ក្រុមនិស្សិត និងអាណាព្យាបាលសិស្ស យំស្ដាយវីរបុរសរបស់កុមារនៅស្ទឹងមានជ័យ

ក្រុមនិស្សិត យុវជន និងអាណាព្យាបាលសិស្ស នាំគ្នាគោរពវិញ្ញាណក្ខន្ធលោក គ្រីស្យង់ ហ្គោកឺឡាំង ដេប៉ាលីយ៉ែរ (Christian GAUQUELIN des PALLIERES) ជនជាតិបារាំង ហៅ Papy ដែលជាស្ថាបនិកអង្គការដើម្បីភាពញញឹមនៃកុមារ (PSE) ។ ក្រុមនិស្សិត យុវជន ដែលធ្លាប់បានទទួលការជួយសង្គ្រោះពីលោក Papy បានយំសោកស្ដាយស្រណោះអាឡោះអាល័យវិរបុរស ដែលបានជួយកុមារនៅតាមគំនសំរាម រាប់ពាន់នាក់ជាង២០ឆ្នាំមកនេះ។

លោក គ្រីស្យង់ ហ្គោកឺឡាំង ដេប៉ាលីយ៉ែរ បានទទួលមរណភាពដោយរោគាពាធនៅថ្ងៃទី២៤ ខែកញ្ញា ឆ្នាំ២០១៦ នាវេលាម៉ោង៦ និង៥៨នាទី ក្នុងជន្មាយុ៨២ឆ្នាំ។ សពលោក គ្រីស្យង់ ហ្គោកឺឡាំង ដេប៉ាលីយ៉ែរ នឹងត្រូវតម្កល់ធ្វើបុណ្យតាមប្រពៃណីនៅក្នុងអង្គការដើម្បីភាពញញឹមនៃ កុមារ ដែលមានអាស័យដ្ឋានផ្ទះលេខ៤០២ ភូមិទ្រា សង្កាត់ស្តឹងមានជ័យ ខណ្ឌមានជ័យ ភ្នំពេញ (ក្បែរផ្សាសឡា) ហើយនឹងត្រូវដង្ហែទៅកាន់វត្តឫស្សីសាញ់ នៅថ្ងៃច័ន្ទ ទី២៦ ខែកញ្ញា ឆ្នាំ២០១៦ វេលាម៉ោង ១ រសៀល។

លោក គ្រីស្យង់ និងភរិយា Marie-France បានបង្កើតអង្គការដើម្បីភាពញញឹមនៃកុមារ (PSE) តាំងពីឆ្នាំ១៩៩៥ មក ហើយបានជួយដល់កុមារដែលរស់នៅម្តុំស្ទឹងមានជ័យ ជាយរាជធានីភ្នំពេញ ជាពិសេសនៅគំនរសំរាម ជាច្រើនពាន់នាក់ តាមរយៈការផ្តល់ឱកាសសិក្សា ការស្នាក់នៅ អាហារ និងការទំនុកបម្រុងផ្សេងៗ។ សប្បុរសជនទាំងពីរត្រូវបានគេហៅថា Papy Mami ដែលត្រូវបានគេចាត់ទុកថា ជាឪពុកម្តាយទីពីររបស់កុមារកម្ពុជា៕