លោក ប្រាក់ សុខុន ទៅទស្សនកិច្ចនៅបារាំង ពង្រឹងកិច្ចសហប្រតិបត្តិការរវាងប្រទេសទាំងពីរ

ជាតិ

លោក ប្រាក់ សុខុន ទៅទស្សនកិច្ចនៅបារាំង ពង្រឹងកិច្ចសហប្រតិបត្តិការរវាងប្រទេសទាំងពីរ

23, Nov 2016 , 8:30 am

រូបភាព

ដោយ: ថ្មីៗ

លោក ប្រាក់ សុខុន នឹងទៅទស្សនកិច្ចនៅបារាំងមួយថ្ងៃ គឺនៅថ្ងៃទី២៩ ខែវិច្ឆិកាខាងមុខ។ ទស្សនកិច្ចនេះ គឺដើម្បីពង្រឹងកិច្ចសហប្រតិបត្តិការរវាងប្រទេសទាំងពីរ។

លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នឹងដឹកនាំគណៈប្រតិភូ ទៅបំពេញទស្សនកិច្ចការងារ នៅប្រទេសបារាំង នាថ្ងៃទី២៩ ខែវិច្ឆិកា ឆ្នាំ២០១៦។ នេះបើយោងតាមសេចក្តីជូនដំណឹងរបស់ក្រសួងការបរទេស ចេញផ្សាយនៅថ្ងៃទី២២ ខែវិច្ឆិកា ឆ្នាំ២០១៦ ។

សេចក្តីជូនដំណឹងដដែល បញ្ជាក់ថាលោក ប្រាក់ សុខុន នឹងជួបពិភាក្សាការងារផ្លូវការជាមួយ លោក ហង្ស់ ម៉ាក អេរ៉ូ(Jean-Marc AYRAULT) រដ្ឋមន្ត្រីការបរទេស និងអភិវឌ្ឍន៍អន្តរជាតិនៃសាធារណរដ្ឋបារាំង ដើម្បីពង្រឹងកិច្ចសហប្រតិបត្តិការរវាងប្រទេសទាំងពីរ ពិសេសនៅក្នុងវិស័យនយោបាយ សេដ្ឋកិច្ច វប្បធម៌ និងពិភាក្សាលើប្រធានបទដែលជាប្រយោជន៍រួមនៃប្រទេសទាំងពីរ។

លោក ប្រាក់ សុខុន ក៏នឹងជួបជាមួយប្រធានក្រុមមិត្តភាពរដ្ឋសភា និងព្រឹទ្ធសភាបារាំង-កម្ពុជា ប្រធានមូលនិធិឆាលដឺហ្គោល និងទស្សនាសាលាបារាំងចុងបូព៌ាផងដែរ៕