ១១៧គីឡូម៉ែត្រ ការសាងសង់ស្ថានីយ៍បូមទឹកបឹងត្របែក បឹងជើងឯក ស្ថានីយបូមទឹកទួលគោក១ ទួលគោក២ និងការស្តារអាងស្តុកទឹកបឹងត្របែក និងការស្តារអាងស្តុកទឹកបឹងត្របែកឆ្ពោះទៅស្ថានីបឹងជើងឯក និងការស្តារប្រឡាយបាក់ទូកឆ្ពោះទៅប្រឡាយអូរវែង ដើម្បីបញ្ចៀសជំនន់ទឹកភ្លៀងក្នុងភូមិសាស្ត្ររាជធានីភ្នំពេញ។ ហើយថា យុទ្ធសាស្ត្រទាំងនេះ បានអនុវត្តន៍សម្រេចជាង៦០ភាគរយ ដើម្បីរំដោះជំនន់ទឹកភ្លៀងចេញពីរាជធានីភ្នំពេញ។
ភ្ជាប់ជាមួយគ្នាដែរ លោក ប៉ា សុជាតិវង្ស បានប្រាប់ពីមូលហេតុនៃជំនន់ទឹកភ្លៀងក្នុងរាជធានីភ្នំពេញ កន្លងមកនោះ ក៏ព្រោះសណ្ឋានដីរាជធានីភ្នំពេញ មានរាងបាតខ្ទះហ៊ុមព័ទ្ធដោយទំនប់ និងបឹងធម្មជាតិ រីឯប្រឡាយរំដោះទឹកចេញ ត្រូវបានរីងរាក់ដោយកំណកដីប្រមាណជាង៣០ឆ្នាំកន្លងមក ដែលគ្រឿងចាក់ពិបាកជីកស្តារឡើងវិញ៕
Tag:
ភ្នំពេញ
ជំនន់ទឹកភ្លៀង
© រក្សាសិទ្ធិដោយ thmeythmey.com