អន្តរជាតិ
នយោបាយអន្តរជាតិ
លោក អូបាម៉ា គាំទ្រលោកស្រី ហ៊ីឡារី គ្លីនតុន ជាផ្លូវការ ខណៈលោក សេនដឺត្រៀមចាកចេញ
× ចុងក្រោយ លោក បារ៉ាក់ អូបាម៉ា ចេញមុខគាំទ្រលោកស្រី ហ៊ីឡារី គ្លីនតុនជាផ្លូវការនៅថ្ងៃព្រហស្បតិ៍ទី ៩ខែមិថុនា។ លោកថា លោកស្រី ហ៊ីឡារី គ្លីនតុន មានសមត្ថភាពនិងលក្ខណៈសម្បត្តិជាប្រធានាធិបតី ហើយលោកអំពាវនាវឲ្យអ្នកគាំទ្របក្សប្រជាធិបតេយ្យនិងលោកផ្ទាល់គាំទ្រលោកស្រីផងដែរ។
បន្ទាប់ពីលោកជួបពិភាក្សាជាមួយសមាជិកព្រឹទ្ធសភារដ្ឋ Vermont និងជាគូប្រជែងដ៏ស្វិតស្វាញរបស់លោកស្រី ហ៊ីឡារីគ្លីនតុន គឺលោក ប៊ែនី សេនដឺ លោក បារ៉ាក់ អូបាម៉ា ក៏ចាប់ផ្តើមប្រកាសគាំទ្រលោកស្រី ហ៊ីឡារី គ្លីនតុន ជាសាធារណតែម្តង។ តាំងពីយូរមកហើយលោក បារ៉ាក់ អូបាម៉ា មិនហ៊ានថ្លែងគាំទ្រសមាជិកម្នាក់ណាពិតប្រាកដឡើយ ព្រោះវាអាចធ្វើឲ្យប៉ះពាល់ដល់អារម្មណ៍បេក្ខជនបក្សប្រជាធិបតេយ្យដូចគ្នា។
យោងតាមសារព័ត៌មាន Politico លោក បារ៉ាក់ អូបាម៉ាថ្លែងថា៖«មើលចុះ ខ្ញុំដឹងថាការងារជាប្រធានាធិបតីនេះអាចលំបាកប៉ុណ្ណា។ នេះហើយជាមូលហេតុដែលខ្ញុំដឹងថា ហ៊ីឡារី គ្លីនតុន នឹងអាចធ្វើវាបាន។ តាមពិតទៅខ្ញុំមិនគិតថា វាមានអ្នកណាម្នាក់មានលក្ខណៈសម្បត្តិក្នុងការកាន់តំណែងនេះទេ។ ប៉ុន្តែលោកស្រី ហ៊ីឡារី គី្លនតុន ប្រាកដជាអាច ព្រោះលោកស្រីមានសេចក្តីក្លាហាន និងចេះគិតគូរពីសុខទុក្ខមនុស្សដទៃពេលសម្រេចការងារធំ»។
ក្រៅពីកោតសរសើរ លោក អូបាម៉ា ក៏បានអំពាវនាវឲ្យអ្នកគាំទ្រលោក និងគណបក្សប្រជាធិបតេយ្យគាំទ្រលោកស្រី ហ៊ីឡារី គ្លីនតុនផងដែរ។ លោកបន្តថា៖ «ដូច្នេះហើយខ្ញុំចង់អ្នកទាំងអស់គ្នាដែលតែងនៅជាមួយខ្ញុំចាប់តាំងពីដើមទីមកឲ្យបានដឹងថា ខ្ញុំឈរនៅជាមួយលោកស្រី ហ៊ីឡារី គី្លនតុន។ ខ្ញុំកំពុងតែអន្ទះសារនិងស្ទើរមិនអាចរង់ចាំការចាកចេញទៅក្រៅ និងចូលរួមការឃោសនានយោបាយសម្រាប់បេក្ខជនប្រធានាធិបតី ហ៊ីឡារី គ្លីនតុន»។
ចំណែក លោក ប៊ែនី សេនដឺ ហាក់ដូចជាត្រៀមខ្លួនចាកចេញរួចទៅហើយ ក្រោយជួបជជែកជាមួយលោក បារ៉ាក់ អូបាម៉ា នៅថ្ងៃព្រហស្បតិ៍នេះ។ ប៉ុន្តែលោកនៅតែបញ្ជាក់ថា លោកនឹងបន្តនៅក្នុងយុទ្ធនាការប្រជែងក្នុងបក្សរហូតដល់ការបោះឆ្នោតសាកល្បងចុងក្រោយនៅក្រុងវ៉ាស៊ីនតោននៅសប្តាហ៍ក្រោយនេះសិន។ តាមសម្តីរបស់លោកក្នុងពេលថ្លែងសុន្ទរកថាទៅកាន់អ្នកគាំទ្រ សមាជិកព្រឹទ្ធសភា រូបនេះនឹងសហការជាមួយលោកស្រី ហ៊ីឡារី គី្លនតុន ដើម្បីការឯកភាពគ្នាក្នុងបក្ស។
លោកចាញ់ការបោះឆ្នោតសាកល្បងនៅក្នុងរដ្ឋធំៗមួយចំនួនកាលពីថ្ងៃអង្គារជាពិសេសនៅរដ្ឋកាលីហ្វរនីញ៉ាតែម្តង។ ហើយបរាជ័យនេះធ្វើឲ្យក្តីសង្ឃឹមរបស់លោកថានឹងបន្តប្រជែងដោយបញ្ចុះបញ្ចូលឲ្យក្រុមប្រតិភូឯករាជ្យងាកមកគាំទ្រលោកក្នុងពេលសមាជបក្សខែកក្កដាត្រូវរលាយអស់៕
Tag:
បារ៉ាក់ អូបាម៉ា
ហ៊ីឡារីគ្លីនតុន
ប៊ែនីសេនដឺ
© រក្សាសិទ្ធិដោយ thmeythmey.com