ជាតិ
សពលោក ប៉ែន សុវណ្ណ បានដង្ហែមកដល់ភ្នំពេញហើយ
× ភ្នំពេញ៖ សពលោក ប៉ែន សុវណ្ណ ដែលជាសមាជិករដ្ឋសភាពីគណបក្សសង្គ្រោះជាតិ បានដង្ហែមកដល់រាជធានីភ្នំពេញហើយ នៅម៉ោង ១រសៀល នាថ្ងៃទី២ ខែវិច្ឆិកា ឆ្នាំ២០១៦នេះ។ នៅពេលនេះ សពលោក ប៉ែន សុវណ្ណ កំពុងរៀបចំតម្កល់ទុកក្នុងវត្តនួនមណីរាម ហៅវត្តថាន់។
ការដង្ហែសពលោក ប៉ែន សុវណ្ណ ពីខេត្តតាកែវ មកកាន់រាជធានីភ្នំពេញ បានចំណាយពេលប្រហែល៥ម៉ោង។ ចាប់តាំងពី៨ព្រឹកមក មន្ត្រីជាន់ខ្ពស់មួយចំនួនរបស់គណបក្សសង្គ្រោះជាតិ រួមទាំងប្រជាពលរដ្ឋរាប់រយនាក់ បានជិះឡាន និងម៉ូតូ ចូលរួមដង្ហែសព លោក ប៉ែន សុវណ្ណ ពីទីរួមខេត្តតាកែវ រហូតដល់រាជធានីភ្នំពេញ។
សពលោក ប៉ែន សុវណ្ណ នឹងត្រូវតម្កល់ទុកក្នុងវត្តថាន់ ក្នុងរយៈខ្លី មុនការបូជាឈានមកដល់។ គណបក្សសង្គ្រោះជាតិ រួមទាំងក្រុមគ្រួសារ គ្រោងបូជាសពលោក ប៉ែន សុវណ្ណ នៅមុខវត្តបទុមវត្តី នៅថ្ងៃទី៦ ខែវិច្ឆិកា ឆ្នាំ២០១៦។
យ៉ាងណាក៏ដោយ រហូតមកដល់ពេលនេះ គណបក្សសង្គ្រោះជាតិ ដែលទទួលបានសិទ្ធិពីក្រុមគ្រួសាររបស់លោក ប៉ែន សុវណ្ណ ក្នុងការចាត់ចែងពិធីបុណ្យ នៅមិនទាន់ប្រាប់បានទេថា សាលារាជធានីភ្នំពេញ នឹងផ្តល់ទីតាំងនៅមុខវត្តបទុមវត្តី សម្រាប់ការបូជា ឬក៏បដិសេធ។
ប៉ុន្តែ លោក ប៉ុល ហំម មន្ត្រីជាន់ខ្ពស់របស់គណបក្សសង្គ្រជាតិ បានបញ្ជាក់រួចហើយ ថា គណបក្សសង្គ្រោះជាតិ និងក្រុមគ្រួសាររបស់លោក ប៉ែន សុវណ្ណ នឹងពិភាក្សាគ្នាបន្តទៀត ក្នុងការស្វែងរកទីតាំងថ្មី ប្រសិនបើ សាលារាជធានីភ្នំពេញ មិនព្រមផ្តល់ទីតាំងនៅមុខវត្តបទុមវត្តី មែននោះ។
ចំណែកឯ សាលារាជធានីភ្នំពេញ ក៏មិនទាន់មានចម្លើយដែរ ជុំវិញសំណើខាងលើ។ លោក ឃួង ស្រេង អ្នកនាំពាក្យរបស់សាលារាជធានីភ្នំពេញ បានប្រាប់សារព័ត៌មានថ្មីៗកាលពីថ្ងៃចន្ទថា លោក មិនទាន់ទទួលបានលិខិតជាផ្លូវការណាមួយនោះទេ ទាក់ទងនឹងការស្នើសុំទីតាំងនៅមុខវត្តបទុមវត្តី សម្រាប់ការបូជាសពលោក ប៉ែន សុវណ្ណ។ ប៉ុន្តែ លោក ឃួង ស្រេង អះអាងថា ពេលដែលទទួលបានលិខិតនោះហើយ លោក នឹងពិនិត្យខ្លឹមសារ ថាត្រូវអនុញ្ញាតឬមិនអនុញ្ញាត។
តាមពិតទៅ រដ្ឋសភា បានបញ្ជូនលិខិតនោះទៅកាន់សាលារាជធានីភ្នំពេញរួចហើយ។ នេះបើតាមការអះអាងរបស់លោក ឡេង ប៉េងឡុង អ្នកនាំពាក្យរបស់រដ្ឋសភា។ លោក ឡេង ប៉េងឡុង លើកឡើងថា លោក នឹងបន្តតាមដានពីបញ្ហានេះ។
បើតាម លោក ឡេង ប៉េងឡុង ដដែល រដ្ឋសភាបានបង្កើតគណៈកម្មការមួយ ដែលមានលោក យ៉ែម បុញ្ញឫទ្ធិ តំណាងរាស្ត្រពីគណបក្សសង្គ្រោះជាតិ ជាប្រធាន ដើម្បីជួយជ្រោមជ្រែងក្រុមគ្រួសាររបស់លោក ប៉ែន សុវណុ្ណ ក្នុងការចាត់ចែងពិធីបុណ្យ។ លើសពីនេះ រដ្ឋសភា ក៏បានផ្តល់ថវិកាចំនួន៥០លានរៀល ដល់ក្រុមគ្រួសាររបស់លោក ប៉ែន សុវណ្ណ ផងដែរ។
លោក ប៉ែន សុវណ្ណ ដែលជាឧត្តមទីប្រឹក្សា និងជាតំណាងរាស្ត្រពីគណបក្សសង្គ្រោះជាតិ ហើយក៏ជាអតីតនាយករដ្ឋមន្ត្រី ក្នុងសម័យសាធារណរដ្ឋប្រជាមានិតកម្ពុជាផងនោះ បានទទួលមរណភាព ក្នុងជន្មាយុ៨០ឆ្នាំ ដោយរោគាពាធ កាលពីថ្ងៃទី២៩ ខែតុលា ឆ្នាំ២០១៦៕
© រក្សាសិទ្ធិដោយ thmeythmey.com