សេដ្ឋវិទូ៖ ដើម្បីរស់ដោយខ្លួនឯង កម្ពុជាត្រូវពង្រឹងវិស័យកសិកម្មមុខគេ

ជាតិ

សេដ្ឋកិច្ច

សេដ្ឋវិទូ៖ ដើម្បីរស់ដោយខ្លួនឯង កម្ពុជាត្រូវពង្រឹងវិស័យកសិកម្មមុខគេ

13, Apr 2016 , 12:39 pm

រូបភាព

ដោយ: ម៉ៅ សុផា

ភ្នំពេញ៖ ដង្ហើមសេដ្ឋកិច្ចកម្ពុជា ត្រូវពឹងផ្អែកលើសហរដ្ឋអាមេរិក និងសហភាពអឺរ៉ុប ខ្លាំងជាងគេ។ ប្រសិនបើប្លុកទាំងពីរនេះ មានវិបត្តិសេដ្ឋកិច្ច នោះសេដ្ឋកិច្ចកម្ពុជា ក៏ប្រហែលជាមានភាពវឹកវរផងដែរ។ ដើម្បីដកខ្លួនឲ្យផុតពីបង្អែករបស់ប្រទេសដទៃ កម្ពុជាត្រូវពង្រឹងវិស័យកសិកម្ម ឲ្យបានខ្លាំងក្លា។ នេះជាប្រសាសន៍របស់អ្នកជំនាញផ្នែកម៉ាក្រូសេដ្ឋកិច្ចនិងសារពើពន្ធ នៃធនាគារពិភពលោកប្រចាំកម្ពុជា។

លោក លី សូដេត សេដ្ឋវិទូជាន់ខ្ពស់ នៃធានាគារពិភពលោកប្រចាំកម្ពុជា បានចាត់ទុកវិស័យកសិកម្ម ថាជាវិស័យអាទិភាព ដែលអាចធ្វើសេដ្ឋកិច្ចកម្ពុជា មានភាពនឹងន ដោយមិនចាំបាច់ពឹងផ្អែកលើប្រទេសដទៃ។ លោក មើលឃើញថា ដើម្បីឲ្យសេដ្ឋកិច្ចកម្ពុជាមានដង្ហើមដកដោយខ្លួនឯង កម្ពុជាត្រូវយកចិត្តទុកដាក់និងពង្រឹងវិស័យកសិកម្ម ជាងវិស័យណាៗទាំងអស់។ ប៉ុន្តែ លោកចង់ឲ្យប្រទេសកម្ពុជា អភិវឌ្ឍវិស័យកសិកម្ម ដោយប្រើប្រាស់ឧបករណ៍បច្ចេកទេស និងតាមលក្ខណវិទ្យាសាស្ត្រ ជាជាងការពឹងផ្អែកលើទឹកភ្លៀង។

សេដ្ឋវិទូរូបនេះបានបញ្ជាក់បែបដូច្នេះថា៖«សំខាន់ គឺយើងត្រូវពង្រឹងកសិកម្ម បន្ថែមទៀត។ កសិកម្មយើង នៅពឹងផ្អែកលើធាតុអាកាស ហើយអាកាសធាតុប៉ុន្មានឆ្នាំនេះ គឺពិបាកជាងឆ្នាំមុនៗ។ យើងដឹងហើយថា ទឹកខ្វះជាងមុន ហើយភ្លៀងក៏មិនបានទៀតទាត់ដូចមុន។ អ៊ីចឹង ផលិតផលកសិកម្ម ដែលពឹងផ្អែកលើធាតុអាកាសគឺមានការលំបាក។ ដូច្នេះយើងត្រូវពង្រឹងខាងកសិកម្មថែមទៀត ដើម្បីកុំឲ្យប្រទេសយើងពឹងផ្អែកខាងក្រៅខ្លាំងពេក។ ឥឡូវយើងនៅពឹងផ្អែកខាងក្រៅខ្លាំង»។

លោក លី សូដេត បានបន្ថែមទៀតថា នាពេលបច្ចុប្បន្ននេះ កម្ពុជា ពឹងផ្នែកលើសេដ្ឋកិច្ចសហរដ្ឋអាមេរិក និងសហភាពអឺរ៉ុប ជាងបណ្តាប្រទេសផ្សេងៗ។ លោកថា កម្ពុជា បាននាំចេញនូវផលិតផលជាច្រើន ជាពិសេសផលិតផលផ្នែកសម្លៀកបំពាក់ ទៅកាន់ប្រទេសសហរដ្ឋអាមេរិកនិងសហភាពអឺរ៉ុប។

«ប្រសិនបើសេដ្ឋកិច្ចប្លុកទាំងពីរហ្នឹងកាន់តែខ្លាំងទៅៗ អ៊ីចឹងសេដ្ឋកិច្ចយើង ក៏កាន់តែខ្លាំងទៅៗដែរ ព្រោះយើងពឹងផ្អែកលើការនាំចេញទៅប្លុកទាំងពីរហ្នឹង»។ នេះជាបញ្ជាក់បន្ថែមរបស់ លោក លី សូដេត។

ការថ្លែងរបស់លោក លី សូដេត ខាងលើ ធ្វើឡើងនៅចំពោះមុខក្រុមអ្នកសារព័ត៌មាន ក្រោយពីបញ្ចប់ «ពិធីធ្វើបទបង្ហាញប្រចាំឆមាសស្តីពីការអភិវឌ្ឍសេដ្ឋកិច្ចក្នុងតំបន់អាស៊ីបូព៌ានិងបាស៊ីហ្វិករបស់ធានាគារពិភពលោក» នៅថ្ងៃទី១១ ខែមេសា ឆ្នាំ២០១៦ នេះ៕