ជាតិ
ចិនជួយដំឡើងប្រព័ន្ធការពារអាកាសកម្ពុជា
× ភ្នំពេញ៖ ចិនបានឯកភាពដំឡើងប្រព័ន្ធការពារអាកាសកម្ពុជា ដើម្បីពង្រឹងពង្រីកសមត្ថភាពការពារកម្ពុជាឲ្យកាន់តែខ្លាំងកា្លឡើង។ នេះបើតាមរដ្ឋមន្ត្រីក្រសួងការពារជាតិ លោក ទៀ បាញ់។
សូមស្ដាប់សំឡេង៖
លោក ទៀ បាញ់ បានឲ្យដឹងថា ចិនបានឯកភាពជាមួយកម្ពុជា ជួយបង្កើនសមត្ថភាពវិស័យការពារជាតិកម្ពុជា ដើម្បីពង្រឹកពង្រីកវិស័យនេះឲ្យកាន់តែខ្លាំងមួយកម្រិតទៀត។ រដ្ឋមន្ត្រីការពារជាតិរូបនេះ បានឲ្យក្រុមអ្នកសារព័ត៌មានដឹងពីការសហការលើវិស័យការពារជាតិទ្វេរភាគីកាន់តែរឹងមាំ ក្រោយពីលោកបានចូលរួមវេទិកាសន្តិសុខ និងការពារជាតិ ពីថ្ងៃទី១០ ដល់ថ្ងៃទី១២ ខែតុលា នៅទីក្រុងប៉េកាំង សាធារណរដ្ឋប្រជាមានិតចិន។
«ជារួម ចិនបានឯកភាពហើយ នោះគឺជួយបង្កើនសមត្ថភាពខាងវិស័យការពាររបស់យើងខ្ញុំមួយកម្រិតទៀត»។ លោក ទៀ បាញ់ បានតបឆ្លើយនឹងសំណួរពីដំណើទស្សនៈកិច្ចនៅចិន កន្លងទៅ ក្រោយជំនួបពិភាក្សាជាមួយលោក Wang Hong Li នាយសេនាធិការ កងនាវាសមុទ្រចិននៅថ្ងៃទី១៧ ខែតុលានេះ ក្នុងក្រសួងការពារជាតិ។
លើសពីនេះទៀត រដ្ឋមន្ត្រីការពារជាតិខ្មែររូបនេះ ថា ចិន បាននិងកំពុងជួយដំឡើងប្រព័ន្ធការពារអាកាសកម្ពុជាដែលនឹងអនុវត្តនាពេលឆាប់ៗ ខាងមុខនេះឲ្យកាន់តែខ្លាំង។
ពាក់ព័ន្ធនឹងវិស័យការពារជាតិដដែល លោក ទៀ បាញ់ បានបង្ហើបឲ្យដឹងពីគម្រោងបញ្ជាទិញនាវា និងយន្តហោះចម្បាំងចិនផងដែរ ដើម្បីពង្រីកកម្លាំងការពារជាតិខ្មែ។ តែយ៉ាងណា រដ្ឋមន្ត្រីការពាររូបនេះ មិនទាន់លម្អិតព័ត៌មានការពារជាតិដែលកំពុងខ្វះខាតនេះឡើយ ដោយលោកគ្រាន់តែនិយាយថា ភាគីទាំងពីរ នឹងសហការគ្នាតាមដំណាក់កាលអាទិភាពនីមួយៗ ។
គួរជម្រាបជូនផងដែរ គេសង្កេតថា ការពង្រឹងសមត្ថភាពការពារជាតិភាគីទាំងពីរកាន់តែខ្លាំងក្រោយជំនួបការងាររវាងសម្តេចនាយករដ្ឋមន្ត្រី ហ៊ុន សែន និងប្រធានាធិបតីចិន លោក ស៊ី ជិនពីង នៅវិមានសន្តិភាព កាលពីថ្ងៃទី១៣ ខែតុលា ឆ្នាំ២០១៦ ដោយចិនបានបន្ថែមប្រាក់ជំនួយ ១០០លានយ័ន ស្មើនឹងជាង ១០លានដុល្លារអាមេរិកថែមទៀត សម្រាប់ជួយវិស័យយោធាកម្ពុជាផងដែរ៕
Tag:
ទៀ បាញ់
ចិន
ការពារជាតិ
© រក្សាសិទ្ធិដោយ thmeythmey.com