អាជ្ញាធរចង់យកស្រឡាងពីអ្នកលឿង មកចម្លងអ្នកដំណើរ ពេលស្ពានជ្រោយចង្វារចាស់ជួសជុល ២ឆ្នាំ

ជាតិ

អាជ្ញាធរចង់យកស្រឡាងពីអ្នកលឿង មកចម្លងអ្នកដំណើរ ពេលស្ពានជ្រោយចង្វារចាស់ជួសជុល ២ឆ្នាំ

11, Aug 2016 , 7:39 pm

រូបភាព

ដោយ: ម៉ៅ សុផា

ភ្នំពេញ៖ សាលារាជធានីភ្នំពេញ បានស្នើឲ្យយកស្រឡាងពីកំពង់ចម្លងអ្នកលឿង មកប្រើប្រាស់នៅរាជធានីភ្នំពេញ ដើម្បីចម្លងអ្នកដំណើរពីត្រើយម្ខាង ទៅត្រើយម្ខាង នៅពេលដែលស្ពានជ្រោយចង្វារចាស់ ឬស្ពានមិត្តភាព កម្ពុជា-ជប៉ុន នឹងត្រូវបានផ្អាកការប្រើប្រាស់រយៈពេល២ឆ្នាំ ដើម្បីជួសជុល នៅពេលខាងមុខ។ សំណើនេះ ធ្វើឡើងក្នុងកិច្ចប្រជុំមួយ រវាងសាលារាជធានីភ្នំពេញ ក្រសួងសេដ្ឋកិច្ច ក្រសួងសាធារណការ រួមទាំងភាគីពាក់ព័ន្ធផ្សេងៗទៀត ជុំវិញគម្រោងនៃការជួសជុលស្ពានជ្រោយចង្វារចាស់ កាលពីថ្ងៃទី១០ ខែសីហា ឆ្នាំ២០១៦ ។

លោក ឃួង ស្រេង អ្នកនាំពាក្យនៃសាលារាជធានីភ្នំពេញ បានលើកឡើងថា នៅពេលដែលស្ពានជ្រោយចង្វារចាស់ ចាប់ផ្តើមជួសជុល ការធ្វើដំណើររបស់ប្រជាពលរដ្ឋ ប្រហែលជាមិនអាចប្រព្រឹត្តទៅដោយរលូន ដូចពីមុនឡើយ។ លោក អះអាងថា ការធ្វើដំណើរតាមស្ពានជ្រោយចង្វារថ្មី ឬស្ពានមិត្តភាព កម្ពុជា-ចិន តែមួយ នឹងអាចបង្កឲ្យការកកស្ទះចរាចរណ៍ជាមិនខាន។

ដើម្បីដោះស្រាយការកកស្ទះចរាចរណ៍ អ្នកនាំពាក្យរូបនេះ បានស្នើទៅភាគីពាក់ព័ន្ធ ក្នុងកិច្ចប្រជុំ ឲ្យពិចារណា ក្នុងការយកស្រឡាងពីអ្នកលឿង ដែលកំពុងទុកចោល មកប្រើប្រាស់បណ្តោះអាសន្ននៅរាជធានីភ្នំពេញ ទម្រាំតែស្ពានជ្រោយចង្វារចាស់ ត្រូវបានជួសជុលរួចរាល់។ លោកបញ្ជាក់បែបនេះថា៖«ឥឡូវនៅអ្នកលឿង យើងមានស្ពានហើយ។ យើងមិនប្រើប្រាស់សាឡាងទៀតទេ។ អ៊ីចឹង ខ្ញុំចង់ឲ្យយកស្រឡាងមកប្រើ ដើម្បីរំដោះការស្ទះចរាចរណ៍»។

លោក វ៉ា សឹមសូរិយា អ្នកនាំពាក្យនៃក្រសួងសាធារណការនិងដឹកជញ្ជូន បានគាំទ្រនឹងគំនិតរបស់លោក ឃួង ស្រេង។ ប៉ុន្តែ សំណើខាងលើ មិនទាន់ត្រូវបានភាគីពាក់ព័ន្ធ សម្រេចយ៉ាងណានោះទេ ដោយលោក វ៉ា សឹមសូរិយា អះអាងថា បញ្ហានេះ នឹងត្រូវលើកទៅជជែក បន្ថែមទៀត។

ទាក់ទងនឹងការរជួសជុលស្ពានជ្រោយចង្វារចាស់ អ្នកនាំពាក្យនៃក្រសួងសាធារណការរូបនេះ ពន្យល់ថា ការចំណាយពេលរហូតដល់ទៅ២ឆ្នាំបែបនេះ គឺដោយសារតែភាគីទាំងអស់ ជាពិសេសអ្នកបច្ចេកទេស ត្រូវការពិនិត្យឲ្យម៉ត់ចត់ ចំពោះសភាពទ្រុឌទ្រោមរបស់ស្ពាន មុខនឹងសម្រេចចាប់ផ្តើមជូសជុល។ លោកសង្កត់ធ្ងន់ៗថា៖«បើធ្វើថ្មីតែម្តង គឺស្រួលទេ។ តែការជួសជុលនេះ មិនមែនជាការងាយទេ គឺយើងត្រូវការសិក្សាឲ្យគ្រប់ជ្រុងជ្រោយ និងគ្រប់កន្លែងទាំងអស់»។

អ្នកនាំពាក្យនៃសាលារាជធានីភ្នំពេញ និងអ្នកនាំពាក្យនៃក្រសួងសាធាណការ សុទ្ធតែមិនអាចបញ្ជាក់បានថា ការជួសជុល នឹងត្រូវចំណាយទំហំទឹកប្រាក់ប៉ុន្មាននោះទេ។ អ្នកនាំពាក្យទាំង២រូប គ្រាន់តែប្រាប់ថា ស្ពានជ្រោយចង្វារចាស់ ត្រូវបានកសាងឡើងដោយប្រទេសជប៉ុន ក្នុងសម័យសង្គមរាស្ត្រនិយម ដូច្នេះម្ចាស់ជំនួយមួយនេះ នឹងចំណាយទឹកប្រាក់ក្នុងការជួសជុល។

បើតាមអ្នកនាំពាក្យនៃសា្ថប័នខាងលើ ក្រសួងសេដ្ឋកិច្ចនិងហិរញ្ញវត្ថុ គឺជាអ្នកទទួលថវិកាពីភាគីជប៉ុន ដើម្បីចំណាយលើការជួសជុលស្ពានជ្រោយចង្វារចាស់។ ប៉ុន្តែ សារព័ត៌មានថ្មីៗ មិនអាចទាក់ទងអ្នកនាំពាក្យនៃក្រសួងសេដ្ឋកិច្ចនិងហិរញ្ញវត្ថុ ដើម្បីសុំការបំភ្លឺបានទេ ដោយសារតែហៅទូរសព្ទមិនចូល។

សូមបញ្ជាក់ថា ដំណើរការនៃការសិក្សានិងការជួសជុស នឹងចាប់ផ្តើមពីខែមករា ឆ្នាំ២០១៧ រហូតដល់ខែមករា ឆ្នាំ២០១៩។ ក្នុងអំឡុងពេលនៃការជួសជុលនេះ ស្ពានជ្រោយចង្វារចាស់ នឹងត្រូវបិទ ដោយមិនឲ្យធ្វើដំណើរឆ្លងកាត់ឡើយ៕