ជាតិ
កូនស្រីលោក គង្គ ប៊ុនឈឿន ថានឹងជម្នះបំពេញបំណងឪពុក បើគ្មានអន្តរាគមន៍ពីអាជ្ញាធរ
×![]()
ដោយ: ខន ចំប៉ា
កូនៗរបស់លោក គង្គ ប៊ុនឈឿន នៅតែចិញ្ចឹមចិត្តបំពេញបំណងចុងក្រោយរបស់ឪពុកដែលចង់មាន ទីតម្កល់ធាតុ ឬរូបសំណាក នៅក្បែរស្ទឹងសង្កែ ខេត្តបាត់ដំបងដែលជាទឹកដីកំណើតរបស់លោក។ អ្នកស្រី ប៊ុនឈឿន សូរីដា ជាកូនស្រីម្នាក់ ក្នុងចំណោមកូនៗដទៃទៀត របស់កវីម្ចាស់ស្ទឹងសង្កែ បានបញ្ជាក់ថា ខ្លួន និងសាច់ញាតិ នឹងពុះពារដើម្បីសាង់សង់ទីតម្កល់ធាតុ ឬរូបសំណាករបស់ឪពុក នៅក្នុងវត្តណាមួយ ក្នុងខេត្តបាត់ដំបង បើទោះជាយូរយ៉ាងណា ឬគ្មានអន្តរាគមន៍ពីអាជ្ញាធរខេត្តក៏ដោយ។
អ្នកស្រី ប៊ុនឈឿន សូរីដា បានអះអាងថាអ្នកស្រី និងបងប្អូន នឹងខិតខំ ជម្នះ ពុះពារ រៀបចំឲ្យមានការសង់ទីតម្កល់ធាតុ ឬរូបសំណាក លោក គង្គ ប៊ុនឈឿន នៅក្នុងខេត្តបាត់ដំបង ដើម្បីបំពេញបំណងចុងក្រោយរបស់ឪពុក។
អ្នកស្រី ប៊ុនឈឿន សូរីដា បានថ្លែងប្រាប់សារព័ត៌មានថ្មីៗ តាមរយៈទូរសព្ទនៅថ្ងៃទី២០មេសាថា អ្នកស្រី និងសាច់ញាតិផ្សេងទៀត នឹងទៅសុំព្រះចៅអធិការវត្តណាមួយ នៅក្នុងក្រុងបាត់ដំបង ដើម្បីសាងសង់ទីតម្កល់ធាតុរបស់ឪពុក ប្រសិនបើគ្មានអន្តរាគមន៍ណាមួយពីអាជ្ញាធរខេត្តក្នុងករណីនេះ។ អ្នកស្រី បានបញ្ជាក់ថា៖«ពួកខ្ញុំនឹងទៅ! ទៅសុំពីវត្តមួយ ទៅមួយ។ យើងនាំគ្នាទៅមើលជាក់ស្តែង តើអាចធ្វើយ៉ាងណាបាន យើងសុំគេធ្វើបានយ៉ាងម៉េច បានកម្រិតណា? ទោះបីថាយូរយ៉ាងក៏ដោយ ក៏នៅតែរក ក៏នៅតែធ្វើ យើងពុះពាររហូត» ។
បើទោះបីជារហូតដល់ពេលនេះ អ្នកស្រីនៅមិនទាន់ទទួលបានការបញ្ជាក់ជាផ្លូវការណាមួយពីអាជ្ញាធរខេត្តបាត់ដំបង ជុំវិញការសាងសង់ទីតម្កល់ធាតុ ឬរូបសំណាករបស់លោក គង្គ ប៊ុនឈឿន នៅឡើយក៏ដោយ ប៉ុន្តែអ្នកស្រី និងសាច់ញាតិបានសម្តែងរំភើប និងអរគុណទៅដល់អាជ្ញាធរខេត្តបាត់ដំបង ចំពោះបំណងចង់សាងសង់ទីតម្កល់ធាតុ ឬរូបសំណាករបស់ឪពុក។ លោកស្រីក៏សង្ឃឹមដែរថា អាជ្ញាធរខេត្តបាត់ដំបងក៏ជួយសម្រេចបំណងរបស់ឪពុកខ្លួន។ មានទីតម្កល់ធាតុ ឬរូបសំណាកនៅមាត់ស្ទឹងសង្កែ ខេត្តបាត់ដំបងដែលជាទឹកដីកំណើតរបស់ខ្លួន គឺជាបំណងចុងក្រោយរបស់កវីម្ចាស់ស្ទឹងសង្កែគង្គ ប៊ុនឈឿន។
សារព័ត៌មានថ្មីៗ នៅមិនទាន់អាចសុំការបញ្ជាក់ពី លោក ច័ន្ទ សុផល អភិបាលខេត្តបាត់ដំបងបាននៅឡើយ ជុំវិញករណីនេះ ព្រោះលោកថា កំពុងជាប់ប្រជុំ។ លោក ច័ន្ទ សុផល ធ្លាប់បានអះអាងថា នឹងបំពេញបំណងចុងក្រោយ ឲ្យលោក គង្គ ប៊ុនឈឿន ប្រសិនបើមានការគាំទ្រច្រើនពីមហាជន។ លោកថា៖«បើសិនណាមានការគាំទ្រយើងនឹងធ្វើ។ ដូច្នេះយើងចាំមើលមតិភាគច្រើន គាត់ជួយផ្តល់យោបល់មកខ្ញុំ ទើបខ្ញុំអាចសម្រេចថាយកកន្លែងណាជូនគាត់(គង្គ ប៊ុនឈឿន)បាន។ យើងគិតដល់គាត់»។
លោក គង្គ ប៊ុនឈឿន ដែលជាកវី អ្នកនិពន្ធរឿងប្រលោមលោក និងជាអ្នកនិពន្ធបទចម្រៀងជាច្រើនរយបទឲ្យអ្នកចម្រៀងខ្មែរដ៏ល្បីល្បាញនៅក្នុងទស្សវត្សរ៍៦០ និង៧០ បានទទួលមរណភាពក្នុងវ័យ៧៧ឆ្នាំ នៅម៉ោង៧ព្រឹកម៉ោងនៅក្នុងប្រទេសន័រវេ ត្រូវនឹងម៉ោង១រសៀលម៉ោងនៅកម្ពុជាថ្ងៃទី១៧ខែមេសាឆ្នាំ២០១៦៕
Tag:
គង្គ ប៊ុនឈឿន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
