អង្គការស៊ីប៉ា សម្ពោធបណ្ណាល័យក្នុងរោងចក្រ TY Fashion នៅខេត្តកណ្ដាល

ជាតិ

អត្ថបទពាណិជ្ជកម្ម

អង្គការស៊ីប៉ា សម្ពោធបណ្ណាល័យក្នុងរោងចក្រ TY Fashion នៅខេត្តកណ្ដាល

09, Oct 2016 , 10:52 am

រូបភាព

ដោយ:

កណ្ដាល៖ អង្គការស៊ីប៉ា(Sipar) នៅថ្ងៃទី៧ខែតុលា បានសម្ពោធបណ្ណាល័យមណ្ឌលធនធាន នៅរោងចក្រ TY Fashion ដែលស្ថិតនៅស្រុកពញ្ញាឮ ខេត្តកណ្ដាល ដើម្បីលើកកម្ពស់ការយល់ដឹងរបស់កម្មករកាត់ដេរ។

នៅថ្ងៃសម្ពោធបណ្ណាល័យទី៩ នេះ ស៊ីប៉ាបានចេញសេចក្ដីប្រកាសព័ត៌មាន ដែលឲ្យដឹងថា បណ្ណាល័យមណ្ឌលធនធាន គឺជាផ្នែកមួយនៃគម្រោង«ការអភិវឌ្ឍផ្នែកអប់រំ និងសង្គមសម្រាប់កម្មករក្នុងវិស័យកាត់ដេរនៅកម្ពុជា» ដែលអង្គការស៊ីប៉ាអនុវត្តក្នុងរយៈពេលបីឆ្នាំ ក្រោមជំនួយហិរញ្ញប្បទានរួមគ្នាពីទីភ្នាក់ងារបារាំងសម្រាប់ការអភិវឌ្ឍន៍(AFD) និងមូលនិធី Weave our Future of Auchan Retail ។

លោក ហុក សុទ្ធិ នាយកអង្គការស៊ីប៉ា ថ្លែងប្រាប់អ្នកសារព័ត៌ក្នុងពិធីសម្ពោធបណ្ណាល័យនេះថា ការបង្កើតបណ្ណាល័យនេះឡើង នឹងរូមចំណែកបណ្ដុះវប្បធម៌អានសៀវភៅ និងការស្រាវជ្រាវ ដល់កម្មករនៅតាមរោងចក្រ ខណៈដែលកម្មករភាគច្រើនរៀនបានតិចតួចនៅសាលា។ លោកបញ្ជាក់ថា តាមរយៈបណ្ណាល័យនេះ កម្មករអាចរៀនសូត្រចំណេះដឹងទូទៅមួយចំនួនទាក់ទងជីវភាពរស់នៅ ដូចជាបញ្ហាសុខភាព និងអនាម័យជាដើម។ លោកបន្តថា ការអានសៀវភៅក៏ជួយឲ្យកម្មករចេះគិតបានវែងឆ្ងាយ ដែលអាចឲ្យពួកគាត់អភិវឌ្ឍន៍ខ្លួនបានប្រសើរ។

បើតាមលោក ហុក សុទ្ធិ ស៊ីប៉ានឹងបង្កើតបណ្ណាល័យមណ្ឌលធនធានឲ្យបានចំនួន១៨ នៅតាមរោងចក្រកាត់ដេរនៅឆ្នាំ២០១៨ ខាងមុខ។ លោកថា ក្រោយគម្រោងរបស់ស៊ីប៉ាបានញ្ចប់ រោងចក្រនីមួយៗ ត្រូវបន្តដំណើរការបណ្ណាល័យទាំងនេះទៀត។ លោកថ្លែងទៀតថា ក្រៅពីសៀវភៅនិងសម្ភារបណ្ណាល័យដែលផ្ដល់ជូនដោយស៊ីប៉ា ក្រុមហ៊ុនទូរស័ព្ទស្មាតក៏បានឧតត្ថម អាយផេត និងថេប្លេតមួយចំនួនដល់បណ្ណាល័យទាំងនេះផងដែរ។

លោក អេត ម៉ុន លីម នាយកទូទៅរបស់រោងចក្រ TY Fashion មានប្រសាសន៍ថា ក្រុមហ៊ុនតែងតែយកចិត្តទុកដាក់ចំពោះការគ្រប់គ្រងធនធានមនុស្ស និងអត្ថប្រយោជន៍របស់បុគ្គលិក ដោយផ្ដល់ការបណ្ដុះបណ្ដាលនានា ដើម្បីបង្កើនផលិតភាពការងារ និងលើកកម្ពស់ជីវភាពរបស់កម្មករនិយោជិត។ លោកបន្ថែមថា ដោយមានជំនួយបច្ចេកទេសពីអង្គការស៊ីប៉ា ក្រុមហ៊ុននឹងបន្តអភិវឌ្ឍការគ្រប់គ្រង និងការប្រើប្រាស់បណ្ណាល័យឲ្យកាន់តែល្អ ដើម្បីផ្ដល់ឱកាសដល់កម្មករក្នុងការពង្រីកចំណេះដឹង និងបង្កើនទំនុកចិត្តទៅពេលអនាគត។

កញ្ញា ដៀប សំណាង វ័យ២៤ឆ្នាំ ដែលបម្រើការងារជាកម្មការនីកាត់ដេរក្នុងរោងចក្រ TY Fashion បានបង្ហាញការត្រេកអរចំពោះការបង្កើតបណ្ណាល័យនេះ។ កញ្ញាថ្លែងយ៉ាងដូច្នេះថា៖«សប្បាយចិត្ត ពេលមានបណ្ណាល័យ។ ខ្ញុំរៀនបានតិច តែអាចអានបាន។ ខ្ញុំនឹងអានសៀវភៅពីចំណេះដឹងទូទៅ សៀវភៅអ្វីក៏ដោយ គឺធ្វើឲ្យយើងចេះដឹងអ៊ីចឹង »។ កម្មការនីរូបនេះ ប្រាប់ថា រូបនាងនឹងឆ្លៀតចូលអានសៀវភៅក្នុងបណ្ណាល័យ ប្រហែល ២០ ឬ៣០នាទី ក្នុងពេលដែលរូបនាងសម្រាកអាហារថ្ងៃត្រង់រយៈពេលមួយម៉ោង៕