ជាតិ
អន្តោប្រវេសន៍ឃាត់ខ្លួនវៀតណាម ៨នាក់ នៅខណ្ឌពោធិ៍សែនជ័យ
× ភ្នំពេញ៖ កម្លាំងនគបាលអន្តោប្រវេសន៍បានឃាត់ខ្លួនជនអន្តោប្រវេសន៍វៀតណាមចំនួន ៨នាក់ កំពុងរស់នៅ និងធ្វើការខុសច្បាប់ ក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ប្រធាននាយកដ្ឋានស៊ើបអង្កេត និងអនុវត្តនីតិវិធីលោក អ៊ុក ហៃសីឡា បានបន្តចុះត្រួតពិនិត្យរកជនបរទេសអន្តោប្រវេសន៍ខុសច្បាប់ ក្នុងរាជធានីភ្នំពេញ នៅព្រឹកថ្ងៃទី៦ ខែកញ្ញានេះ។
លោកឧត្តមសេនីយ៍ទោ បានឲ្យដឹងក្រោយប្រតិបត្តិការឆែកឆេរជនបរទេស នៅសង្កាត់ចោមចៅថា សមត្ថកិច្ចបានឃាត់ខ្លួនជនជាតិវៀតណាម៨នាក់ ក្នុងនោះ ស្រីម្នាក់ កំពុងរស់នៅ និងធ្វើការខុសច្បាប់ ស្ថិតក្នុងភូមិត្រពាំងថ្លឹង សង្កាត់ចោមចៅ។
លោកបន្តថា ជនជាតិវៀតណាមស្រីម្នាក់ មានកាន់លិខិតឆ្លងដែន និងវៀតណាម៣នាក់ទៀត មានទិដ្ឋាការស្នាក់នៅ តែពួកគេគ្មានសៀវភៅការងារ។ រីឯ អន្តោប្រវេសន៍ផ្សេងទៀតមានតែអត្តសញ្ញាណប័ណ្ណសញ្ជាតិវៀតណាមប៉ុណ្ណោះ។
បើតាមប្រធាននាយកដ្ឋានស៊ើបអង្កេតរូបនេះ សមត្ថកិច្ចបានខ្លួនអន្តោប្រវេសន៍វៀតណាមទាំងនេះ មកអគ្គនាយកដ្ឋានអន្តោប្រវេសន៍ ដើម្បីផាកពិន័យ តាមច្បាប់កម្ពុជា៕
Tag:
អន្តោប្រវេសន៍
អ៊ុក ហៃសីឡា
© រក្សាសិទ្ធិដោយ thmeythmey.com