ពីនេះ ពីនោះ
ឃើញថាសុទ្ធតែជាបញ្ហា តែមិនដឹងទៅបន្ទោសអ្នកណា
× ភ្នំពេញ៖ បញ្ហាគ្រប់ប្រភេទបានបង្ហាញខ្លួនជាបន្តបន្ទាប់ ចាប់តាំងពីឈានមួយជំហានរហូតដល់ជំហានចុងក្រោយជារៀងរាល់ថ្ងៃ។ បញ្ហាខ្លះឃើញចំពោះមុខ បញ្ហាខ្លះបានប៉ះផ្ទាល់ បញ្ហាខ្លះដឹងដោយប្រព័ន្ធផ្សព្វផ្សាយ បញ្ហាខ្លះឮតាមត្រចៀក បញ្ហាខ្លះឮពីមហាជន និងមានបញ្ហាជាច្រើនទៀត កើតមានជាប្រចាំនៅក្នុងសង្គម។ បញ្ហាខ្លះត្រូវបានដោះស្រាយ បញ្ហាខ្លះកំពុងដោះស្រាយ បញ្ហាមិនខ្ចីដោះស្រាយ បញ្ហាខ្លះដោះស្រាយដែរតែនៅតែមានបញ្ហា ដឹងហើយ ឮហើយ យល់ហើយ មិនដឹងជាត្រូវបន្ទោសអ្នកណា? នេះប្រហែលជារឿងពិតនៅក្នុងអារម្មណ៍ប្រជាជនបច្ចុប្បន្ន។
សូមចាប់ផ្ដើមពីរឿងថ្នាក់ក្រោមជាតិមកចុះ បញ្ហាកើតមានជាប្រចាំ តាំងពីការគំរាមកំហែង រំលោកសិទ្ធិ ភាពក្រីក្រ ខ្វះលំនៅឋាន បញ្ហាសុខភាព បញ្ហាអប់រំ បញ្ហាសន្តិសុខ បញ្ហាគ្រឿងញៀន បញ្ហាសេពគ្រឿងស្រវឹង អំពើហិង្សា ចោរកម្ម ឃាតកម្ម គ្រោះថ្នាក់ចរាចរណ៍ សេវាសាធារណៈ បញ្ហាដីធ្លី បរិស្ថាន និងបញ្ហាជាច្រើនប្រភេទទៀត ឮតែគេជជែក គេនិយាយ គេយំសោក ជារៀងរាល់ថ្ងៃ។ តើរឿងទាំងនេះកើតមានពិតទេ?
ចំណែកក្នុងរង្វង់ថ្នាក់ជាតិ ឮតែប្រជែងគ្នាដណ្ដើមអំណាច លាភសក្ការៈ តួនាទី ផលលាភ ពុករលួយ គាប់សង្កត់ មន្ត្រីរដ្ឋទៅកន្លែងតែមិនធ្វើការ មន្ត្រីធ្វើការតែមិនត្រូវបានគេលើកទឹកចិត្ត មន្ត្រីមានសិទ្ធិតែមិនហ៊ាននិយាយ មន្ត្រីហ៊ាននិយាយតែមិនដឹងនិយាយអ្វី មានមន្ត្រីនិយាយតែខ្វះមូលដ្ឋានគួរឲ្យជឿទុកចិត្ត។ មន្ត្រីគួរឲ្យទុកចិត្តតែមិនត្រូវបានផ្ដល់ឱកាស អ្នកនិយាយពិតបែរជាមានបញ្ហា អ្នកមានបញ្ហាបែររស់ដោយសប្បាយ អ្នកមានមួយចំនួនសប្បាយលើគំនរទុក្ខអ្នកក្រ អ្នកក្រដឹងថាខ្លួនក្រតែមិនខំប្រឹង អ្នកប្រឹងដែរតែគ្មានលទ្ធផល។ រឿងរ៉ាវទាំងនេះឮតែគេនិយាយ ឮតែគេជជែកគ្នាជាប្រចាំ។ តើរឿងទាំងនេះកើតមានពិតទេ?
តើរឿងទាំងនេះកើតមកពីកត្តាអ្វីឲ្យពិតប្រាកដ? មកពីរាស្ត្រអន់ រាស្ត្រល្ងិតល្ងង់ឬយ៉ាងណា? តែបើថារាស្ត្រល្ងង់ ដូចមិនត្រូវទាំងស្រុងទេ ព្រោះមើលទៅប្រជាជនបច្ចុប្បន្ន មានការគិតការពិចារណា ចេះវែកញែកក្បោះក្បាយ គិតគូរខាតចំណេញ លើសខ្វះ បានត្រឹមត្រូវជាងមន្ត្រីក្រសួងក៏មាន។ តែបើថារាស្ត្រល្ងិតល្ងង់ក៏ថាចុះ ប៉ុន្តែគួរតែបន្ទោសរាស្ត្រដែរឬទេ?
បើរាស្ត្រមិនសូវល្ងង់ មានតែមន្ត្រីចាប់ពីថ្នាក់ក្រោមជាតិ ដល់ថ្នាក់ជាតិមិនសូវមានសមត្ថភាព។ កត្តានេះក៏ដូចជាមិនត្រូវទាំងស្រុង ព្រោះបើមន្ត្រីគ្មានសមត្ថភាព ប្រហែលសង្គមមួយនេះមិនអាចដើរដល់បច្ចុប្បន្ន។ ប៉ុន្តែហេតុអ្វីសង្គមនៅតែមានបញ្ហា?
តើត្រូវបន្ទោសអ្នកណា? បន្ទោសរាស្ត្រថាល្ងង់ក៏មិនប្រាកដថាត្រូវ បន្ទោសមន្ត្រីក៏មិនសម។ មានមតិខ្លះថាបញ្ហាកើតមានដោយសារច្បាប់សង្គមមិនរឹងមាំ។ ប៉ុន្តែ តើច្បាប់សព្វថ្ងៃមិនរឹងមាំមែនឬយ៉ាងណា? បើច្បាប់មិនរឹងមាំត្រូវបន្ទោសច្បាប់មែនទេ ដែលនាំឲ្យសង្គមមានបញ្ហា? តើអ្នកណាជាអ្នកទទួលខុសត្រូវឲ្យពិតប្រាកដចំពោះវាសនាជាតិមួយ? រាស្ត្រ មន្ត្រី ថ្នាក់ដឹកនាំ ច្បាប់ អ្នកណាជាអ្នកទទួលខុសត្រូវ? ឬមួយត្រូវរួមគ្នាកសាងជាតិទៅ ដើម្បីកុំឲ្យគេមើលងាយ? ឬមួយត្រូវនៅចាំមើលបំណាំគ្នា ចាំបន្ទោសឲ្យគ្នា ចង្អុលដាក់គ្នាទៅវិញទៅមក តែមិនព្រមនាំគ្នាធ្វើ?
© រក្សាសិទ្ធិដោយ thmeythmey.com