ជាតិ
សេដ្ឋកិច្ច
ផលិតផល«ចានធ្វើពីស្រទបស្លា» គ្រោងចូលទីផ្សារក្នុងពេលឆាប់ៗ
× ភ្នំពេញ៖ ក្រុមហ៊ុនអេធីយូនីវើស ដែលជាក្រុមហ៊ុនផលិត«ចានធ្វើពីស្រទបស្លា»ដំបូងគេនៅកម្ពុជា នឹងចាប់ផ្តើមចែកចាយផលិតផលរបស់ខ្លួននៅចុងខែឧសភាខាងមុខនេះ។ លោក អុន បឿន ប្រធានគ្រប់គ្រងការផលិត មានប្រសាសន៍ថា ជំហ៊ានដំបូង ក្រុមហ៊ុននឹងនាំផលិតផលរបស់ខ្លួនចូលទីផ្សារក្នុងស្រុក និងប្រទេសកូរ៉េខាងត្បូង។ លោកអះអាងថា ចានស្រទបស្លានេះ គឺជាផលិតផលធម្មជាតិ មិនបង្ករផលប៉ះពាល់សុខភាពដល់អ្នកប្រើប្រាស់ឡើយ។
«ចានធ្វើពីស្រទបស្លា» ដែលជាផលិតផលលើកដំបូងនៅកម្ពុជា នឹងទៅដល់ទីផ្សារក្នុងចុងខែឧសភាខាងមុខនេះ។ ក្រៅពីទីផ្សារក្នុងស្រុក ប្រទេសកូរ៉េ គឺជាទីផ្សារក្រៅប្រទេសទីមួយ ដែលក្រុមហ៊ុនអេធីយូនីវើស គ្រោងនាំចេញ។ នេះបើតាមលោក អុន បឿន ប្រធានគ្រប់គ្រងការផលិត។ លោកបន្ថែមថា ក្រុមហ៊ុនអាចផ្គត់ផ្គង់ចានស្រទបស្លានេះពីចំនួន ២ពាន់ ទៅ ៣ពាន់ចានក្នុងមួយថ្ងៃ ដែលជាជំហ៊ានដំបូងរបស់ក្រុមហ៊ុន។
លោក អុន បឿន ថ្លែងប្រាប់សារព័ត៌មានថ្មីៗ នៅថ្ងៃទី២០ខែឧសភាថា ផលិតផលចានស្រទបស្លានេះ មាន៥ប្រភេទ ដែលអាចឲ្យអតិថិជន ប្រើសំរាប់ដាក់អាហារបានច្រើនបែប។ ចំពោះការប្រើប្រាស់ចានស្រទបស្លានេះ លោកបញ្ជាក់ថា ជាធម្មតា គេប្រើប្រាស់វាតែម្តងគត់ ព្រោះថាបើគេលាងវាទុកប្រើពេលក្រោយ នោះវានឹងរីក។
«យើងច្នៃវត្ថុដែលគេបោះចោល ទៅជាវត្ថុដែលមានតម្លៃ។ យើងជួយបង្កើតប្រាក់ចំណូលដល់ពលរដ្ឋ»។ នេះជាការលើកឡើងរបស់លោក អុន បឿន អំពីមូលហេតុនៃការបង្កើតសិប្បកម្មផលិតចានស្រទបស្លានេះឡើង។ លោកបន្តយ៉ាងដូច្នេះទៀតថា៖«យើងផ្តល់នូវផលិតផល ដែលមិនប៉ះពាល់សុខភាពដល់អ្នកប្រើប្រាស់។ វាជាផលិតផលធម្មជាតិ។ ពេលប្រើវារួច វានឹងក្លាយជាជីទៀតផង»។
ក្រុមហ៊ុនអេធីយូនីវើស គឺជាការបណ្តាក់ទុនរួមគ្នារវាងវិនិយោគគិនខ្មែរ និងកូរ៉េ ដែលមានបុគ្គលិកចំនួន ២២ នាក់។ ហើយក្រុមហ៊ុននេះ មានរោងចក្រផលិតចាន ដែលមានទីតាំងក្នុងខេត្តត្បូងឃ្មុំ ដែលជាកន្លែងផ្គត់ផ្គង់វត្ថុធាតុដើម ពោលគឺស្រទបស្លាដ៏សំខាន់។
ទោះយ៉ាងណាលោក អុន បឿន ដែលជាសហស្ថាបនិកមួយរូបនៃក្រុមហ៊ុនអេធីយូនីវើស មិនបានបញ្ចេញពីតម្លៃផលិតផលរបស់ខ្លួនឡើយ ដោយលោកប្រាប់ថា ខាងក្រុមហ៊ុននឹងចរចាពីបញ្ហាតម្លៃនេះជាមួយអាជីវករទៅតាមភាពជាក់ស្តែង។ ជាមួយគ្នានេះ ចំនួនដើមទុន ដែលក្រុមហ៊ុនបានបោះទុន ក៏លោកសុំមិនបញ្ចេញជាសាធារណៈផងដែរ។
លោក អុន បឿន ឲ្យដឹងបន្ថែមទៀតថា ក្រៅពីទីផ្សារកម្ពុជា និងកូរ៉េ ក្រុមហ៊ុនរបស់លោកមានបំណងនាំចេញផលិតផលរបស់ខ្លួនទៅទីផ្សារបរទេសមួយចំនួនទៀត បើសិនណាជាមានការគាំទ្រ។ លោកសង្កត់ធ្ងន់ថា អតិថិជនគោលដៅរបស់ផលិតផលចានស្រទបស្លានេះ គឺអ្នកដែលស្រលាញ់បរិស្ថាន៕
© រក្សាសិទ្ធិដោយ thmeythmey.com