ជាតិ
នយោបាយជាតិ
៤ខែហើយ ដែលប្រធានស្តីទីបក្សប្រឆាំង ធ្វើកូដកម្មឃុំខ្លួននៅបក្ស ដើម្បីប្រឆាំងនឹងប្រព័ន្ធតុលាការ
× ភ្នំពេញ៖ រយៈពេល៤ខែហើយ ដែលប្រធានស្តីទីគណបក្សសង្គ្រោះជាតិ ឯកឧត្តម កឹម សុខា ឃុំខ្លួននៅទីស្នាក់ការគណបក្ស ក្រោយពីមានការតាមឃាត់ខ្លួនពីសំណាក់អាជ្ញាធរ កាលពីថ្ងៃទី២៦ ឧសភាកន្លងមក។ ឯកឧត្តម កឹម សុខា សម្រេចចិត្តធ្វើកូដកម្មឃុំខ្លួននៅបក្ស ដើម្បីប្រឆាំងនឹងប្រព័ន្ធតុលាការ ដែលលោកចាត់ទុកថា ប្រព័ន្ធតុលាការត្រូវបានប្រើប្រាស់ មកគាបសង្កត់មតិរបស់គណបក្សប្រឆាំង។
មកដល់ពេលនេះឯកឧត្តម កឹម សុខា ត្រូវបានតុលាការកាត់ទោសឲ្យជាប់ពន្ធនាគារ៦ ខែ និងពិន័យប្រាក់៨លានរៀល ពីបទ«បដិសេធក្នុងការចូលខ្លួន»ក្នុងនាមសាក្សីក្នុងសំណុំរឿងសញ្ចារកម្ម ។ តុលាការនឹងប្រកាសសាលក្រមស្ថាពរលើករណីឯកឧត្តម កឹម សុខា នៅថ្ងៃទី១៦ ខែតុលា ខាងមុខនេះ ។ តែយ៉ាងណាមេធាវីការពារក្តីលោក កឹម សុខា នឹងដាក់ពាក្យប្តឹងទៅឧទ្ធរណ៍ ដើម្បីប្ដឹងជំទាស់និងការសម្រេចរបស់តុលាការក្រុងភ្នំពេញ មុនការសម្រេចសាលក្រមស្ថាពរ។
ចំណែកប្រធានស្តីទីគណបក្សសង្គ្រោះជាតិ លោក កឹម សុខា និងតំណាងរាស្ត្រខ្លួន បានត្រឹមតែថ្កោលទោសនិងរិះគន់នីតិវិធីរបស់តុលាការថា ត្រូវបានប្រើប្រាស់ដើម្បីធ្វើទុក្ខបុកម្នេញគណបក្សប្រឆាំង។ ឯកឧត្តម កឹម សុខា ប្រកាសធ្វើកូដកម្មនយោបាយដោយសម្រេចឃុំខ្លួន នៅទីស្នាក់ការគណបក្ស ដើម្បីប្រឆាំងនឹងសេចក្ដីសម្រេចរបស់តុលាការ ដែលរំលោភលើអភ័យឯកសិទ្ធិលោក និងតំណាងរាស្ត្រខ្លួន។
ត្រង់ចំណុចនេះអ្នកវិភាគយល់ឃើញថា នេះគឺជាយុទ្ធសាស្ត្រឯកឧត្តម កឹម សុខា ដែលកំពុងឃុំសេរីភាពខ្លួនឯង ដើម្បីបង្ហាញមហាជនពីភាពអយុត្តិធម៌មកលើខ្លួន និងមន្ត្រីគណបក្ស ដែលជាយុទ្ធសាស្ត្រមួយក្នុងការទាញបានប្រជាប្រិយភាពសម្រាប់គណបក្សមុនពេលបោះឆ្នោតមកដល់ផងដែរ។ តែសម្រាប់អ្នកវិភាគ ការចូលតុចរចាដោះស្រាយបញ្ចប់បញ្ហានយោបាយ ដោយសម្បទាននយោបាយឲ្យគ្នាទៅវិញទៅមក តាមរយៈវប្បធម៌សន្ទនា គឺជាវិធីមួយដ៏ល្អ សម្រាប់អ្នកនយោបាយដែលជាប់ឆ្នោតក្នុងរដ្ឋសភាទាំងពីរគណបក្ស អាចមានពេលមកគិតដោះស្រាយបញ្ហាប្រជាពលរដ្ឋ និងគិតពីផលប្រយោជន៍ជាតិច្រើនជាងឈ្លោះគ្នា។
ជុំវិញបញ្ហានេះថ្នាក់ដឹកនាំគណបក្សសង្គ្រោះជាតិ បង្ហាញជំហខ្លួនថា នៅតែចង់ជួបចរចាដោះស្រាយបញ្ចប់នយោបាយជាមួយគណបក្សប្រជាជនកម្ពុជា។ តែមិនទាន់មានច្រកចរចាឡើយ ដោយសារគណបក្សប្រជាជនកម្ពុជា បដិសេធមិនជួបចរចា ក្រោមហេតុផលថា បញ្ហារបស់ឯកឧត្តម កឹម សុខា និងតំណាងរាស្ត្រ និងសកម្មជនមន្ត្រីគណបក្សប្រឆាំង គឺជារឿងបុគ្គល ដោយមិនជាប់ពាក់ព័ន្ធនឹងរឿងនយោបាយឡើយ៕
© រក្សាសិទ្ធិដោយ thmeythmey.com