ជាតិ
វីដេអូនិយាយពីអារម្មណ៍ជនរងការបំពានផ្លូវភេទក្នុងរបបខ្មែរក្រហម នឹងចាក់ផ្សាយជាសាធារណៈ
×
ភ្នំពេញ៖ ផលិតកម្មខ្មែរមេគង្គ នឹងចាក់ផ្សាយវីដេអូនិយាយពីអារម្មណ៍របស់ជនរងគ្រោះ ដែលរងការចាប់បង្ខំឲ្យរៀបការ ការលោភបំពានផ្លូវភេទ និងការរើសអើងភេទ ក្នុងរបបខ្មែរក្រហម តាមទូរទស្សន៍ ចាប់ពីខែធ្នូ ឆ្នាំ២០១៦នេះ។
វីដេអូដែលមានរយៈពេលជិត៣០នាទី និយាយពីអារម្មណ៍ជនរងគ្រោះ ដែលរងការរំលោភបំពានផ្លូវភេទ និងយេនឌ័រ ការរៀបការដោយបង្ខំ ក្នុងរបបកម្ពុជាប្រជាធិបតេយ្យ នឹងត្រូវចាក់ផ្សាយតាមទូរទស្សន៍ ដល់សាធារណជនទាំងក្នុង និងក្រៅប្រទេសលើទូរទស្សន៍ឯកជន CTN និង MYTV និងបណ្តាប្រព័ន្ធផ្សព្វផ្សាយសង្គម នៅខែធ្នូ ឆ្នាំ២០១៦នេះ។ វីដេអូនេះ ផលិតដោយ ផលិតកម្មខ្មែរមេគង្គក្រោមជំនួយឧបត្ថម្ភរបស់ស្ថានទូតអង់គ្លេស ប្រចាំកម្ពុជា។
KMF បានសម្ភាសន៍ជនរងគ្រោះ អ្នកច្បាប់ និងអ្នកស្រាវជ្រាវជាង ២០ រូប ក្នុងវីដេអូជិត ៣០នាទីពាក់ព័ន្ធនឹងសំណុំរឿង ០០២ វគ្គ១ ពីឆ្នាំ ២០១១ ដល់សំណុំរឿង ០០២ វគ្គ២ ក្នុងឆ្នាំ២០១៦នេះ។
លោក Olivier Van Bockstael ផលិតករភាពយន្តប្រចាំ KMF បានឲ្យដឹងពីបំណងនៃការផលិតកម្មវិធីនេះ ថាចង់បង្ហាញអំពើឧក្រិដ្ឋលើមនុស្សជាតិនៅកម្ពុជា។ សម្រាប់ផលិតកររូបនេះ វីដេអូនេះ ជាការរួមចំណែកជួយឲ្យជនរងគ្រោះ មានឱកាសបង្ហាញការពិតក្នុងរបបកម្ពុជាប្រជាធិបតេយ្យ ដល់ពលរដ្ឋខ្មែរទូទៅ និងអ្នកសិក្សាស្រាវជ្រាវទាំងជាតិ និងអន្តរជាតិ។ លោក Olivier បញ្ជាក់យ៉ាងដូច្នេះថា៖«នេះជាបង្ហាញប្រវត្តិសាស្ត្រនៃអំពើហិង្សាក្នុងរបបខ្មែរក្រហម និងឥទ្ធិពលប៉ះពាល់ដល់ស្ត្រីក្នុងសង្គមខ្មែរបច្ចុប្បន្ន។ យើងផ្តល់ឱកាសឲ្យជនរងគ្រោះបង្ហាញការឈឺចាប់របស់ខ្លួន»។
ឯកអគ្គរាជទូតអង់គ្លេសប្រចាំកម្ពុជា លោក Bill Longhurst បានថ្លែងចំពោះមុខអ្នកចូលរួមប្រមាណ៥០នាក់ មកពីអង្គការក្រៅរដ្ឋាភិបាល អ្នកច្បាប់ និងតំណាងសាលាក្តីខ្មែរក្រហមថា លោកជឿជាក់ថា វីដេអូនឹងផ្តល់ការពិតថែមទៀតដល់ប្រជាជនកម្ពុជា។ លោក Bill បញ្ជាក់ដូច្នេះថា៖«វាមានសារៈសំខាន់ណាស់ ដែលពលរដ្ឋត្រូវយល់ពីការពិតក្នុងប្រវត្តិសាស្ត្រ នឹងនាំឲ្យការអភិវឌ្ឍមាននិរន្តភាព»។
ដោយឡែក មន្ត្រីផ្នែកច្បាប់នៅសាលាក្តីខ្មែរក្រហម (ECCC) លោក Lars Olsen យល់ថា វីដេអូនេះ នឹងផ្តល់សារដល់ពលរដ្ឋឲ្យចូលរួមបង្ហាញការពិតនូវទង្វើពួកគេបានឆ្លងកាត់ក្នុងរបបកម្ពុជាប្រជាធិបតេយ្យ។ លោកនិយាយថា៖«ការអនុវត្តច្បាប់ គឺផ្អែកតាមភស្តុតាង និងសាក្សីពលរដ្ឋដែលបានឆ្លងកាត់អំពើទាំងនេះ»។
គួរជម្រាបថា លោក នួន ជា អតីតប្រធានសភាជាតិក្នុងរបបកម្ពុជាប្រជាធិបតេយ្យ និងជាលេខារងបក្សកុំមុយនីស្តកម្ពុជា និងលោក ខៀវ សំផន អតីតប្រធានរដ្ឋកម្ពុជាប្រជាធិបតេយ្យ ជាជនជាប់ចោទក្នុងសំណុំរឿង ០០២ វគ្គ១ និង០០២ វគ្គ២ ។ តុលាការខ្មែរក្រហម បានផ្តន្ទាទោសអ្នកទាំងពីរឲ្យជាប់ពន្ធនាគារអស់មួយជីវិត ពីឧក្រិដ្ឋកម្មប្រឆាំងមនុស្សជាតិឧក្រិដ្ឋកម្មប្រឆាំងមនុស្សជាតិ ក្នុងសំណុំរឿង០០២ វគ្គ១ កាលខែសីហា ឆ្នាំ២០១៤ កន្លងទៅ។ រីឯ សំណុំរឿង០០២ វគ្គ២ តុលាការបាន និងកំពុងបន្ត ចាប់ពីខែសីហា ឆ្នាំ២០១៦ រហូតមក៕
Tag:
ខ្មែរក្រហម
Bill Longhurst
អង់គ្លេស
KMF
© រក្សាសិទ្ធិដោយ thmeythmey.com