ជាតិ
×![]()
តំណាងរាស្ត្រគណបក្សសង្គ្រោះជាតិ លោក សុន ឆ័យ បានសម្តែងការហួសចិត្តចំពោះចំណាត់ការរបស់សាលាដំបូងរាជធានីភ្នំពេញ លើករណីសមាជិកព្រឹទ្ធសភា លោក ហុង សុខហួរ។ លោកបានថ្លែងប្រាប់អ្នកសារព័ត៌មានថា កំពុងយកករណីនេះមកលេចសើច។
នាព្រឹកថ្ងៃពុធ ទី២៦ ខែតុលា នេះ សាលាដំបូងរាជធានីភ្នំពេញ បានបើកសវនាការលើសំណុំរឿងក្លែងបន្លំឯកសារសាធារណៈ ការប្រើប្រាស់ឯកសារសាធារណៈក្លែង និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ដោយមានជនជាប់ចោទឈ្មោះ ហុង សុខហួរ។
អ្វីដែលគួរឲ្យកត់សម្គាល់នោះ ក្នុងលិខិតអញ្ជើញលោក ជូង ជូងី ដែលជាមេធាវី លោក សៀង សុខ ព្រះរាជអាជ្ញារងសាលាដំបូងរាជធានីភ្នំពេញ បានសរសេរថា លោក ហុង សុខហួរ កើតនៅថ្ងៃទី១៨ ខែមីនា ឆ្នាំ២០១៥ ដែលមានន័យថា សមាជិកព្រឹទ្ធសភា រូបនេះ មានអាយុតែជាង១ខួបប៉ុណ្ណោះ។
ដោយឡែកនាសវនាកានៅថ្ងៃនេះ តំណាងរាស្ត្រគណបក្សប្រឆាំង អ្នកសារព័ត៌មាន និងអ្នកសង្កេតការណ៍បាននាំគ្នារង់ចាំមើលដំណើរការសវនាការដែលបានព្រៀងទុក។ ប៉ុន្តែរហូតមកដល់ម៉ោងជាង១០ សវនាការ មិនបានដំណើរការឡើយ ដោយសារតែមានការដឹកជនជាប់ចោទច្រឡំ។ បើតាមលោក សុន ឆ័យ ជនជាប់ចោទនោះ មានឈ្មោះថា «ហួរ» ដូចគ្នា។
នៅមុនដើរចេញពីបន្ទប់សវនាកា លោក សុន ឆ័យ បាននិយាយទាំងហួសចិត្តថា ករណីនេះ មានការលេងសើចច្រើន៕
Tag:
ហុង សុខហួរ
© រក្សាសិទ្ធិដោយ thmeythmey.com
