ជាតិ
ខេត្តចំនួន៦ ប្រឈមនឹងជំនន់ទឹកភ្លៀង
× ភ្នំពេញ៖ ក្រសួងធនធានទឹក និងឧតុនិយម បានឲ្យដឹងថា ខេត្តចំនួន៦ អាចនឹងប្រឈមនឹងជំនន់ទឹកភ្លៀងជាបន្ដបន្ទាប់ ដោយសារតែឥទ្ធិពលសម្ពាធទាប និងប្រព័ន្ធសម្ពាធទាប ចាប់ពីថ្ងៃទី១៣ ដល់១៧ ខែតុលា។ នេះបើតាមសេចក្ដីជូនដំណឹងរបស់ក្រសួងចុះថ្ងៃទី១២ តុលា។
ក្រសួងធនធានទឹក បានបញ្ជាក់ថា ឥទ្ធិពលសម្ពាធទាប និងប្រព័ន្ធសម្ពាធទាបនេះ បង្កឲ្យមានភ្លៀងធ្លាក់ច្រើនស្ទើរទូទាំងប្រទេស និងបានបង្កជាជំនន់ទឹកភ្លៀងជាបន្ដបន្ទាប់ នៅខេត្តត្បូងឃ្មុំ ព្រៃវែង ស្វាយរៀង កណ្ដាល កំពង់ស្ពឺ និងខេត្តព្រះសីហនុ។
បើតាមក្រសួងធនធានទឹក ភ្លៀងនឹងនៅតែបន្តធ្លាក់រាយប៉ាយក្នុងបរិមាណច្រើនបន្ថែមទៀត ពិសេសនៅតំបន់ខ្ពង់រាប និងតំបន់ទំនាបកណ្ដាលភាគខាងលិច ។ ក្រសួងធនធានទឹក និងឧតុនិយម ក៏បានអំពាវនាវដល់ក្រសួង ស្ថាបន័ពាក់ព័ន្ធ អាជ្ញាធរដែនដី និងប្រជាពលរដ្ឋបង្កើនការប្រុងប្រយ័ត្ន និងយកចិត្តទុកដាក់ខ្ពស់ ចំពោះជំនន់ទឹកភ្លៀង ដែលអាចកើតមានឡើងផងដែរ៕
© រក្សាសិទ្ធិដោយ thmeythmey.com