ថ្នាំសម្លាប់សត្វល្អិតកំពុងសម្លាប់សត្វព្រៃ និងប៉ះពាល់សុខភាពប្រជាជន

ជាតិ

ថ្នាំសម្លាប់សត្វល្អិតកំពុងសម្លាប់សត្វព្រៃ និងប៉ះពាល់សុខភាពប្រជាជន

02, Aug 2016 , 9:39 am

រូបភាព

ដោយ: ថ្មីៗ

ភ្នំពេញ៖ របាយការណ៍ថ្មីមួយរបស់អង្គការសមាគមអភិរក្សសត្វព្រៃ(WCS)បានបង្ហាញថា ការប្រើប្រាស់ថ្នាំសម្លាប់សត្វព្រៃដែលពុលខ្លាំង កំពុងសម្លាប់សត្វព្រៃ និងប៉ះពាល់ធ្ងន់ធ្ងរដល់សុខភាពរបស់ប្រជាជនសហគមន៍មូលដ្ឋានដែលរស់នៅតាមទីជនបទ។

សេចក្ដីប្រកាសព័ត៌មានរបស់អង្គការសមាគមអភិរក្សសត្វព្រៃ នៅថ្ងៃទី០១ ខែសីហា ឆ្នាំ២០១៦នេះ បានបង្ហាញថា នៅចន្លោះខែមករា ដល់ខែសីហា ឆ្នាំ២០១៥ មានសត្វព្រៃចំនួន០៦ក្បាលរួមទាំង ប្រភេទងាយរងគ្រោះ (សត្វសំពោចធំ និងសត្វកុកពាក់អំបោះ) និងប្រភេទរងគ្រោះជិតផុតពូជបំផុត(សត្វត្មាតត្នោត) ត្រូវបានក្រុមមន្ត្រីល្បាត និងក្រុមតាមដាន ត្រួតពិនិត្យសត្វព្រៃ ប្រទះឃើញស្លាប់នៅជិតត្រពាំងផ្សេងៗគ្នា។

ការរកឃើញនេះ បន្ទាប់ពីកម្មវិធីគោលនយោបាយសុខភាព និងសុខភាពសត្វព្រៃរបស់អង្គការសមាគមអភិរក្សសត្វព្រៃ(WCS) បានធ្វើការយ៉ាងជិតស្និទ្ធជាមួយក្រុមការងារនៅក្នុងខេត្តព្រះវិហារ និងអង្គការជីវិតសត្វស្លាបអន្តរជាតិនៅស្រុកសៀមប៉ាង ខេត្តស្ទឹងត្រែងក្នុងពេលកន្លងទៅ។

កាលពីខែមិថុនា ឆ្នាំ ២០១៦ ករណីសត្វព្រៃពុលស្លាប់នេះ ត្រូវបានគេយកមកបង្ហាញនៅក្នុងកិច្ចប្រជុំមួយដោយមានការចូលរួម ពីមន្ត្រីតំណាងមកពីក្រសួងសុខាភិបាល ក្រសួងកសិកម្ម រុក្ខាប្រម៉ាញ់ និងនេសាទ និងក្រសួងបរិស្ថាន ព្រមទាំងដៃគូអន្តរជាតិផ្នែកសុខាភិបាលផ្សេងៗទៀត ដើម្បីកំណត់ការយកចិត្តទុកដាក់លើបញ្ហានេះ ព្រមទាំងស្វែងរកការដោះស្រាយជាបន្ទាន់។

លោក Mathieu Pruvot អ្នកដឹកនាំកម្មវិធីគោលនយោបាយ និងសុខភាពសត្វព្រៃ បាននិយាយថា សត្វព្រៃទាំងអស់នោះពុលស្លាប់ ដោយសារថ្នាំសម្លាប់សត្វល្អិត ពុលខ្លាំង «Cartbofuran» ដែលគេយកទៅបាចចូលក្នុងទឹកត្រពាំងដើម្បីចាប់សត្វព្រៃ។ លោកបានបញ្ជាក់ថា នៅក្នុងការពិសោធន៍ ក៏បានរកឃើញផងដែរថា ទាំងសត្វចិញ្ចឹមតាមផ្ទះ និងប្រជាជន សុទ្ធតែទទួលរងផលប៉ះពាល់នៅតំបន់ដូចគ្នា បន្ទាប់ពីពួកគេបានហូបទឹកដែលមានផ្ទុកសារធាតុពុលទាំងនោះ។

«Cartbofuran» គឺជាប្រភេទថ្នាំសម្លាប់សត្វល្អិត Cabamate ហើយជាទូទៅត្រូវបានគេប្រើប្រាស់ដើម្បីកំចាត់សត្វល្អិត។ វាផ្ទុកសារធាតុពុលខ្លាំង ជាពិសេសទៅលើសត្វស្លាប ដែលមានប្រសិទ្ធភាពចំពោះការបំពុលដោយផ្ទាល់ និងពុលដោយប្រយោលក្នុងចំនួនច្រើន។

សម្រាប់មនុស្ស រោគសញ្ញានៃការពុលដោយសារ Cartbofuran រួមមាន ចុះទន់ខ្សោយ ក្អួត ឈឺពោះ បែកញើស រាគរូស ហៀរទឹកមាត់ ពិបាកដកដង្ហើម រោគសញ្ញាប្រព័ន្ធប្រសាទ និងស្លាប់។ Cartbofuran ត្រូវបានគេហាមមិនឲ្យប្រើប្រាស់ នៅក្នុងប្រទេសជាច្រើន ក្នុងពិភពលោក (សហរដ្ឋអាមេរិក កាណាដា និងអ៊ឺរ៉ុប) ដោយយោងលើហេតុការស្លាប់រង្គាលនៃសត្វស្លាបព្រៃ។

ចំណែកពពួកថ្នាំពុល Cabamates ផ្សេងទៀត ដូចជា Bendiocarb និង Propoxur មានសារៈសំខាន់ និងប្រយោជន៍ក្នុងការប្រើប្រាស់ដើម្បីសម្លាប់សត្វមូសនៅក្នុងផ្ទះដែលជាភ្នាក់ងារចម្លងជំងឺគ្រុនចាញ់ ដែលណែនាំឲ្យប្រើប្រាស់ដោយអង្គការសុខភាពពិភពលោក។

នាយកអង្គការសមាគមអភិរក្សសត្វព្រៃលោក Ross Sinclair បានប្រមានថា នេះគឺជាក្តីព្រួយបារម្ភមួយសំខាន់ ខណៈការបំពុលក្នុងពេលដ៏ខ្លី បានក្លាយជាការគំរាមកំហែងដ៏ធំមួយចំពោះការអភិរក្សសត្វព្រៃនៅកម្ពុជា។

ចំណែកលោកនាយក មជ្ឈមណ្ឌលគ្រប់គ្រង និងទប់ស្កាត់ជំងឺរបស់សហរដ្ឋអាមេរិក ប្រចាំនៅកម្ពុជា (US-CDC) លោក Robert Newman បានសង្កត់ធ្ងន់ថាវាជាការចាំបាច់ ដើម្បីកំណត់អំពីហានិភ័យនានា ដែលបង្កឡើង ដោយវត្តមានរបស់ថ្នាំសម្លាប់សត្វល្អិតដែលពុលខ្លាំងនៅលើទីផ្សារ។ បន្ថែមពីនេះ វាគឺជាកិច្ចការបន្ទាន់មួយ ដើម្បីកសាងសមត្ថភាពមន្ទីរពិសោធន៍ឲ្យបានច្រើនជាងមុននៅក្នុងប្រទេស ដើម្បីរកឲ្យឃើញវត្តមានសារធាតុគីមីពុលនៅក្នុងបរិស្ថាន ចំណីអាហារ និងសំណាកជីវសាស្ត្រផ្សេងៗកុំឲ្យវាប៉ះពាល់ដល់មនុស្ស និងសត្វព្រៃ។

លោក លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លងនៅក្នុងប្រទេសកម្ពុជា បានបង្ហាញ ក្ដីព្រួយបារម្ភយ៉ាងខ្លាំងពាក់ព័ន្ធនិងលទ្ធផលដែលបានរកឃើញទាំងអស់នេះ។ លោកបានលើកឡើងថា នេះគឺជាក្ដីព្រួយបារម្ភ និងជាការគំរាមកំហែងដ៏ធ្ងន់ធ្ងរមួយសម្រាប់សត្វព្រៃ និងសុខភាពសាធារណៈ។ បញ្ហានេះទាមទារឲ្យមានការយកចិត្តទុកដាក់ជាបន្ទាន់ដើម្បីការពារសត្វព្រៃ និងប្រជាជនកម្ពុជា៕