បើសិនជាអ្នក ធ្លាប់មានបញ្ហារាគរូស ច្រើនជាងបីដងក្នុងមួយថ្ងៃ អ្នកមានអាការៈជំងឺរាគស្រួចស្រាវហើយ។ ការរាគក្នុងពេលមានផ្ទៃពោះ គឺជារឿងកើតមានជាញឹកញាប់។ យ៉ាងណាមិញ ជំងឺរាគនេះ មិនមែនមានន័យថា មានអ្វីទាក់ទងនឹងការមានផ្ទៃពោះរបស់អ្នកឡើយ។
ការរាគ មិនទាក់ទងនឹងការមានផ្ទៃពោះ ៖
វីរុស
បាក់តេរី
ឈឺក្រពះ
ព្រូន ឬសត្វល្អិតក្នុងពោះវៀន
ពុលអាហារ
ការប្រើប្រាស់ថ្នាំ.
មានជំងឺមួយចំនួន ក៏អាចធ្វើឲ្យកើត ជាការរាគរូសជាញឹកញាប់ដែរ ដូចជា ជំងឺរលាកពោះវៀន ជំងឺរលាកពោះវៀនធំ ជំងឺ Celiac និងរលាកនិងដំបៅពោះវៀន (Ulcerative Colitis)។
ការរាគ ដែលទាក់ទងនឹងការមានផ្ទៃពោះ ៖
ការផ្លាស់ប្តូររបបអាហារ
ស្ត្រីជាច្រើន បានផ្លាស់ប្តូររបបអាហារយ៉ាងខ្លាំងក្លា នៅពេលពួកគេដឹងថា ខ្លួនឯងមានផ្ទៃពោះ។ ការផ្លាស់ប្តូរភ្លាមៗបែបនេះ អាចនឹងធ្វើឲ្យក្រពះមានបញ្ហា និងបង្កជាការរាគទៅ។
ញ៉ាំអាហារថ្មីមិនបាន
ក្រៅពីពោះធំហើយនោះ ស្ត្រីមានផ្ទៃពោះ អាចនឹងមានការប្រែប្រួល រាងកាយច្រើនបន្ថែមទៀត។ ការញ៉ាំអាហារថ្មីមិនបាន ក៏អាចកើតមានដែរ។ អាហារដែលអ្នកមិនធ្លាប់ញ៉ាំពីមុន ហើយបែរជាញ៉ាំក្នុងពេលមានផ្ទៃពោះ នឹងធ្វើឲ្យកើតជាខ្យល់ ច្រើនក្នុងពោះវៀន ឈឺក្រពះ និងរាគថែមទៀតផង។
ការប្រើវីតាមីន ក្នុងពេលមានផ្ទៃពោះ
ការប្រើថ្នាំវីតាមីន ក្នុងពេលមានផ្ទៃពោះ គឺជារឿងសំខាន់សម្រាប់សុខភាព និងការលូតលាស់របស់ទារក។ យ៉ាងណាមិញ វីតាមីនទាំងនេះ អាចនឹងធ្វើឲ្យក្រពះឈឺ និងបង្កការរាគរូសដែរ។
បម្រែបម្រួលអ័រម៉ូន
អ័រម៉ូន ប្រហែលជាធ្វើឲ្យប្រព័ន្ធរំលាយអាហារ ធ្វើការយឺតជាងមុន ដូច្នេះ ការទល់លាមក អាចជាបញ្ហាមួយក្នុងរឿងនេះដែរ។ អ័រម៉ូន ក៏អាចបង្កើនល្បឿន ដល់ប្រព័ន្ធរំលាយអាហារ ដូច្នេះ បង្កជាការរាគរូសតែម្តងទៅ។
ទោះបីជាយ៉ាងណាក៏ដោយ ការរាគរូសនេះ ភាគច្រើន កើតឡើងនៅក្នុងពេលត្រីមាសទីបី នៃការមានផ្ទៃពោះ។
ករណីរាករូសក្នុងពេលមានផ្ទៃពោះនេះ ភាគច្រើន គឺនឹងបាត់ទៅវិញដោយខ្លួនឯង ក្នុងរយៈពេលពីរបីថ្ងៃក្រោយ ព្រោះថាមូលហេតុរបស់វា ច្រើនតែទាក់ទងនឹងការពុលអាហារ បង្កឡើងដោយវីរុស ឬបាក់តេរី។ ដូច្នេះ គួរតែធ្វើយ៉ាងណាញ៉ាំទឹក ឲ្យបានគ្រប់គ្រាន់។
បើសិនការប្រើប្រាស់ថ្នាំរបស់អ្នក កំពុងតែបង្កជាការរាគ រាងកាយនឹងផ្លាស់ប្តូរទៅតាមគ្នា ដើម្បីបញ្ឈប់ការរាគវិញ នៅពេលអ្នកប្តូរថ្នាំផ្សេង។ តែបើសិនជាប្តូរហើយ នៅតែមិនបាត់ទៀត វាគួរតែដល់ពេល ពិគ្រោះជាមួយគ្រូពេទ្យហើយ។
មានអាហារជាច្រើន ដែលធ្វើឲ្យការរាគកាន់តែធ្ងន់ធ្ងរ ដូចជា អាហារសម្បូរខ្លាញ់ អាហារចៀន អាហារហឹរ ទឹកដោះគោ និងអាហារមានជាតិសរសៃច្រើន។ ដូច្នេះ បើសិនជាអ្នកមានអាការៈរាគហើយ អ្នកគួរតែចៀសវាង អាហារទាំងនេះសិនទៅ៕
ត្រួតពិនិត្យដោយ www.health.com.kh