ដំរីជាន់ខ្លា ០៤,០៥,២០១៦
បុរសកំសត់ថៃធីម:០១២៤៥៧៦៣០
១/ឱផ្ទៃស្រុកខ្មែរខែរះភ្លឺថ្លា
ប្រជាខេមរាធ្លាប់រស់ក្សេមក្សាន្ត
ភោគផលធម្មជាតិសម្បូរថ្កើងថ្កាន
គ្រប់ខេត្តភូមិឋានបៃតងខៀវខ្ចី។
២/ស្ទឹងព្រែកដងអូរទន្លេគង្គា
ម្រឹគ្គីម្រឹគ្គារស់នៅពេញដី
មច្ឆាតូចធំរស់ជុំសុខី
ហិចហែលសេរីតាមចិត្តវាចង់។
៣/ព្រឹក្សព្រៃបៃតងលូតស្រស់បំព្រង
ព្រៃរបោះស្រោងដុះឈររហង់
សម្រស់ធម្មជាតិល្អល្អះផូរផង់
បក្សីអឺងកងជម្រកមនោរម្យ។
៤/ត្រពាំងបឹងបួរមានទឹកថ្លាខ្យង
ភ្នំជាំជ្រលងពួកសត្វជួបជុំ
ឥឡូវរលាយសត្វជួបទុក្ខធំ
ក្ដុកក្ដួលក្ដៅងំក្រោមដៃទេវតា។
៥/កាលដើមសម្បូរមនុស្សសត្វសុខស្រួល
គ្រានេះប្រែប្រួលហើយជាតិខេមរា
សាបប្រាំពីរឆ្នាំរាស្ត្រទ្រាំឈឺផ្សា
តឹងណែនឱរ៉ានិយាយមិនកើត។
៦/បឹងអូរស្ទឹងព្រែកញែកកើតផ្ទះថ្ម
ធនធានធ្លាក់ក្រពួកអត់កំណើត
បំផ្លាញជាតិខ្លួនឱ្យដៃខាងកើត
អួតខ្លួនល្អឆើតរាស្ត្ររងទុក្ខកម្ម។
៧/អាកាសប្រែប្រួលរាស្ត្ររស់ខ្វះទឹក
សង្គមវរវឹកមន្ត្រីដេកចាំ
បញ្ជារថ្នាក់លើទើបវាសកម្ម
សស្រាក់សស្រាំតម្រូវចិត្តមេ។
៨/ឱផ្ទៃស្រុកខ្មែរប្រែធាតុអស់ហើយ
កែមិនឡើងឡើយនាំគ្នាលក់កេរ
ស្នាដៃដូនតាបន្សល់កូនខ្មែរ
ម្ដេចមិនខំថែបែរខំបំផ្លាញ៕