ជាតិ
ខ្យល់មូសុងនិរតី កំពុងគ្របដណ្ដប់មកលើប្រទេសកម្ពុជាជាថ្មីម្ដងទៀត
× ភ្នំពេញ៖ ការព្យាករណ៍អាកាសធាតុរបស់កក្រសួងធនធានទឹក និងឧតុនិយម បានឲ្យដឹងថា ខ្យល់មូសុងនិរតី និងជ្រលងសម្ពាធទាប កំពុងបង្កើនឥទ្ធិពលមកលើប្រទេសកម្ពុជាឡើងវិញ ចាប់ពីថ្ងៃទី១២ ដល់១៨ កក្កដា។ ចំពោះស្ថានភាព ទឹកភ្លៀង ក្រសួងព្យាករណ៍ថា អាចបណ្ដាលឲ្យមានភ្លៀងធ្លាក់ពីតិចទៅច្រើន ស្ទើរគ្រប់តំបន់ក្នុងប្រទេសកម្ពុជា។
តាមការព្យាករណ៍អាកាសធាតុរបស់ក្រសួងធនធានទឹក ចាប់ពីថ្ងៃទី១២ ដល់១៨ កក្កដា ប្រទេសកម្ពុជា កំពុងទទួលឥទ្ធិពលពីខ្យល់មូសុងនិរតីឡើងវិញ ដែលបង្កឲ្យមានការប្រែប្រួលអាកាសធាតុនៅតាមតំបន់មួយចំនួន។ ចំពោះតំបន់ខ្ពង់រាប និងតំបន់វាលទំនាប ស្ថានភាពទឹកភ្លៀង អាចនឹងមានភ្លៀងធ្លាក់រាយប៉ាយពីតិច ទៅបង្គួរចាប់ពីថ្ងៃទី១២ ដល់១៨ កក្កដានេះ។
ទន្ទឹមនឹងនេះ នៅតំបន់មាត់សមុទ្រ ក្នុងខេត្តកំពត និងខេត្តកែប ស្ថានភាពទឹកភ្លៀង អាចនឹងមានភ្លៀងធ្លាក់ពីតិចទៅមធ្យម ចាប់ពីថ្ងៃទី១២ ដល់១៨ ខែកក្កដា។ សម្រាប់ខេត្តកោះកុង និងខេត្តព្រះសីហនុ អាចមានភ្លៀងធ្លាក់ពីបង្គួរទៅច្រើន ចាប់ពីថ្ងៃទី១២ ដល់១៤ កក្កដា នឹងអាចមានភ្លៀងធ្លាក់ពីតិចទៅបង្គួរ ចាប់ពីថ្ងៃទី១៥ ដល់១៨ ខែកក្កដា ឆ្នាំ២០១៦។
ក្រសួងធនធានទឹក បានអំពាវនាវដល់ប្រជាពលរដ្ឋឲ្យមានប្រុងប្រយ័ត្នខ្ពស់ ក្នុងតំបន់មាត់សមុទ្រ និងលើផ្ទៃសមុទ្រ មានខ្យល់បក់បោកខ្លាំង ចាប់ពីថ្ងៃទី១២ ដល់១៤ កក្កដា ជាពិសេសខេត្តកោះកុង និងខេត្តព្រះសីហនុ៕
© រក្សាសិទ្ធិដោយ thmeythmey.com