អន្តរជាតិ
នយោបាយអន្តរជាតិ
ហ៊ីឡារី៖«វាជារឿងឈឺចាប់ តែយើងត្រូវបើកចិត្តនិងផ្តល់ឱកាសឲ្យ ដូណាល់ ត្រាំ ដឹកនាំប្រទេស»
×![]()
លោកស្រី ហ៊ីឡារី គ្លីនតុន បានប្រកាសទទួលស្គាល់ការបរាជ័យក្នុងការប្រជែងយកតំណែងប្រធានាធិបតីនៅព្រឹកថ្ងៃពុធទី ៩វិច្ឆិកានៅទីក្រុង ញូវយ៉ក។ លោកស្រី បញ្ជាក់ថា វាជាការឈឺចាប់មួយរយៈពេលវែងមួយ ប៉ុន្តែលោកស្រីជឿជាក់លើសហរដ្ឋអាមេរិក និងអំពាវនាវឲ្យប្រជាជនដែលជាអ្នកគាំទ្រជឿជាក់លើលោក ដូណាល់ ត្រាំ ដែលនឹងដឹកនាំអាមេរិកបួនឆ្នាំទៅមុខ។
«វាមិនមែនជាលទ្ធផលដែលយើងទាំងអស់គ្នាចង់បាននិងប្រឹងប្រែងធ្វើគ្រប់យ៉ាងដើម្បីទទួលបានវាទេ។ខ្ញុំដឹងថាអ្នកទាំងអស់គ្នាខកចិត្តខ្លាំងប៉ុណ្ណា ព្រោះខ្ញុំមានអារម្មណ៍ដូចគ្នា។ វា ជាការឈឺចាប់មួយដ៏ធំធេង ហើយវានឹងនៅតែដក់ជាប់ក្នុងចិត្តយើងទៅមុខទៀត »។ លោកស្រី ហ៊ីឡារី គ្លីនតុន ថ្លែងបែបនេះដោយប្រឹងញញឹមនិងមានទឹកភែ្នករលីងរលោងផង នៅចំពោះមុខអ្នកគាំទ្រលោកស្រី នៅទីក្រុងញូវយ៉ក នាព្រឹកថ្ងៃពុធ។
លោកស្រី ហ៊ីឡារី គ្លីនតុន ថ្លែងសុន្ទរកថានេះ ក្រោយពេលដែលលទ្ធផលបោះឆ្នោតបង្ហាញថា លោក ដូណាល់ ត្រាំ ជាប់ឆ្នោតនិងក្លាយជាប្រធានាធិបតីទី ៤៥ របស់អាមេរិក។ ហើយលោកស្រីបានឆ្លៀតឱកាសនេះប្រកាសពីបរាជ័យរបស់ខ្លួនជាសាធារណៈនិងដាស់តឿនឲ្យអ្នកគាំទ្រលោកស្រីព្រមទទួលស្គាល់លទ្ធផលបោះឆ្នោតផង។
ជារួមក្នុងសុន្ទរកថារយៈពេលខ្លីរបស់លោកស្រី ពាក់ព័ន្ធលទ្ធផលបោះឆ្នោត លោកស្រី មិនបានលើកឡើងច្រើនពីលោក ដូណាល់ ត្រាំ ឡើយ។ លោកស្រីត្រឹមចង់បញ្ជាក់ថា សមរភូមិនយោបាយដែលប្រយុទ្ធគ្នាអស់រយៈពេលច្រើនខែមកនេះចប់ជាស្ថាពរហើយ។
លោកស្រីបេក្ខជនប្រធានាធិបតីរូបនេះបានបន្តថា លទ្ធផលបោះឆ្នោតបានបង្ហាញថា សង្គមអាមេរិកជាសង្គមដែលបែកបាក់គ្នាខ្លាំង ជាងអ្វីដែលលោកស្រីធ្លាប់គិត។ ប៉ុន្តែលោកស្រី បានសុំចិត្តអ្នកគាំទ្រខ្លួនឲ្យបើកចិត្តឲ្យទូលាយ និងផ្តល់ឱកាសឲ្យលោក ដូណាល់ ត្រាំ ដឹកនាំប្រទេសម្តង និងរំលឹកថា សង្គមអាមេរិក និងរដ្ឋធម្មនុញ្ញអាមេរិក កំណត់ជាស្រេចថា ការផ្ទេរអំណាចត្រូវធ្វើឡើងដោយសន្តិវិធី។
«យើងត្រូវតែទទួលលទ្ធផលនេះ។ លោក ដូណាល់ ត្រាំ នឹងក្លាយជាប្រធានាធិបតីរបស់យើងទាំងអស់គ្នា។ យើងត្រូវបើកចិត្តឲ្យទូលាយ និងផ្តល់ឱកាសឲ្យលោកដឹកនាំប្រទេស។ រដ្ឋធម្មនុញ្ញប្រជាធិបតេយ្យរបស់យើងចែងពីការផ្ទេរអំណាចដោយសន្តិវិធី។ យើងមិនត្រឹមតែគោរពគោលការណ៍នេះទេ តែយើងផ្តល់តម្លៃឲ្យវាថែមទៀត»។
ក្រោយដឹងថា លោក ដូណាល់ ត្រាំ ឈ្នះឆ្នោត លោកស្រី ហ៊ីឡារី គ្លីនតុន ក៏បានទូរសព្ទទៅលោកដើម្បីសាទរជ័យជម្នះនេះដែរ ហើយលោកស្រីក៏ត្រៀមខ្លួនជាស្រេចដើម្បីធ្វើការងារជាមួយលោក ដូណាល់ ត្រាំ ដើម្បីការរីកចម្រើនរបស់សហរដ្ឋអាមេរិកដែរ។ លោកស្រីក៏កម្លាចិត្តប្រជាជនដែលជាអ្នកគាំទ្រលោកស្រី ឲ្យបន្តជឿជាក់លើអ្វីដែលខ្លួនប្រឹងប្រែងធ្វើ និងជឿជាក់លើអ្វីដែលត្រឹមត្រូវ។
សូមបញ្ជាក់ថា លោក ដូណាល់ ត្រាំ នឹងក្លាយជាប្រធានាធិបតីទី ៤៥ របស់អាមេរិក ហើយលោកនឹងស្បថចូលកាន់តំណែងនៅថ្ងៃ ២០ ខែមករាឆ្នាំ ២០១៧។ គេកំពុងរង់ចាំមើលការអនុវត្តគោលនយោបាយនានារបស់លោក ដូណាល់ ត្រាំ ក្រោយពេលដែលលោកចូលកាន់តំណែង ខណៈដែលប្រជាជនមួយចំនួនទូទាំងពិភពលោកបារម្ភថា បញ្ហាអាចនឹងកើតមានឡើងច្រើន៕
Tag:
ហ៊ីឡារី
បោះឆ្នោតអាមេរិក
© រក្សាសិទ្ធិដោយ thmeythmey.com
