លោក មាជ សុវណ្ណរ៉ា បរាជ័យជាលើកទី២ក្នុងការសុំទៅព្យាបាលជំងឺនៅបរទេស

ជាតិ

នយោបាយជាតិ

លោក មាជ សុវណ្ណរ៉ា បរាជ័យជាលើកទី២ក្នុងការសុំទៅព្យាបាលជំងឺនៅបរទេស

17, Mar 2016 , 4:07 pm

រូបភាព

ដោយ: ម៉ៅ សុផា

ក្រោយពីដាក់ពាក្យទៅកាន់សាលាឧទ្ធរណ៍ដើម្បីសុំទៅព្យាបាលជំងឺនៅប្រទេសក្រៅ ស្ថាប័នតុលាការជាន់ខ្ពស់មួយនេះ បានកោះហៅលោក មាជ សុវណ្ណរ៉ា រួមទាំងសកម្មជនបក្សសង្គ្រោះជាតិ១០នាក់ទៀត ចូលឆ្លើយបំភ្លឺ នាពេលព្រឹក ថ្ងៃទី១៧ ខែមីនា នេះ។ ប៉ុន្តែក្រុមប្រឹក្សានៃអង្គចៅក្រមបានបដិសេធសំណើរបស់ជនជាប់ចោទ។

វាជាលទ្ធផលអវិជ្ជមានសម្រាប់លោក មាជ សុវណ្ណរ៉ា ដែលសាលាឧទ្ធរណ៍ ច្រានចោលសំណើសុំនៅក្រៅឃុំ ដើម្បីទៅព្យាបាលជំងឺនៅសហរដ្ឋអាមេរិក។ លោក មាជ សុវណ្ណរ៉ា និងសកម្មជនបក្សប្រឆាំងទាំង១០ទៀត ត្រូវបានសាលាឧទ្ធរណ៍ កោះហៅទៅសាកសួរ អស់រយៈពេលជិន៤ម៉ោង នៅថ្ងៃនេះ។ ការកោះហៅនេះ ដោយសារតែមេធាវីការពារក្តីរបស់

ជនជាប់ចោទទាំង១១រូប បានប្តឹងជំទាស់ នឹងសេចក្តីសម្រេចរបស់សាលាដំបូងរាជធានីភ្នំពេញ លើករណីចំនួន២ ។

ករណីទី១ ប្តឹងជំទាស់នឹងសេចក្តីសម្រេចរបស់សាលាដំបូងរាជធានីភ្នំពេញ ដែលបានបដិសេធមិនឲ្យលោក មាជសុវណ្ណរ៉ា នៅក្រៅឃុំដើម្បីទៅព្យាបាលជំងឺនៅសហរដ្ឋអាមេរិក។ ប៉ុន្តែជាអកុសលសម្រាប់សកម្មជនបក្សប្រឆាំងរូបនេះ ដែលសាលាឧទ្ធរណ៍មិនបានធ្វើតាមសំណូមពរ ពោលគឺស្ថាប័នកាត់ក្តីជាន់ខ្ពស់មួយនេះ បានចាត់ទុកសេចក្តីសម្រេចរបស់សាលាជំនុំជម្រះក្តីជាន់ទាប ថាត្រឹមត្រូវ។

បើតាមលោក ជូង ជូងឺ មេធាវីការពារក្តីរបស់លោកមាជ សុវណ្ណរ៉ា ការបដិសេធរបស់ក្រុមប្រឹក្សានៃអង្គចៅក្រម ស្ថិតនៅក្រោមហេតុផល២ គឺ ១ ចៅក្រមអះអាងថា លោក មាជ សុវណ្ណរ៉ា មិនមានជំងឺអ្វីធ្ងន់ធ្ងរឡើយ ហើយទី២ ចៅក្រមយល់ថា គ្រូពេទ្យនៅកម្ពុជា មានសមត្ថភាពគ្រប់គ្រាន់ដើម្បីព្យាបាលលោក មាជ សុវណ្ណរ៉ា។

មេធាវីរូបនេះ អះអាងថា លោក មាជ សុវណ្ណរ៉ា ត្រូវបន្តព្យាបាលក្បាលរបស់លោក ដែលបានប៉ះទង្គិចក្នុងគ្រោះថ្នាក់ចរាចរណ៍ មុនពេលជាប់ពន្ធនាគារ ហើយម្យ៉ាងទៀត លោក មាជ សុវណ្ណរ៉ា ក៏មានសញ្ជាតិអាមេរិក ផងដែរ។ លោក ជូង ជូងី សោកស្តាយយ៉ាងខ្លាំង ដែលចៅក្រមមិនទទួលយកហេតុផលនេះ ។

កន្លងមក លោក មាជ សុវណ្ណារ៉ា បានស្នើឲ្យសាលាដំបូងរាជធានីភ្នំពេញ ដោះលែងលោកនៅក្រៅឃុំ ដើម្បីបានទៅព្យាបាលជំងឺ ព្រមទាំងបានជួបភរិយានិងកូន នៅសហរដ្ឋអារមេរិក ។ ប៉ុន្តែ សាលាជំនុំជម្រះក្តីជាន់ទាបមួយយនេះ បានបដិសេធ។

ករណីទី២ ប្តឹងជំទាស់នឹងសេចក្តីសម្រេចរបស់សាលាដំបូងរាជធានីភ្នំពេញ ដែលសម្រចឲ្យលោក មាជ សុវណ្ណរ៉ា និងសកម្មជនទាំង១០រូបទៀត ជាប់ពន្ធនាគារចាប់១៥ឆ្នាំ ដល់ ២០ឆ្នាំ។ ប៉ុន្តែសម្រាប់ករណីទី២នេះ សាលាឧទ្ធរណ៍មិនទាន់សម្រេចនៅឡើយទេ។ លោក ជូង ជូងី អះអាងថា លោក នឹងជំរុញឲ្យសាលាឧទ្ធរណ៍ បើកសវនាការឲ្យបានឆាប់រហ័ស ដើម្បីសម្រេចសំណុំរឿងនេះ។

លោក ជូង ជូងី ថា មូលហេតុដែលលោកប្តឹងឧទ្ធរណ៍នេះ ដោយសារតែការសម្រេចរបស់សាលាដំបូងរាជធានីភ្នំពេញ បានធ្វើខុសនីតិវិធីក្រមព្រហ្មទណ្ឌ។ លោកបញ្ជាក់ពីផ្លូវច្បាប់បែបនេះថា ការសម្រេចរបស់តុលាការក្នុងបទល្មើសព្រហ្មទណ្ឌ មិនអាចដំណើរការទៅដោយគ្មានមេធាវីរបស់ជនជាប់ចោទឡើយ។

កាលពីថ្ងៃទី ២៥ ខែធ្នូ ឆ្នាំ២០១៥ សាលាដំបូងរាជធានីភ្នំពេញ បានបើកសវនាការលើសំណុំរឿងលោក មាជ សុវណ្ណរ៉ា និងសកម្មជនទាំង១០ នាក់នោះ ដោយគ្មានមេធាវីរបស់ពួកគេនោះទេ។ តុលាការជាន់ទាបមួយនេះ បានចោទប្រកាន់លោក មាជ សុវណ្ណរ៉ា និងសកម្មជនទាំង១០នាក់ ពីបទដឹកនាំធ្វើកុបកម្ម ញុះញង់ឲ្យប្រព្រឹត្តបទឧក្រិដ្ឋ និងផ្តើមគំនិតក្នុងអំពើហិង្សា ដោយចេតនា មានស្ថានទម្ងន់ទោស នៅក្នុងហេតុការណ៍ប៉ះទង្គិចគ្នា នៅលើស្ពាននាគ កាលពីថ្ងៃទី ១៥ ខែកក្កដា ឆ្នាំ ២០១៤ ៕