ក្រសួងមហាផ្ទៃអំពាវនាវឲ្យពលរដ្ឋអាយុ១៥ឡើង ធ្វើអត្តសញ្ញាណប័ណ្ណគំរូថ្មី

ជាតិ

ក្រសួងមហាផ្ទៃអំពាវនាវឲ្យពលរដ្ឋអាយុ១៥ឡើង ធ្វើអត្តសញ្ញាណប័ណ្ណគំរូថ្មី

17, May 2016 , 7:39 pm

រូបភាព

ដោយ:

ភ្នំពេញ៖ បន្ទាប់ពីសង្កេតឃើញការស្នើសុំបែបបទសុំអត្តសញ្ញាណប័ណ្ណរបស់ប្រជាពលរដ្ឋមានការថយចុះ អគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃ បានចេញសេចក្តីអំពាវនាវដល់ពលរដ្ឋ ដែលមានអាយុចាប់ពី១៥ឆ្នាំឡើងទៅ ឲ្យទៅធ្វើអត្តសញ្ញាណប័ណ្ណគំរូថ្មី នៅតាមស្ថានីយ៍ចល័តក្នុងភូមិឃុំដែលខ្លួនរស់នៅ ឬប៉ុស្តិ៍នគរបាលរដ្ឋបាលឃុំសង្កាត់ និងឬអធិការដ្ឋាននគរបាលក្រុង ស្រុក ខ័ណ្ឌ។

សេចក្តីអំពាវនាវរបស់អគ្គនាយកដ្ឋានអត្តសញ្ញាណកម្ម ចុះផ្សាយថ្ងៃទី១៦ ខែឧសភា ឆ្នាំ២០១៦ បានសរសេរថា ការចូលរួមពីប្រជាពលរដ្ឋក្នុងការធ្វើអត្តសញ្ញាណប័ណ្ណកន្លងមក ធ្វើឲ្យអគ្គនាយកដ្ឋានអត្តសញ្ញាណកម្ម បានធ្វើអត្តសញ្ញាណប័ណ្ណគំរូថ្មីជូនពលរដ្ឋ ប្រមាណ៨លាន២សែនអត្តសញ្ញាណប័ណ្ណ ប៉ុន្តែ ក្នុងពេលថ្មីៗនេះ អគ្គនាយកដ្ឋានអត្តសញ្ញាណកម្ម សង្កេតឃើញ មានការថយចុះនៃចំនួនពលរដ្ឋក្នុងការស្នើសុំអត្តសញ្ញាណប័ណ្ណ។

សេចក្តីអំពាវនាវដដែលសរសេរថា«អគ្គនាយកដ្ឋានអត្តសញ្ញាណកម្មអំពាវនាវដ៏ទទួចដល់ប្រជាពលរដ្ឋខ្មែរទាំងពីរភេទ ដែលមានអាយុចាប់ពី១៥ឆ្នាំឡើងទៅ ដែលមិនទាន់មានអត្តសញ្ញាណប័ណ្ណគំរូថ្មី មេត្តាសុំអញ្ជើញទៅបំពេញបែបបទសុំផ្តល់អត្តសញ្ញាណប័ណ្ណគំរូថ្មី នៅតាមស្ថានីយ៍ចល័តក្នុងភូមិឃុំដែលខ្លួនរស់នៅ ឬប៉ុស្តិ៍នគរបាលរដ្ឋបាលឃុំសង្កាត់ និងឬ អធិការដ្ឋាននគរបាលក្រុង ស្រុក ខ័ណ្ឌ តាមការជូនដំណឹងរបស់អាជ្ញាធរមានសមត្ថកិច្ចឲ្យបានគ្រប់ៗគ្នា»។

ចំពោះករណី អ្នកមានអត្តសញ្ញាណប័ណ្ណថ្មី តែរបកខូច សូមទាក់ទងទៅនគរបាលរដ្ឋបាលឃុំសង្កាត់ ឬអធិការដ្ឋានក្រុងស្រុកខ័ណ្ឌដែលខ្លួនរស់នៅ ឬអាចអញ្ជើញមកនាយកដ្ឋានអត្តសញ្ញាណប័ណ្ណសញ្ជាតិខ្មែរដោយផ្ទាល់ ដើម្បីបោះពុម្ពថ្មីដោយមិនយកកម្រៃសេវានោះទេ។

សូមបញ្ជាក់ថា ចំពោះប្រជាពលរដ្ឋដែលបានបំពេញបែបបទសុំអត្តសញ្ញាណប័ណ្ណសញ្ជាតិខ្មែររួច ហើយលើសពី៣០ថ្ងៃនៃថ្ងៃធ្វើការ តែនៅមិនទាន់ទទួលបានអត្តសញ្ញាណប័ណ្ណ អាចស្វែងរកព័ត៌មានតាមរយៈគេហទំព័ររបស់អគ្គនាយកដ្ឋានអត្តសញ្ញាណកម្ម ដែលមានអាសយដ្ឋាន www.idc.gdi.gov.kh ឬហ្វេសប៊ុក www.facebook/gdi.gov.kh ឬតាមរយៈលេខទូរស័ព្ទ៖ ០១២២៥៨៨៥៨/០១២៨៨០៩៩០/០១៦៨០៨០២០៕