កំណាព្យបទ សត្វកាងស្លាប
ដោយ ប៉ាកកាខ្មៅ
-បាទមេ មេបាទស្អាតល្អណាស់
ក្មេងចាស់ ចាស់ក្មេងឃើញចឹងដែរ
ដឹងច្បាស់ ច្បាស់ដឹងទាំងក្រុងស្រែ
ស្និទ្ធស្នេហ៍ ស្នេហ៍ស្និទ្ធពិតមេត្រី។
-ត្រូវថា ថាត្រូវគ្មានចន្លោះ
មេស្មោះ ស្មោះមេគ្មានលាក់អី
មេធ្វើ ធ្វើមេមានឈ្មោះល្បី
ខ្វះអី អីខ្វះអ្នកគាំទ្រ។
-ផ្លូវដើរ ដើរផ្លូវត្រូវតាមគិត
មេពិត ពិតមេគេមិនភរ
ជឿខ្ញុំ ខ្ញុំជឿមិនវឹកវរ
មេឈរ ឈរមេចឹងត្រូវហើយ។
-ពិតគ្រោះ គ្រោះពិតជិតរណ្តៅ
ជួយហៅ ហៅជួយមិនរួចឡើយ
អ្នកក្រោម ក្រោមអ្នកចាំតែឆ្លើយ
ត្រូវហើយ ហើយត្រូវធ្វើទៅមេ៕