ប្រធានាធិបតីអាមេរិក បារ៉ាក់ អូបាម៉ា បានទៅដល់ទីក្រុងហាងចូវ នៅថ្ងៃទី៣ ខែ កញ្ញា ដើម្បីចូលរួមកិច្ចប្រជុំប្រទេសមានសេដ្ឋកិច្ចរីកចម្រើនទាំង២០ (G-20) នៅទីនោះ ដែលជាការចូលរួមលើកចុងក្រោយរបស់លោក មុនពេលផុតអាណត្តិ។ ប៉ុន្តែអ្វីដែលគួរឲ្យចាប់អារម្មណ៍នោះ មេដឹកនាំអាមេរិក មិនបានទទួលបដិសណ្ឋារកិច្ចកម្រាលព្រំក្រហម ដូចមេដឹកនាំដទៃទៀតឡើយ ហើយមន្ត្រីអាមេរិក និងមន្ត្រីចិន ក៏ប៉ះសម្ដីគ្នាមួយប្រាវទៀត។
ដំណើរទស្សនកិច្ចរបស់ប្រធានាធិបតីអាមេរិក បារ៉ាក់ អូបាម៉ា ទៅកាន់ក្រុងហាងចូវ ដើម្បីចូលរួមកិច្ចប្រជុំ G-20 បានចាប់ផ្ដើមឡើងយ៉ាងសោះអង្គើយ ដ្បិតគ្មានកម្រាលព្រំក្រហម គ្មានជណ្ដើរយន្តហោះ សម្រាប់ទទួលប្រមុខរដ្ឋអាមេរិកឡើយ។ ហើយនៅពេលទៅដល់ក្រុងហាងចូវភ្លាម ទីប្រឹក្សាសន្តិសុខអាមេរិក និងមន្ត្រីចិន ក៏ទាស់សម្ដីគ្នាមួយភ្លែតដែរ ដែលបញ្ហាទាំងនេះអាចជាការបន្ទាបកិត្តិយសប្រធានាធិបតីអាមេរិក។
រឿងរ៉ាវទាំងអស់ ផ្ដើមពេលយន្តហោះប្រធានាធិបតីអាមេរិក Air Force One ទៅដល់ព្រលានយន្តហោះក្រុងហាងចូវ។ ផ្ទុយពីបែបបទពិធីការទូទៅ គេមិនឃើញមានជណ្ដើរសម្រាប់ទទួលលោក អូបាម៉ា ចេញពីទ្វារធំយន្តហោះឡើយ ហើយលោក អូបាម៉ា ត្រូវចុះតាមជណ្ដើរយន្តហោះផ្ទាល់។ បន្ទាប់មក គេក៏មិនឃើញមានកម្រាលព្រំក្រហមលើផ្ទៃដីដែរ ហើយលោក អូបាម៉ា ត្រូវដើរលើផ្ទៃកៅស៊ូព្រលានយន្តហោះទៅកាន់រថយន្តរបស់លោក។
បញ្ហាកាន់តែធ្ងន់ធ្ងរ នៅពេលដែលទីប្រឹក្សាសន្តិសុខអាមេរិក លោកស្រី Susan Rice ត្រូវបានមន្ត្រីចិន រារាំងមិនឲ្យដើរទៅកាន់ក្បួនរថយន្តដែលកំពុងរង់ចាំ។ មន្ត្រីចិនដដែលនោះ ក៏បានទាស់សម្ដីជាមួយមន្ត្រីសារព័ត៌មានរបស់សេតវិមានម្នាក់ទៀត ដែលកំពុងណែនាំអ្នកសារព័ត៌មាន ឲ្យឈរក្នុងទីតាំងអនុញ្ញាតសម្រាប់យកព័ត៌មាន។ មន្ត្រីចិនរូបនោះ ស្រែកថា៖« នេះជាទឹកដីរបស់យើង។ នេះជាព្រលានយន្តហោះរបស់យើង»។
តាមពិតទៅ មេដឹកនាំពិភពលោកពិភពលោក ដែលមកចូលរួមកិច្ចប្រជុំនេះ សុទ្ធតែទទួលបានបដិសណ្ឋារកិច្ចតាមបែបបទពិធីការ និងមានកម្រាលព្រំក្រហម ក៏ដូចជាជណ្ដើរចាំទទួលទាំងអស់។ សារព័ត៌មាន RT ផ្សាយថា ប្រធានាធិបតីរុស្សី, ប្រធានាធិបតីកូរ៉េខាងត្បូង, ប្រធានាធិបតីអាហ្វ្រិកខាងត្បួង, ប្រធានាធិបតីប្រេស៊ីល, នាយករដ្ឋមន្ត្រីឥណ្ឌា, នាយករដ្ឋមន្ត្រីជប៉ុន និងមេដឹកនាំដទៃទៀត គឺត្រូវម្ចាស់ផ្ទះចិន ទទួលយ៉ាងរាក់ទាក់។
យ៉ាងណាមិញ មន្ត្រីចិនអះអាងថា ខ្លួនបានរៀបចំជណ្ដើរសម្រាប់ទទួលមេដឹកនាំទាំងអស់ តែក្រុមប្រតិភូអាមេរិក បដិសេធប្រើប្រាស់ជណ្ដើរយន្តហោះ ដ្បិតអ្នកដាក់ជណ្ដើរនោះ មិនចេះភាសាអង់គ្លេស ដែលនាំឲ្យពិបាកទំនាក់ទំនងជាមួយក្រុមសន្តិសុខ។ ទាក់ទងនឹងរឿងនេះ ប្រធានាធិបតីអាមេរិក អូបាម៉ា មិនបានបង្ហាញខ្វល់ខ្វាយអ្វីខ្លាំងទេ។ លោកនិយាយថា នេះមិនមែនជាលើកដំបូងទេ ហើយរឿងនេះតែងតែងកើតឡើងនៅជុំវិញពិភពលោក ជាពិសេសម្ចាស់ផ្ទះកិច្ចប្រជុំធំៗ។
ក្នុងសន្និសីទកាសែតនៅថ្ងៃទី៤ ខែកញ្ញា លោក អូបាម៉ា បន្ថែមថា រឿងតូចតាចនេះ នឹងមិនប៉ះពាល់ដល់ទំនាក់ទំនងចិន និងអាមេរិកឡើយ ដោយលោកបញ្ជាក់ទៀតថា ភាពតានតឹងតែងតែមាន នៅពេលដែលសេតវិមានចរចាជាមួយប្រទេសម្ចាស់ផ្ទះទាក់ទងនឹងអ្នកកាសែត។ លោកលើកឡើងដែរថា ចិន ប្រហែលជាភ្ញាក់ផ្អើលនឹងទំហំប្រតិភូអាមេរិក។ លោកបន្តថា ពេលទៅបរទេស អាមេរិកតែងមានយន្តហោះ និងឧទ្ធម្ភាគចក្រច្រើន ឡានក៏ច្រើន មនុស្សក៏ច្រើន។ ចំពោះរឿងនេះ ប្រទេសម្ចាស់ផ្ទះអាចគិតថា ពិតជាច្រើនមែន៕