ពីនេះ ពីនោះ
រឿងខ្លីគួរពិចារណា៖ ហង្ស និងក្ងោក (ភាគ១)
× នៅក្នុងកប៌ូរទ្វីប មានស្រះមួយឈ្មោះបទ្មកេលិ។ នៅក្នុងស្រះនោះ មានរាជហង្សមួយ ឈ្មោះហិរណ្យគក៌អាស្រ័យនៅ។ បក្សីដែលចរទាំងអស់ នៅស្រះនោះ បានព្រមព្រៀងគ្នាអភិសេកហិរណ្យគក៌ លើកឲ្យធ្វើជាស្តេចបក្សី ព្រោះថា៖
២- បើមិនមានព្រះនរបតីជាអ្នកគ្រប់គ្រងដឹកនាំដោយប្រពៃទេ ប្រជាជនទុកដូចជានាវាមិនមានអ្នកកាន់ចង្កូត និងវង្វេងលិចលង់ក្នុងជលធី។
៣- ព្រះនរបតីគ្រប់គ្រងរក្សាប្រជាជន ប្រជាជនធ្វើឲ្យរីកចម្រើនព្រះនរបតី
ក្នុងថ្ងៃមួយ រាជហង្ស កំពុងសម្រាកកាយលើបល្ល័ង្កឈូក ដ៏ពិសាលមានបរិពារចោមរោមគាល់ត្រៀបត្រា។ កាលនោះ កុកឈ្មោះ ទីឃ៌មុខ ត្រឡប់មកដល់ពីបរទេស ចូលទៅជិតហើយអង្គុយប្រណព្យ។ រាជហង្សសួរថា៖«ហៃទីឃ៌មុខ! អ្នកទើបមកពីបរទេស ចូរនិយាយរឿងអ្វីប្លែកឲ្យយើងស្តាប់បន្តិចមើល!»។ កុកឆ្លើយប្រាប់ថា៖«ទេវៈ! មានរឿងប្លែកចម្លែកធំណាស់ ព្រោះហេតុនោះ ទើបខ្ញុំបាទវិលត្រឡប់មកដោយរហ័សដើម្បីជម្រាបដំណឹង សូមលោកម្ចាស់ស្តាប់ដូចសេចក្តីតទៅនេះ៖
នៅក្នុងជម្ពូទ្វីប មានបពិតមួយឈ្មោះ វិន្ធ្យៈ ជាទីអាស្រ័យនៅរបស់ក្ងោក ជាស្តេចបក្សីជលចរឈ្មោះចិត្រពណ៌។ កាលខ្ញុំបាទហើរត្រាច់ស្វះស្វែងរកចំណីអាហារនៅក្នុងព្រៃភ្លើងឆេះមួយកន្លែង។ ខ្ញុំបានជួបបរិវារស្តេចក្ងោកនោះ។ បរិវារស្តេចក្ងោកសួរខ្ញុំបាទថា៖ «អ្នកជាអ្វី? អ្នកមានការអ្វី? ទៅណាបានជាមកកាន់ទីនេះ?»។ កាលនោះ ខ្ញុំបាទឆ្លើយប្រាប់ទៅវិញថា៖«ខ្ញុំជាបរិវាររាជហង្ស ឈ្មោះហិរណ្យគភ៌ ជាស្តេចចក្រពត្រាធិរាជនៃកប៌ូរទ្វីប។ ខ្ញុំមកនេះដើម្បីដើរមើលក្រុងនានានៃប្រទេសទាំងឡាយ»។ បក្សីជាបរិវារស្តេចក្ងោកបានស្តាប់ពាក្យខ្ញុំបាទហើយ សួរតទៀតថា៖ «ចុះប្រទេសទាំងពីរ គឺប្រទេសអ្នក និងប្រទេសខ្ញុំ តើប្រទេសមួយណាគ្រាន់បើជាង? ស្តេចណាគ្រាន់បើជាងស្តេចណា?»។
ខ្ញុំបាទឆ្លើយថា៖«អា! ដូចម្តេចក៏ហ៊ានសួរដូច្នេះ?ផ្សេងខុសគ្នាធំណាស់! ប្រទេសស្តេចខ្ញុំ ល្អហើយធំណាស់ផង ព្រោះកប៌ូរទ្វីបទុកដូចជាស្ថានសួគ៌ រាជហង្សទុកដូចព្រះឥន្ទ្រាធិរាជជាស្តេចឋានសួគ៌ទីពីរ។ អ្នកទាំងឡាយនៅក្នុងនេះ ដីក្រៀមក្រោះឥតជីជាតិ មានតែដីភ្លើងឆេះរលីងធេងហេងហាងយ៉ាងនេះនៅម្តេចកើត? មក!ចូរទៅនៅក្នុងប្រទេសយើងជាមួយយើងទៅ»។ បក្សីបរិវារស្តេចក្ងោកបានឮពាក្យខ្ញុំបាទហើយ ទាំងអស់គ្នាក៏ក្រេវក្រោធក្រឡោតខឹងក្រៃលែង ព្រោះថា៖
៤- ការឲ្យភុជង្គនាគផឹកទឹកដោះ បាននាំឲ្យចម្រើនពិសកាចបន្ថែមឡើងទៀតតែប៉ុណ្ណោះ។ ឧបទេសដែលគេឲ្យដល់មនុស្សល្ងង់ក្រេវក្រោធច្រើន មិនបានសេចក្តីស្ងប់ទេ បានតែក្រោធថែមទៀត។
៥- មានតែអ្នកប្រាជ្ញទេ បុគ្គលគប្បីឲ្យឧបទេសបាន សត្វបក្សីកាលឲ្យឧបទេសដល់ស្វាល្ងង់ ត្រូវស្វាបោចរោចសម្បុកចោលហិនហោចអស់។
រាជហង្សសួរថាៈ «ចុះរឿងនោះ តើដូចម្តេច?»។ កុកទីឃ៌មុខនិយាយរឿងរ៉ាវនោះប្រាប់ថា៖(តាមដានភាគបន្ត)
ប្រភព៖ «ស្រីហិតោបទេសភាគ៣» បកប្រែពីភាសាសំស្ក្រឹតដោយ ភិក្ខុ ប៉ាង ខាត់
© រក្សាសិទ្ធិដោយ thmeythmey.com