ជាតិ
អ្នកនិពន្ធ យូ បូ សុំសម្តេច ហ៊ុន សែន ឲ្យជួយលោកបានសម្រាកពេទ្យ
× លិខិតមិត្តអ្នកអាន
ព្រឹទ្ធាចារ្យ យូ បូ គឺអ្នកកាសែតជើងចាស់ជំនាន់១៩៦០ ហើយលោកក៏ជាគឺជាសមាជិកស្ថាបនិកក្លិបអ្នកកាសែតកម្ពុជា។
ក្រៅពីកិច្ចការក្នុងវិស័យសារព័ត៌មាន លោក យូ បូ គឺជាអ្នកនិពន្ធប្រលោមលោក និងកំណាព្យ ហើយក៏ជាអ្នកបកប្រែរឿងពីភាសាវៀតណាម មកជាភាសាជាតិផងដែរ។ លោកចេះភាសាវៀតណាម បារាំង និងចិនទាជីវ ល្មមអាចប្រើការបាន។ លោក យូបូ ធ្លាប់ធ្វើជាសាស្ត្រាចារ្យ នៅសាកលវិទ្យាល័យភូមិន្ទវិចិត្រសិល្បៈ។
ក្នុងអំឡុងទសវត្ស១៩៩០ ជាមួយនឹងអ្នកនិពន្ធផ្សេងទៀត លោកបានបង្កើត«សមាគមអ្នកនិពន្ធខ្មែរ»ឡើងវិញក្រោយការដួលរលំនៃរបបខ្មែរក្រហម។ នៅក្នុងជីវិតជាអ្នកដងប៉ាកកាកវីយូបូតែងដាស់តឿនកូនសិស្សថា«ត្រូវឈរលើស្មារតីស្រឡាញ់មនុស្សជាតិហើយត្រូវសរសេរដើម្បីកសាងមនុស្ស កសាងគ្រួសារ និងកសាងសង្គមជាតិ»។
កាលពីប្រមាណ១០ឆ្នាំមុន លោកបានរងគ្រោះថ្នាក់ចរាចរាណ៍ ដោយត្រូវម៉ូតូឌុបបុកប៉ះត្រូវឆ្អឹងឆ្នងនិងចង្កេះ ហើយបន្តឈឺដើរមិនសូវបានរួមទាំងជំងឺទឹកនោមផ្អែមទៀតផង។
ក្រោយពេលជួបគ្រោះថ្នាក់ចរាចរណ៍នោះមក លោកត្រូវសម្រាកនៅផ្ទះរហូតមក។ លោក យូ បូ រំពឹងថា បើខ្លួនបានជាសះស្បើយ លោកនឹងត្រឡប់ទៅបង្រៀននិងចែករំលែកបទពិសោធដល់កូនសិស្សខ្មែរជាបន្តទៀត។
សព្វថ្ងៃ លោករស់នៅដោយសារកូនចិញ្ចឹម និងខ្លួនមានជំងឺប្រចាំកាយ ពុំមានលទ្ធភាពព្យាបាលនោះទេ។ ព្រឹទ្ធាចារ្យរូបនេះ ចង់ផ្ញើដំណឹងដល់ប្រមុខរដ្ឋាភិបាល ថាប្រសិនបើជាអាចជួយសម្រួលឲ្យលោកបានសម្រាកនៅមន្ទីរពេទ្យណាមួយ លោកនឹងអរគុណជាអនេក។
ទន្ទឹមនឹងនេះ សាស្ត្រាចារ្យវ័យ៧៥ឆ្នាំរូបនេះ ផ្តាំកូនសិស្សជិតឆ្ងាយទាំងឡាយ ឲ្យឆ្លៀតទៅលេងលោកផង៕
© រក្សាសិទ្ធិដោយ thmeythmey.com