ជាតិ
លោកស្រីថាក់ ឡានី ជាប់ទោស១ឆ្នាំកន្លះ ពីបទបរិហារកេរ្តិ៍សម្តេច ហ៊ុន សែន
× ភ្នំពេញ៖ លោកស្រី ថាក់ ឡានី សមាជិកាព្រឹទ្ធសភា ពីគណបក្ស សម រង្ស៊ី ត្រូវបានសាលាដំបូងរាជធានីភ្នំពេញ ផ្តន្ទាទោសឲ្យជាប់ពន្ធនាគារចំនួន១ឆ្នាំកន្លះ ពីបទ «បរិហារកេរ្តិ៍ជាសាធារណៈ និងញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម»។ បណ្តឹងនេះ ត្រូវបានប្តឹងដោយ សម្តេច ហ៊ុន សែន នាយករដ្ឋមន្ត្រីកម្ពុជា។
ក្រៅពីផ្តន្ទាទោសឲ្យជាប់ពន្ធនាគារ ចៅក្រមជំនុំជម្រះ ក៏បានតម្រូវឲ្យលោកស្រី ថាក់ ឡានី បង់ប្រាក់ចំនួន៨លានរៀល ចូលរដ្ឋ និងបង់ត្រឹម១០០រៀល ដល់សម្តេច ហ៊ុន សែន ផងដែរ ដើម្បីជាការសងជំងីចិត្ត។ នេះបើតាមការអះអាងរបស់លោក សំ សុគង់ មេធាវីការពារក្តីឲ្យលោកស្រី ថាក់ ឡានី។
លោក សំ សុគង់ បានចាត់ទុកសេចក្តីសម្រេចរបស់សាលាដំបូងរាជធានីភ្នំពេញ ថាអយុត្តិធម៌សម្រាប់លោកស្រី ថាក់ឡានី។ ក្រុមមេធាវី នឹងពិភាក្សាគ្នាក្នុងការដាក់បណ្តឹងទៅកាន់សាលាឧទ្ធរណ៍ ដើម្បីប្រឆាំងនឹងការសម្រេចខាងលើ។
កន្លងមក លោក គី តិច ដែលជាមេធាវីរបស់សម្តេច ហ៊ុន សែន ធ្លាប់អះអាងថា សម្តេច ហ៊ុន សែន មិនចង់បានប្រាក់នោះទេ តែសម្តេច ចង់បញ្ជាក់ពីភាពស្អាតស្អំរបស់ខ្លួន។
សំណុំរឿងរបស់លោកស្រីថាក់ ឡានី សមាជិកាព្រឹទ្ធសភា ពីគណបក្សសម រង្ស៊ី ត្រូវបានសាលាដំបូងរាជធានីភ្នំពេញ បើកសវនាការ ជំនុំជម្រះ តាំងពីចុងខែតុលា ឆ្នាំ២០១៦មកម្លោះ។ ប៉ុន្តែ ចៅក្រមជំនុំជម្រះ បានពន្យារពេលប្រកាសសាលក្រម ដោយរង់ចាំប្រកាសនៅរសៀលថ្ងៃ១៧ ខែវិច្ឆិកា ឆ្នាំ២០១៦នេះឯង។
សម្តេច ហ៊ុន សែន បានពឹងពាក់លោកមេធាវី គី តិច ដើម្បីប្តឹងលោកស្រី ថាក់ ឡានី។ ការរងបណ្តឹងបែបនេះ គឺដោយសារតែ លោកស្រី ថាក់ ឡានី បានចោទសម្តេច ហ៊ុន សែន ថានៅក្រោយខ្នងនៃអំពើឃាតកម្មលើលោក កែម ឡី។
ក្រៅប្តឹងលោកស្រី ថាក់ ឡានី លោកគី តិច ក៏បានប្តឹងឯកឧត្តម សម រង្ស៊ី ផងដែរ។ សំណុំរឿងរបស់ឯកឧត្តម សម រង្ស៊ី ដែលបង្ហោះសារនៅលើទំព័រហ្វេសប៊ុក ដោយចោទរដ្ឋាភិបាលថា នៅពីក្រោយខ្នងនៃអំពើឃាតកម្មលើលោក កែម ឡី ក៏ត្រូវបានបញ្ជូនទៅជំនុំជម្រះរួចហើយ។ ប៉ុន្តែ ចៅក្រមជំនុំជម្រះ មិនទាន់បានកំណត់កាលបរិច្ឆេទនៃការបើកសវនាការ លើសំណុំរឿងរបស់ឯកឧត្តម សម រង្ស៊ី នោះទេ។
យ៉ាងណាក៏ដោយ បច្ចុប្បន្ននេះ ឯកឧត្តម សម រង្ស៊ី និងលោកស្រី ថាក់ ឡានី សុទ្ធតែនិរទេសខ្លួនទៅរស់នៅឯក្រៅប្រទេស បន្ទាប់ពីពួកគាត់ មានរឿងក្តីនៅតុលាការ៕
© រក្សាសិទ្ធិដោយ thmeythmey.com