ជាតិ
គួរប្រើទង់ជាតិខ្មែរឲ្យមានការឯកភាពជាតិ!
× លិខិតមិត្តអ្នកអាន លោក រត្ន័ សណ្ដាប់
ទង់ជាតិ គឺជាទង់តំណាងឲ្យជាតិដែលបញ្ជាក់ពីអធិបតេយ្យ បូរណភាពទឹកដី វប្បធម៌ ប្រពៃណី សាសនារបស់ជាតិសាសន៍នីមួយៗ ដើម្បីឲ្យចងចាំ និងការពារជាតិកំណើតរបស់ខ្លួនឲ្យបានគង់វង្សតរៀងទៅ។
ព្រោះតែហេតុនេះហើយទើបទង់ជាតិដែលត្រូវយកមកគោរព គឺចាំបាច់ត្រូវមានក្បួនខ្នាតត្រឹមត្រូវហ្មត់ចត់ណាស់ ពីព្រោះជាគ្រឿងសម្គាល់ដ៏ឧត្ដុង្គឧត្ដមចំពោះជាតិ អ៊ីចឹងហើយទើបទង់ជាតិ ត្រូវបានកំណត់ក្នុងរដ្ឋធម្មនុញ្ញ ដែលជាច្បាប់កំពូលរបស់ប្រទេស បានន័យថា គឺគេមិនត្រូវយកទង់ជាតិ មកកែច្នៃឬធ្វើអ្វីឲ្យខុសពីទម្រង់ដើមដែលបានកំណត់ក្នុងរដ្ឋធម្មនុញទ្បើយ។
ស្ថិតក្នុងបរិការនេះ អ្វីដែលគួរឲ្យចាប់អារម្មណ៍នោះ គឺទង់ជាតិដែលបានកំណត់ ក្នុងរដ្ឋធម្មនុញ្ញនៃព្រះរាជាណាចក្រកម្ពុជាឆ្នាំ១៩៩៣ ដែលសព្វថ្ងៃបាននឹងកំពុងបោះពុម្ភប្រើប្រាស់ និងផ្សព្វផ្សាយជាសាធារណៈ យើងឃើញថា មានចំនួនច្រើនទ្បើងៗ ហាក់មានទម្រង់មិនដូចគ្នាសោះ។ ក្នុងនោះចំណុចដែលគួរឲ្យកត់សម្គាល់នៅត្រង់ថា រូបប្រាសាទអង្គរវត្ដខ្លះគេឃើញមានកាំជណ្ដើរ រូបប្រាសាទអង្គរវត្ដខ្លះទៀតអត់កាំជណ្ដើរ រូបប្រាសាទអង្គរវត្ដខ្លះមានឆ្នូតពណ៌ខ្មៅ និងរូបប្រាសាទអង្គរវត្ដខ្លះទៀតមានឆ្នូតពណ៌ក្រហម ជាដើម។
ឆ្លើយតបនិងបញ្ហានេះ ខ្ញុំ(រត្ន័ សណ្ដាប់) ជាអ្នកស្រាវជ្រាវនិងបោះពុម្ភផ្សាយសៀវភៅស្ដីពី ប្រវត្ដិទង់ជាតិ ភ្លេងជាតិ នគររាជ សូមបញ្ជាក់ថា ទង់ជាតិខ្មែរគឺមានសណ្នានបួនជ្រុងទ្រវែងតាមខ្នាតអន្ដរជាតិ ហើយមានពណ៌ខៀវអមពណ៌ក្រហម ឆួតបណ្ដោយស្របគ្នាលើផ្ទៃទង់ គឺពណ៌ខៀវឆួតលើគែមសង្ខាង ដោយទំហំនីមួយៗ ប្រមាណ១ភាគ៤ អមពណ៌ក្រហម ដែលមានទំហំប្រមាណ២ភាគ៤ នៅកណ្ដាល។ នៅលើផ្ទៃពណ៌ក្រហមនេះ មានរូបប្រាសាទអង្គរវត្ដកំពូលបី ពណ៌ស និងឆួតពណ៌ខ្មៅ នៅចំកណ្ដាល។ ក្នុងបណ្ដាលពណ៌ទាំងបីនេះ មានអត្ថន័យដូចតទៅ៖ ពណ៌ខៀវ តាងសេចក្ដីរុងរឿងថ្លៃថ្នូរ សុចរិត យុត្ដិធម៌ស្មោះត្រង់របស់ជាតិ រីឯពណ៌ក្រហម តាងសេចក្ដី អង់អាចក្លាហាន ឆន្ទៈមោះមុតរបស់ជាតិ ហ៊ានប្រយុទ្ធនិងធ្វើពលីកម្មគ្រប់បែបយ៉ាង ដើម្បីការពារជាតិ មាតុភូមិ ដែលតាងដោយប្រាសាទអង្គរវត្ដកំពូលបី ពណ៌ស ជានិមិត្ដរូបនៃសេចក្ដីបរិសុទ្ធ បញ្ញាញាណទេពកោសល្យ ត្រដុមត្រដោម អរិយធម៌ ត្រចេះត្រចង់បូរណភាពទឹកដី ឯករាជ្យ អធិបតេយ្យរបស់ជាតិ។
ជារួមបើនិយាយពីការប្រើប្រាស់ និងការគោរពទង់ជាតិគឺជាការបញ្ជាក់ប្រាប់ពីការគោរពដឹងគុណដល់បុព្វបុរសដែលបានការពារទឹកដីពីមួយជំនាន់ទៅមួយជំនាន់។ ហេតុនេះ ខ្ញុំ (រត្ន័ សណ្ដាប់) ក៏សូមអំពាវនាវឲ្យអ្នកបោះពុម្ភនិងប្រើប្រាស់ទង់ជាតិ ទាំងអស់ត្រូវគោរពតាមក្បួនខ្នាតឲ្យបានត្រឹមត្រូវដើម្បីបង្ហាញពីការឯកភាពជាតិ៕
សូមបញ្ជាក់ថា រូបទី១ និងទី២ គឺជារូបទង់ជាតិដែលគ្មានក្បួនខ្នាតត្រឹមត្រូវ ហើយរូបទី៣ គឺជារូបត្រឹមត្រូវ។
© រក្សាសិទ្ធិដោយ thmeythmey.com