ពីនេះ ពីនោះ
ហេតុអ្វី ពាក្យ«សាលចតុមុខ» ត្រូវសរសេរថា«សាលចតុម្មុខ» ទៅវិញ?
× វចនានុក្រមខ្មែរ របស់សម្ដេចព្រះសង្ឃរាជ ជួន ណាត បានសរសេរពាក្យ«សាលចតុមុខ» ជា«សាលចតុម្មុខ» វិញ។ អ្វីជាមូលហេតុដែលត្រូវសរសេរបែបនេះ៖
ពាក្យ «សាលចតុម្មុខ» មានថ្នាក់ពាក្យជានាម (សាល+ចតុ+មុខ, ដោយមាន ចតុ ពីខាងដើម ត្រូវតម្រួត ម ជាចតុម្មុខ)វិញ ចំណែកពាក្យ«សាលចតុមុខ» មិនមានក្នុងវចនានុក្រមខ្មែរឡើយ។ ពាក្យនេះមានន័យថា ជាឈ្មោះមហាសាលមួយខ្នងឋិតនៅក្បែរមាត់ទន្លេចតុម្មុខ ក្នុងរាជធានីភ្នំពេញ មានទ្រង់ទ្រាយល្អប្លែកតាមសម័យនិយម ដោយស្នាដៃនៃវិស្វករខ្មែរ, ជាសាលសម្រាប់ប្រើការបានច្រើនពិធីមានការប្រជុំធ្វើសន្និសីទធំៗ និងមហោស្រពពិសេសម្ដងម្កាលជាដើម, សាលចតុម្មុខ នេះកើតមានឡើងក្នុងសម័យរាជរដ្ឋាភិបាល សង្គមរាស្ត្រនិយម ដែលមានសម្ដេចព្រះនរោត្ដម សីហនុ ជាព្រះប្រមុខរដ្ឋ, ជាមហាសាលសម្រាប់ចក្រទាំងពីរគឺ ពុទ្ធចក្រ និងអាណាចក្រ ប្រើប្រាស់ម្ដងៗតាមត្រូវការ។ សាលចតុម្មុខ មានរូបសណ្ឋាន និងប្រជុំទន្លេ៤មុខ ជាលម្អមួយកន្លែងរបស់ក្រុងភ្នំពេញ មានខ្យល់អាកាសទន្លេបក់រំភើយៗ រហើយស្រួលជានិច្ចនិរន្តន៍៕
ដកស្រង់ពីវចនានុក្រមសម្ដេចព្រះសង្ឃរាជ ជួន ណាត
© រក្សាសិទ្ធិដោយ thmeythmey.com