ជាតិ
នយោបាយជាតិ
៥-៦ កក្កដា៖ CPP ថា ឯកឧត្តម សម រង្ស៊ី បង្ខូចកេរ្តិ៍ឈ្មោះសម្ដេច ហ៊ុន សែន
×
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានចាត់ទុកការលើករបស់ឯកឧត្តម សម រង្ស៊ី ដែលចោទសម្ដេច ហ៊ុន សែន ធ្វើរដ្ឋប្រហារសម្ដេចក្រុមព្រះ នរោត្តម រណឫទ្ធិ នោះជាការបង្ខូចកេរ្តិ៍ឈ្មោះប្រមុខរដ្ឋាភិបាល និងគណបក្សប្រជាជនកម្ពុជា។
លោក សុខ ឥសាន ដែលអះអាងថាខ្លួនជាមន្ត្រីម្នាក់ដែលបានស្ថិតនៅក្នុងព្រឹត្តិការណ៍នោះ បានចំអកឲ្យឯកឧត្តម សម រង្ស៊ី ថា កំពុងលើកយកបញ្ហាថ្ងៃ៥-៦ កក្កដា មកបកស្រាយខុសការពិត ដើម្បីកេងចំណេញនយោបាយបក្សប្រឆាំង។ បើតាមលោក សុខ ឥសាន ការផ្ទុះអាវុធថ្ងៃទី ៥-៦ កក្កដា នោះគឺជាការបង្ក្រាបកម្លាំងអនាធិបតេយ្យ។ ថ្លែងប្រាប់សារព័ត៌មានថ្មីៗ អ្នកនាំពាក្យរូបនេះ បានបញ្ជាក់ដូច្នេះថា៖«គាត់(ឯកឧត្តម សម រង្ស៊ី)និយាយខុសពីការពិត ពីព្រោះព្រឹត្តិការណ៍ ៥-៦ កក្កដា កម្លាំងគណបក្សប្រជាជនបោសសំអាតកម្លាំងអនាធិបតេយ្យ ដែលកម្លាំងហ្វ៊ុនស៊ិនប៉ិចចង់បះបោលនាំខ្មែរក្រហមចូលមកកម្ពុជា ដែលកាលនោះសម្ដេចក្រុមព្រះ បាននាំអាវុធរាប់តោនចូលមកតាមកំពង់ផែ ដើម្បីបះបោល»។
ជុំវិញព្រឹត្តិការណ៍ថ្ងៃ ៥-៦ កក្កដានេះដែរ
ឯកឧត្តម សម រង្ស៊ី នៅតែចោទសម្ដេច ហ៊ុន សែន ធ្វើរដ្ឋប្រហារសម្ដេចក្រុមព្រះ។ ប្រមុខបក្សប្រឆាំង ដែលកំពុងគេចខ្លួននៅក្រៅប្រទេសរូបនេះ បានបង្ហោះរូបនាយករដ្ឋមន្ត្រី ហ៊ុន សែន អមដោយសំណេរលើហ្វេសប៊ុកខ្លួនយ៉ាងខ្លីដូច្នេះថា៖«ថ្ងៃនេះនិងថ្ងៃស្អែក គឺជាខួបលើកទី១៩ នៃរដ្ឋប្រហារ ថ្ងៃទី៥-៦ កក្កដាឆ្នាំ១៩៩៧ នៅប្រទេសកម្ពុជា ដែលពេលនោះកងកម្លាំងគណបក្សប្រជាជនកម្ពុជាដឹកនាំដោយលោក ហ៊ុន សែន បានកម្ចាត់កងកម្លាំងប្រដាប់អាវុធគណបក្សហ្វ៊ុនស៊ិនប៉ិច ដឹកនាំដោយលោក ញឹក ប៊ុនឆៃ ។ ព្រះអង្គម្ចាស់នរោត្តម រណឫទ្ធិ នាយករដ្ឋមន្ត្រីស្របច្បាប់ ត្រូវបានគេទម្លាក់ពីតំណែង ក្នុងឱកាសរដ្ឋប្រហារនោះ»៕
© រក្សាសិទ្ធិដោយ thmeythmey.com