ស្ថានីយ៍បោះឆ្នោតនៅទូទាំងចក្រភពអង់គ្លេស បានបិទអស់ហើយ ក្នុងការធ្វើប្រជាមតិលើអនាគតរបស់ប្រទេសនេះជាសមាជិកអឺរ៉ុប។ លទ្ធផលផ្លូវការបង្ហាញថា ក្រុមអ្នកគាំទ្រ«ការចាកចេញ»ទទួលជោគជ័យ លើក្រុមដែលគាំទ្រអង់គ្លេសឲ្យបន្តជាសមាជិកសហភាពអឺរ៉ុប យ៉ាងប្រផិតប្រផើយបំផុត ។ លោក ដេវីដ ខេមេរ៉ូន ប្រកាសចេញពីតំណែង ហើយសហភាពអឺរ៉ុបព្រមានថា បើអង់គ្លេសចាកចេញហើយ គ្មានផ្លូវត្រលប់មកវិញ។
ទីបំផុត ពលរដ្ឋចក្រភពអង់គ្លេស បានសម្រេចចាកចេញពីសហភាពអឺរ៉ុបហើយ ក្នុងការធ្វើប្រជាមតិថ្ងៃទី២៣ ខែមិថុនា។ អ្នកបោះឆ្នោតចំនួន៥១.៩ភាគរយ បានបោះឆ្នោតគាំទ្រក្រុមចាកចេញពីតំបន់អឺរ៉ុប ខណៈពលរដ្ឋចំនួន៤៨.១ភាគរយ បោះឆ្នោតគាំទ្របន្តជាសមាជិកសហភាពអឺរ៉ុប ក្នុងចំណោមអ្នកដែលទៅបោះឆ្នោតសរុបមានចំនួន៧១.៩ភាគរយ នៃចំនួនអ្នកចុះឈ្មោះបោះឆ្នោតសរុប។
សម្រាប់លទ្ធផល ដែលបានរាប់ហើយនោះ គេសង្កេតឃើញថា ការចាកចេញពីអឺរ៉ុប មិនបានជោគជ័យធំធេងនោះទេ។ បើតាមសារព័ត៌មាន BBC មកទល់ពេលនេះ លទ្ធផលរាប់សន្លឹកឆ្នោតចេញពីស្រុកទាំង៣៨២តំបន់ បង្ហាញថា ក្នុងចំណោមអ្នកទៅបោះឆ្នោត ជិត៣៣លាននាក់ ក្រុមគាំទ្របន្តជាសមាជិកអឺរ៉ុប ទទួលបានសំឡេងចំនួនជាង១៦លាននាក់ ខណៈចលនាគាំទ្រការចាកចេញ ទទួលសំឡេងចំនួនលើស១៧លាននាក់។
ប្រមុខគណបក្សអង់គ្លេសឯករាជ្យ (UKIP) លោក Nigel Farage បានប្រកាសអបអរសាទរចំពោះជ័យជម្នះនេះ ក្នុងកម្មវិធីនៅក្រុងឡុងដ៍។ ប្រមុខគណបក្សរូបនេះ ដែលគាំទ្រការចាកចេញពីអឺរ៉ុប និយាយថា ថ្ងៃបានរះលើចក្រភពអង់គ្លេសឯករាជ្យ ហើយថ្ងៃទី២៣ នឹងត្រូវចារក្នុងប្រវត្តិសាស្ត្រ ជាថ្ងៃឯករាជ្យ។ លោក ក៏ស្នើឲ្យនាយករដ្ឋមន្ត្រីអង់គ្លេស លោក ដេវីដ ខេមេរ៉ូន ចាកចេញពីតំណែងភ្លាមៗផងដែរ។
ជាមួយនឹងជ័យជម្នះទាំងប្រផិតប្រផើយសម្រាប់ការចាកចេញនេះ ចក្រភពអង់គ្លេស នឹងក្លាយជារដ្ឋជាសមាជិកអឺរ៉ុបទីមួយ ដែលចាកចេញពីសហភាពអឺរ៉ុប ក្នុងរយៈពេលជាង៦០ឆ្នាំ មកនេះ។ ផលវិបាកនានា រំពឹងនឹងថា កើតឡើងជាបន្តបន្ទាប់ ពីការចាកចេញរបស់ចក្រភពអង់គ្លេស ដែលរួមទាំងបញ្ហាសេដ្ឋកិច្ច និងបញ្ហាជនភៀសខ្លួន ជាដើម។
១.ប្រធានគណៈកម្មការអឺរ៉ុប៖ ចេញគឺចេញ
នៅមុនការបោះឆ្នោតប្រជាមតិបន្តិច មេដឹកនាំអឺរ៉ុប បានព្រមានចក្រភពអង់គ្លេសរួចហើយថា គ្មានផ្លូវអាចបកក្រោយបានទេ បើសិនជាពលរដ្ឋអង់គ្លេស សម្រេចចាកចេញពីសហភាពអឺរ៉ុប។ ពីទីក្រុងព្រុចសែល ប្រធានគណៈកម្មការអឺរ៉ុប លោក Jean-Claude Juncker បញ្ជាក់ច្បាស់ៗថា ចេញគឺចេញហើយ ដែលនេះមានន័យថា អឺរ៉ុបទាត់ចោលឱកាសចរចាណាមួយ ចំពោះសមាជិកភាពរបស់អង់គ្លេសក្នុងសហភាពអឺរ៉ុប។
ថ្លែងបន្ទាប់ពីជំនួបជាមួយអធិការបតីអូទ្រីស លោក Juncker បានផ្ដាំទៅចក្រភពអង់គ្លេសថា មិនមានការចរចាឡើងវិញណាមួយនោះ ហើយអឺរ៉ុប ក៏ផ្ដល់អ្វីៗគ្រប់យ៉ាង ទៅឲ្យនាយករដ្ឋមន្ត្រីអង់គ្លេសរួចអស់ហើយ។ ការលើកឡើងនេះ ត្រូវបានបញ្ជាក់ម្ដងទៀតដោយប្រធានាធិបតីបារាំងលោក ហ្វ្រង់ស្វ័រ ហូឡង់ ដោយលោកអះអាងថា ការចាកចេញរបស់ចក្រភពអង់គ្លេស មិនអាចត្រលប់ក្រោយបានទេ។
ប្រទេសជាសមាជិកទាំង២៧ បានតាមដានការធ្វើប្រជាមតិនេះយ៉ាងយកចិត្តទុកដាក់បំផុត។ នេះក៏ដោយសារតែ ការចាកចេញរបស់អង់គ្លេស ដែលជាសមាជិកមានសេដ្ឋកិច្ចធំជាងគេទីពីរ ពិតជាប៉ះពាល់យ៉ាងខ្លាំងដល់អឺរ៉ុបទាំងមូល។ ហើយគេ ព្រួយបារម្ភថា ការចាកចេញនេះ នឹងក្លាយជាគំរូសម្រាប់ប្រទេសដទៃទៀត ដែលចង់ចាកចេញពីអឺរ៉ុបដែរ ប៉ុន្តែសហភាពអឺរ៉ុប ក៏មិនចេះតែចេញ ឬចូលស្រួលៗ និងតាមចិត្តនោះដែរ។
២. អ្វី នឹងកើតឡើង បន្ទាប់ពីប្រជាមតិនេះ?
ថ្វីត្បិតតែពលរដ្ឋចក្រភពអង់គ្លេសភាគច្រើន បោះឆ្នោតគាំទ្រការចាកចេញពីសហភាពអឺរ៉ុបក៏ដោយ ក៏មិនមានន័យថា ចក្រភពអង់គ្លេស លែងជាសមាជិកសហភាពអឺរ៉ុបនោះទេ។ នៅដំណាក់កាលនេះ ចក្រភពអង់គ្លេស នឹងនៅតែជាផ្នែកមួយនៃសហភាពអឺរ៉ុបដដែល ហើយដំណើការចរចានៃការចាកចេញនេះ នឹងចាប់ផ្ដើមផងដែរ។
យោងតាមមាត្រា៥០ នៃសន្ធិសញ្ញា Lisbon ជំហានបន្ទាប់នោះ គឺចក្រភភពអង់គ្លេស នឹងជូនដំណឹងទៅអឺរ៉ុប ពីការចាកចេញរបស់ខ្លួន។ ទាំងចក្រភពអង់គ្លេស និងសហភាពអឺរ៉ុប ត្រូវចរចាគ្នា ជាមុនសិន ដើម្បីសម្រេចកិច្ចព្រមព្រៀងមួយ ដែលនាំដល់ការចាកចេញនេះ។ យ៉ាងណាមិញ ប្រសិនបើគ្មានកិច្ចព្រមព្រៀង ត្រូវបានសម្រេចទេនោះ គេត្រូវរង់ចាំដល់ទៅពីរឆ្នាំទៅមុខ ទើបច្បាប់ និងបទបញ្ញតិផ្សេងៗ របស់អឺរ៉ុប អស់សុពលភាពអនុវត្តក្នុងទឹកដីចក្រភពអង់គ្លេសតទៅទៀត។
ជាមួយគ្នានេះ នាយករដ្ឋមន្ត្រី លោក ដេវីដ ខេមេរ៉ូន នឹងចាកចេញពីតំណែងនៅខែតុលាខាងមុខ ព្រោះយុទ្ធនាការគាំទ្របន្តជាសមាជិកសហភាពអឺរ៉ុបរបស់លោក បរាជ័យ។ ទោះចង់នៅបន្តតំណែងក៏ដោយ លោក ខេមេរ៉ូន ច្បាស់ជាត្រូវប្រឈមសម្ពាធខ្លាំងទាំងផ្ទៃក្នុងបក្ស ដែលបែកបាក់ និងពីសំណាក់ប្រជាជន ដែលចង់ឲ្យលោក ចាកចេញពីតំណែង៕