លោក ដូណាល់ ត្រាំ ធ្វើឲ្យសមាជិកណាតូភ័យព្រួយខ្លាំងពីសនិ្តសុខខ្លួនពេលអនាគត

អន្តរជាតិ

នយោបាយអន្តរជាតិ

លោក ដូណាល់ ត្រាំ ធ្វើឲ្យសមាជិកណាតូភ័យព្រួយខ្លាំងពីសនិ្តសុខខ្លួនពេលអនាគត

24, Jul 2016 , 9:59 pm

រូបភាព

ដោយ: សៅ ផលនិស្ស័យ (Sao Phal Niseiy)

សម្តីរបស់លោក ដូណាល់ ត្រាំ បេក្ខជនប្រធានាធិបតីបក្សសាធារណរដ្ឋពាក់ព័ន្ធនយោបាយសន្តិសុខរបស់លោក បានធ្វើឲ្យបណ្តារដ្ឋបាល់ទិក និងសមាជិកណាតូ ទូទៅ ភ័យព្រួយជាខ្លាំង។ លោក ដូណាល់ ត្រាំ បានបញ្ជាក់ច្បាស់ថា អាមេរិកអាចជួយការពាររដ្ឋបាល់ទិកពីការឈ្លានពានរបស់រុស្ស៊ី ដរាបណាពួកគេបង់វិភាគទានដល់អាមេរិកគ្រប់គ្រាន់ប៉ុណ្ណោះ។

«អាមេរិកនឹងពិចារណាការពារសម្ព័ន្ធមិត្តណាតូពីការឈ្លានពានរបស់រុស្ស៊ី ក្នុងករណីដែលបណ្តាប្រទេសទាំងនេះបង់លុយគ្រប់គ្រាន់ដល់អាមេរិកតាមការកំណត់។ អ្នកមិនអាចបំភ្លេចរឿងលុយឡើយ។ ពួកគេមានកាតព្វកិច្ចបង់លុយ។ សមាជិកណាតូជាច្រើនមិនបានបង់លុយតាមការកំណត់ឡើយ ហើយពួកគេមិនព្រមធ្វើអ្វីដែលពួកគេត្រូវធ្វើដែរ។ នេះជារឿងធំមួយ»។

នេះជាការលើកឡើងរបស់ប្រធានាធិបតីបក្សសាធារណរដ្ឋ លោក ដូណាល់ ត្រាំ ក្នុងបទសម្ភាសន៍ជាមួយសារព័ត៌មាន New York Times ពាក់ព័ន្ធគោលនយោបាយការបរទេសអាមេរិកនៅអឺរ៉ុបនិងការពារសមាជិកណាតូ។

ប៉ុន្តែ អ្វីដែលលោក ដូណាល់ ត្រាំ បានលើកឡើងនេះបានធ្វើឲ្យបណ្តារដ្ឋបាល់ទិកព្រួយបារម្ភជាខ្លាំង ព្រោះបើសិនលោក ដូណាល់ ត្រាំ ក្លាយជាប្រធានាធិបតីមែន អាមេរិកនឹងផ្លាស់ប្តូរគោលនយោបាយការបរទេស ហើយវាអាចក្លាយជាបញ្ហាសម្រាប់រដ្ឋសមាជិកណាតូទៀត។

បណ្តារដ្ឋបាល់ទិកក៏បានរិះគន់លោក ដូណាល់ ត្រាំ ដែលអាចធ្វើឲ្យសន្តិសុខអឺរ៉ុបប្រឈមគ្រោះថ្នាក់ ហើយពួកគេក៏បានអះអាងថា ខ្លួនកំពុងប្រឹងប្រែងក្នុងការបង្កើនថវិកាយោធានិងចូលរួមក្នុងសកម្មភាពយោធារបស់បក្សសម្ព័ន្ធយោធាណាតូផង។

ប្រធានាធិបតីអេស្តូនីលោក Toomas Hendrik បានបង្ហោះតាមប្រព័ន្ធទំនាក់ទំនងសង្គម Twitter ថា អេស្តូនីជារដ្ឋមួយក្នុងចំណោមសមាជិកណាតូចំនួន ៥ ដែលបានចំណាយលុយ ២ភាគរយនៃផលិតផលក្នុងស្រុកសរុបសម្រាប់វិស័យយោធា។ ហើយមិនត្រឹមតែប៉ុណ្ណោះ អេស្តូនី បានរួមចំណែកក្នុងអន្តរាគមន៍របស់ណាតូអនុលោមតាមមាត្រា៥ ក្នុងប្រទេសអាហ្វហ្កានីស្ថានថែមទៀត។

ចំណែកអតីតរដ្ឋមន្ត្រីការពារជាតិឡាត់វី Artis Pabriks បានរិះគន់បេក្ខជនប្រធានាធិបតីបក្សសាធារណរដ្ឋនិងជាសេដ្ឋីអចលនទ្រព្យនេះ ដោយលោកបានពន្យល់ថា បើសិនជាលោក ដូណាល់ ត្រាំ មិនផ្លាស់ប្តូរគំនិតរបស់លោកទេ អាមេរិកនឹងធ្វើឲ្យអឺរ៉ុបធ្លាក់ក្នុងគ្រោះថ្នាក់មិនខាន។ ទោះជាអតីតមន្ត្រីជាន់ខ្ពស់រូបនេះមិនសូវពេញចិត្តបេក្ខជនប្រធានាធិបតីអាមេរិកនេះក្តី រដ្ឋាភិបាលឡាត់វី បានអះអាងថា ឡាត់វី ជឿជាក់លើសហរដ្ឋអាមេរិក ទោះជាអ្នកណានឹងក្លាយជាប្រធានាធិបតីអាមេរិកក៏ដោយចុះ។

យ៉ាងណាមិញ សម្រាប់លោក ដូណាល់ ត្រាំ គោលនយោបាយបែបនេះបម្រើប្រយោជន៍អាមេរិក ហើយអាមេរិកក៏មិនចាំបាច់ចំណាយលុយច្រើនសន្ធឹកដើម្បីត្រឹមតែទៅជួយការពារប្រទេសដទៃដែរ។

ត្រលប់មក អគ្គលេខាធិការអង្គការណាតូលោក Jens Stoltenberg ឯណោះវិញ លោកក៏បានរិះគន់ការលើកឡើងរបស់លោក ដូណាល់ត្រាំ ដែរ តែលោកបានព្យាយាមពន្យល់ថា ការបន្តរួបរួមគ្នាក្នុងបក្សសម្ព័ន្ធយោធាណាតូជារឿងចាំបាច់បំផុតមួយមិនអាចខ្វះបាន។ ដែលនេះមានន័យថា អាមេរិកនិងបណ្តាសមាជិកណាតូ ត្រូវបន្តរួមកម្លាំងគ្នានិងសាមគ្គីគ្នាដើម្បីរក្សាសន្តិសុខ និងទប់ស្កាត់ការគំរាមកំហែងនានា ទោះជាមានការផ្លាស់ប្តូរការដឹកនាំនៅអាមេរិកក៏ដោយ៕