ជាតិ
លោក យ៉ែម បុញ្ញឫទ្ធិ ស្នើអ្នកនយោបាយគិតពីគ្រោះរាំងស្ងួត កសិករខ្វះទឹកធ្វើស្រែ ជាងចំណាយពេលឈ្លោះគ្នា លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ
× អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ អំពាវនាវឲ្យអ្នកនយោបាយខ្មែរឈប់ចំណាយពេលឈ្លោះគ្នា តែត្រូវរួមគ្នាដោះស្រាយបញ្ហាជាតិនៅចំពោះមុខ គឺគ្រោះរាំងស្ងួង ហើយកសិករគ្មានទឹកធ្វើស្រែ។
បញ្ហាគ្រោះរាំងស្ងួត កសិករគ្មានទឹកធ្វើស្រែ ជាក្តីកង្វល់យ៉ាងខ្លាំងរបស់លោក យ៉ែម បុញ្ញឫទ្ធិ តំណាងរាស្ត្រគណបក្សសង្គ្រោះជាតិមណ្ឌលព្រៃវែង។ ក្តីកង្វល់នេះ បានជំរុញ អ្នកនាំពាក្យគណបក្សសង្គ្រោះជាតិរូបនេះ អំពាវនាវឲ្យអ្នកនយោបាយឈប់ចំណាយពេលឈ្លោះគ្នា ហើយងាកមកចាប់អារម្មណ៍បញ្ហារបស់ប្រទេសជាតិខាងលើវិញម្តង។ តាមរយៈទំព័រហ្វេសប៊ុករបស់ខ្លួន លោក បុញ្ញឫទ្ធិ បានសរសេរយ៉ាងនេះថា៖« ការឈ្លោះទាស់ទែងគ្នារបស់អ្នកនយោបាយ គឺនាំឲ្យខូចពេលវេលាជាតិ។បញ្ហាធំដែលយើងគួរយកចិត្តទុកដាក់ដោះស្រាយនៅពេលនេះ គឺរឿងគ្រោះរាំងស្ងួត កសិករខ្វះទឹកធ្វើស្រែ ពីព្រោះកម្តៅអាកាសធាតុឡើងខ្លាំងនិងខ្យល់មូសុងដែលនាំទឹកភ្លៀងបក់មកយឺតនៅឆ្នាំនេះ នឹងធ្វើឲ្យប្រភពទឹកឆាប់រីងស្ងួតហួតហែង ហើយរដូវប្រាំងនឹងអូសបន្លាយពេលវេលាយូរ»។
មន្ត្រីជាន់ខ្ពស់គណបក្សប្រឆាំងរូបនេះ យល់ថា បញ្ហាគ្រោះរាំងស្ងួតនេះ អាចធ្វើឲ្យដីរាប់សែនហិកតា និងដំណាំកសិកម្មច្រើនមុខ ជាពិសេសដំណាំស្រូវត្រូវក្រៀមស្វិត និងជីវភាពកសិករខ្មែររាប់សែនគ្រួសារ ជួបប្រទះការលំបាកជាខ្លាំងជាមិនខាន។ «ដូច្នេះការចំណាយពេលវេលាឈ្លោះទាស់ទែងគ្នានឹងរឿងតូចតាច នោះនឹងធ្វើឲ្យយើងបាត់បង់ពេលវេលាជាតិដ៏សំខាន់ ក្នុងការធ្វើកិច្ចការជាតិធំៗ ដូចជាការធ្វើឲ្យកសិកររបស់យើងមានជីវភាពធូរធារជាដើម។ ពេលវេលាជាតិដល់ហើយ ល្មមយើងអ្នកនយោបាយរួបរួមគ្នា កសាងនាវាកម្ពុជាឲ្យឆ្ពោះទៅរកការរីកចម្រើន ទាំងវិស័យសេដ្ឋកិច្ច នយោបាយ»។ នេះជាការបញ្ជាក់របស់ លោក យ៉ែម បុញ្ញឫទ្ធិ។
ជាមួយគ្នានេះ លោក បុញ្ញឫទ្ធិ ក៏ឆ្លៀតបញ្ជាក់ពីគោលដៅរបស់គណបក្សសង្គ្រោះជាតិដែរ។ លោកថា ទស្សនៈនយោបាយរបស់គណបក្សសង្គ្រោះជាតិ ចង់ឲ្យមានការជជែកដេញដោលគ្នាក្នុងចំណោមអ្នកនយោបាយ លើគោលនយោបាយជាតិសំខាន់ៗ ដើម្បីដោះស្រាយបញ្ហាជាតិ មាតុភូមិ និងប្រជាពលរដ្ឋខ្មែរ ដែលកំពុងប្រឈមនាពេលបច្ចប្បន្ន៕
© រក្សាសិទ្ធិដោយ thmeythmey.com