កីឡាអន្តរជាតិ
អន្តរជាតិ
Euro2016៖ តួកគីប៉ះក្រូអាស៊ី ប៉ូឡូញជួបអៀរឡង់ខាងជើង អាល្លឺម៉ង់តទល់ជាមួយអ៊ុយក្រែន
× បន្ទាប់ពីពូល A និងពូល B ព្រឹត្តិការណ៍ Euro 2016 ត្រូវឈានដល់ជំនួបបើកឆាកក្នុងពូល C និងពូល D នារាត្រីថ្ងៃអាទិត្យនេះ ដោយ តួកគីប៉ះក្រូអាស៊ី ប៉ូឡូញជួបអៀរឡង់ខាងជើង អាល្លឺម៉ង់តទល់ជាមួយអ៊ុយក្រែន។
តួកគី និង ក្រូអាស៊ី ត្រូវប៉ះគ្នានៅកីឡាដ្ឋាន Parc des Princes នៅទីក្រុងប៉ារីស នាវេលាម៉ោង៨យប់នេះ សម្រាប់ជំនួបបើកឆាកនៅក្នុងពូល D។ ក្រុមទាំងពីរធ្លាប់ជួបគ្នា៦លើក ដោយក្រូអាស៊ីឈ្នះ២លើក និងស្មើ ៤លើក។ ទោះបីជាយ៉ាងណាក៏ដោយ តួកគីមានកំណត់ត្រាល្អមួយនៅវគ្គ១/៤ កាលពី Euro 2008 តាមរយៈការឈ្នះបាល់ប៉េណាល់សម្រេចក្តី។ តួកគីអាចដាក់ក្តីសង្ឃឹមលើ Burak Yilmaz និង Cenk Tosun នៅតំបន់ប្រយុទ្ធ ខណៈក្រូអាស៊ី មានកីឡាករឆ្នើមៗនៅតំបន់បម្រើ ដែលក្នុងនោះ មាន Ivan Rakitic, Luka Modric រួមទាំងខ្សែប្រយុទ្ធ Mario Mandzukic និងប្រធានក្រុម Darijo Srna។
នៅវេលាម៉ោង១១យប់ ប៉ូឡូញ និងអៀរឡង់ខាងជើង ត្រូវបើកការប្រកួតនៅក្នុងពូល C នៅកីឡដ្ឋាន Allianz Riviera។ អៀរឡង់ខាងជើងត្រូវបង្ហាញខ្លួនជាលើកដំបូងក្នុងព្រឹត្តិការណ៍ដ៏ធំនេះ បន្ទាប់ពីពួកគេធ្លាប់មានវត្តមាននៅ World Cup កាលពីឆ្នាំ១៩៨៦ ។ ក្រុមរបស់លោក Michael O’Neill ទទួលបាននូវការកត់សម្គាល់ខ្ពស់តាមរយៈការមិនស្គាល់ចាញ់១២ប្រកួត ខណៈប៉ូឡូញមានគ្រាប់បាល់បញ្ចូលទីសរុបរហូតដល់ទៅ៣៣គ្រាប់នាការប្រកួតជម្រុះ។ ប៉ូឡូញមានកីឡាករឆ្នើមដូចជា Robert Lewandowski, អ្នកចាំទី Wojciech Szczesny ខណៈអៀរឡង់ខាងជើងមាន ដូចជា Jonny Evans, Chris Baird, Steven Davis ។
សម្រាប់ការប្រកួតមួយគូទៀតនៅក្នុងពូល C អាល្លឺម៉ង់ ត្រូវតទល់ជាមួយអ៊ុយក្រែន នាវេលាម៉ោង២អាធ្រាត្រ នៅកីឡដ្ឋាន Stade Pierre-Mauroy។ អាល្លឺម៉ង់មិនដែលចាញ់អ៊ុយក្រែននោះឡើយ នាជំនួប៥លើកកន្លងមក ដោយឈ្នះ២ ស្មើ៣ ប៉ុន្តែនេះជាជំនួបលើកដំបូងបំផុតសម្រាប់ពួកគេក្នុងព្រឹត្តិការណ៍ដ៏ធំ។ ខ្សែការពារអាល្លឺម៉ង Mats Hummels មិនទាន់ប្រាកដថាបានចូលលេងនោះឡើយ ដោយសារបញ្ហារបួស ប៉ុន្តែនៅតំបន់ប្រយុទ្ធ ពួកគេមានកម្លាំងពេញ ជាពិសេស Thomas Muller។ គ្រូបង្វឹកអ៊ុយក្រែន លោក Mykhailo Fomenko រំពឹងថា ជំនួបជាមួយម្ចាស់ជើងឯក World Cup នឹងផ្តល់នូវការប្រកួតប្រកបដោយគុណភាព។
សម្រាប់លទ្ធផលនៃការប្រកួតបើកឆាកសរុបនៅក្នុងពូល A ម្ចាស់ផ្ទះបារាំងឈរលេខមួយបណ្តោះអាសន្ន ក្រោយជ័យជម្នះ ២-១ លើរូម៉ានី រីឯស្វ៊ីស ឈរលេខ២ ក្រោយយកឈ្នះអាល់បានី ១-០ ។ នៅក្នុងពូល B វេលស៍ បាន៣ពិន្ទុពេញ តាមរយៈជ័យជម្នះ ២-១ លើស្លូវ៉ាគី មុនពេល រុស្ស៊ី តាមវាយបកអង់គ្លេស ដើម្បីបញ្ចប់លទ្ធផល ១-១ កាលពីរាត្រីថ្ងៃសៅរ៍ ឈានចូលថ្ងៃអាទិត្យ៕
© រក្សាសិទ្ធិដោយ thmeythmey.com