ជាតិ
នយោបាយជាតិ
ព្រំដែន៖ កម្ពុជា-វៀតណាម កំពុងប្រជុំពិនិត្យឯកសារស្នើសុំជំនួយពីបារាំង
×![]()
ភ្នំពេញ៖ គណៈកម្មការចម្រុះព្រំដែនកម្ពុជា-វៀតណាម កំពុងបើកកិច្ចប្រជុំចង្អៀតនៅទីស្តីការគណៈរដ្ឋមន្ត្រី នៅថ្ងៃទី២៩ សីហា នេះ ដើម្បីពិភាក្សាគ្នាដោះស្រាយបញ្ហាចម្រូងចម្រាសលើបញ្ហាព្រំដែនរវាងប្រទេសទាំងពីរ។ ក្នុងកិច្ចប្រជុំនេះភាគីកម្ពុជាដឹកនាំដោយប្រធានគណៈកម្មាធិការកិច្ចការព្រំដែនកម្ពុជាលោក វ៉ា គីមហុង និងភាគីវៀតណាមដឹកនាំលោក Le hoai trang អនុរដ្ឋមន្ត្រីកាបរទេស ទទួលបន្ទុកកិច្ចការព្រំដែន។ ប៉ុន្តែមិនទាន់អាចបញ្ជាក់ពីរបៀបវារៈជុំវិញកិច្ចប្រជុំនេះ ឲ្យបានច្បាស់លាស់នៅឡើយទេ ។
តែយ៉ាងណាប្រធានគណៈកម្មាធិការកិច្ចការព្រំដែនកម្ពុជាលោក វ៉ា គីមហុង ធ្លាប់ប្រាប់សារព័ត៌មានថ្មីៗកាលពីថ្ងៃទី១៩ សីហា កន្លងមកថា កិច្ចប្រជុំចង្អៀតនេះ គឺកម្ពុជានិងវៀតណាម នឹងត្រួតពិនិត្យរួមគ្នាលើឯកសារស្នើទៅប្រធានាធិបតីបារាំង ដើម្បីសុំជំនួយបច្ចេកទេស ដោះស្រាយលើចំណុចខ្វែងគំនិតគ្នា នៃបញ្ហាព្រំដែនប្រទេសទាំងពីរ។ បើតាមលោក វ៉ា គីមហុង ក្រៅពីពិនិត្យលើឯកសារនេះ ភាគីទាំងពីរក៏នឹងពិភាក្សាលើរបៀបវារៈមួយចំនួនទៀត ដើម្បីដោះស្រាយបញ្ហាចម្រូងចម្រាសព្រំដែននេះផងដែរ។
គួរបញ្ជាក់ថា កម្ពុជា-វៀតណាម បានព្រមព្រៀងគ្នាបោះបង្គោលព្រំដែន កាលពីឆ្នាំ២០០៦មក ក្នុងបណ្តោយព្រំដែនរវាងប្រទេសទាំងពីរប្រវែង១២៧០គីឡូម៉ែត្រ ដោយកំណត់បោះបង្គោលព្រំដែនចំនួន៣៧៥បង្គោល។ បើតាមរបាយការណ៍គណៈកម្មាធិការព្រំដែនកម្ពុជា បានបង្ហាញកាលឆ្នាំ២០១៥ថា កម្ពុជា-វៀតណាម បានបោះបង្គោលព្រំដែនបានចំនួន៨៣ភាគរយ ពោលគឺបញ្ហាព្រំដែនរវាងប្រទេសទាំងពីរ នៅសល់១៧ភាគរយទៀតប៉ុណ្ណោះ៕
Tag:
ព្រំដែន
© រក្សាសិទ្ធិដោយ thmeythmey.com
