ពីនេះ ពីនោះ
ពាក្យ«វាជាចរិតធម្មជាតិខ្ញុំ» អាចជាថ្នាំពិសធ្វើឲ្យមិត្តភាពផុយស្រួយ
× ភ្នំពេញ៖ អ្វីជាមិត្តភាព? មនុស្សបង្កើតមិត្តភាពមកដើម្បីអ្វី? ហេតុអ្វីចាំបាច់មានមិត្ត? ទាំងនេះ គឺជាសំណួរដែលបុគ្គលគ្រប់រូបត្រូវសួរ មុនខ្លួនចាប់ផ្ដើមបង្កើតមិត្តភាពជាមួយអ្នកផ្សេង។ ប៉ុន្តែក្រោយពេលបង្កើតជាមិត្តភក្តិ តើពាក្យ«វាជាចរិតធម្មជាតិរបស់ខ្ញុំ!» គួរនិយាយឬយ៉ាងណា?
និយាយពីមិត្តភាពមិនមែនជារឿងដែលសាមញ្ញ ប៉ុន្តែវាគឺជាទំនាក់ទំនងស្មុគស្មាញមួយ ដែលផ្សារភ្ជាប់ជាមួយ អារម្មណ៍ ចិត្ត សកម្មភាព គំនិត ប្រហាក់ប្រហែលគ្នា ទើបអាចនិយាយបានថាជាមិត្តភាពមួយដែលលយល់ចិត្តថ្លើមគ្នាបាន។ មិត្តភាពវាគឺជាសេចក្ដីស្រឡាញ់មួយ ប៉ុន្តែវាមិនមែនជាសេចក្ដីស្រឡាញ់ក្នុងន័យស្នេហាដូចប្រុសស្រីនោះទេ។
ជាការពិតណាស់ ការរាប់អានមិត្តភក្តិ គឺតែងតែមានគោលដៅពីរទាំងអស់ គឺចង់បានប្រយោជន៍ពីមិត្តភាព និងផ្ដល់ប្រយោជន៍តាមរយៈមិត្តភាពទៅឲ្យមនុស្សដែលខ្លួនមានទំនាក់ទំនងជាមួយ។ ប្រសិនបើ ភាគីណាមួយ មិនអាចបំពេញតម្រូវការដែល គេចង់បាន ឬផ្ទុយពីការគិតរបស់គេ មិត្តភាពនោះក៏ងាយប្រះឆារនោះដែរ។ ហេតុផលបែបនេះអាចមានអ្នកប្រឆាំងថា មិនត្រឹមត្រូវ ព្រោះមិត្តភាពពិត គេមិនទាមទារផលប្រយោជន៍នោះទេ។ ប៉ុន្តែបើអះអាងបែបនេះនោះគឺជាគំនិតមិនត្រឹមត្រូវព្រោះ មិត្តភាពប្រភេទណាក៏ដោយក៏មិនមែនជាមិត្តភាពសុក្រិត ឥតខ្ចោះនោះដែរ។
ការបកស្រាយពីអ្វីទៅដែលហៅថាមិត្តភាពពិតណាស់គឺវាមានភាពស្មុគស្មាញ។ ប៉ុន្តែបើសិនជាក្លាយជា អ្នកសម្រេចចិត្តកសាងទំនាក់ទំនងជាមួយគ្នាហើយ គ្រប់បុគ្គលទាំងអស់គួរនាំគ្នាពិចារណាទៅលើសកម្មភាពមួយ ពាក្យមួយឃ្លា ដែលមនុស្សទូទៅតែងតែនិយាយ ទៅកាន់មិត្តភក្តិរបស់ខ្លួននោះគឺពាក្យថា «ចរិតធម្មជាតិ»។
ព្រោះតែងចង់ឲ្យមិត្តភក្តិស្គាល់ពីខ្លួន គោរពខ្លួន ខ្លាចខ្លួន និងឲ្យតម្លៃខ្លួន ស្ទើរគ្រប់គ្នា បានយកពាក្យថា «វាជាចរិតធម្មជាតិរបស់ខ្ញុំ», «ដឹងស្រាប់ហើយចរិតខ្ញុំគឺអ៊ីចឹង!» «ចរិតខ្ញុំគឺមិនឲ្យអ្នកណាខ្សែលើទេ!»...មកនិយាយ។ ជាការពិតពាក្យទាំងនេះមិនទាស់ខុសនោះទេ ព្រោះដើម្បីឲ្យមិត្តភក្តិគាត់បានដឹងហើយ ថ្ងៃក្រោយកុំឲ្យធ្វើបំពាន់លើចរិតធម្មជាតិទាំងនោះ។ ក៏ប៉ុន្តែ នៅពេលដែលភាគីណាមួយនិយាយពី«ចរិតធម្មជាតិ»ខ្លួនមានបានពិចារណាទេថា មិត្តភក្តិដែលខ្លួនកំពុងតែរាប់អានក៏មានចរិតធម្មជាតិផ្ទាល់ខ្លួនដូចគ្នា។ ហេតុនេះ នៅក្នុងជីវិតទំនាក់ទំនងមិត្តភក្តិ បើអាចជៀសបាន «ចរិតធម្មជាតិ» គួរណាស់កុំយកមកលាយឡំជាមួយ ប៉ុន្តែព្យាយាមប្រើគំនិត និងភាពបត់បែន ក្នុងមិត្តភាពនោះទើបជាការប្រសើរ។
ជារួមមក គំនិតអាត្មានិយម ដែលចង់ឲ្យអ្នកដទៃមកបំពេញឲ្យខ្លួន ប៉ុន្តែមិនព្រមស្វែងយល់ពីខ្លួនឯងដើម្បីបំពេញឲ្យគេផង វាគឺជាមាគ៌ាផុសស្រួយនៅក្នុងជីវិតមិត្តភាព។ រូបភាពបែបនេះ មិនមែនត្រឹមតែមិត្តភក្តិធម្មតានោះទេ ប៉ុន្តែ គូសង្សារ ប្ដីប្រពន្ធ បងប្អូន សាច់ញាតិ មិត្តរួមការងារ ក៏ត្រូវពិចារណាផងដែរពីរូបភាពបែបនោះ។ មូលដ្ឋានពិចារណា និងការយោគយល់គ្នា ទើបជាផ្លូវដែលត្រឹមត្រូវពិត។
© រក្សាសិទ្ធិដោយ thmeythmey.com