ជាតិ
នយោបាយជាតិ
រូបថត ឯកឧត្តម កឹម សុខា នៅខាងឆ្វេង ឯកឧត្តម សម រង្ស៊ី នៅខាងស្តាំ នៅក្នុងកិច្ចប្រជុំរវាងក្រុមមតិភាគតិច និងភាគច្រើន កាលពីឆ្នាំ ២០១៥។
×![]()
រដ្ឋសភា បានប្រកាសទទួលស្គាល់នូវតំណែងចំនួន ២ របស់ឯកឧត្តម កឹម សុខា ក្នុងពេលតែមួយ គឺតំណែងជាប្រធានក្រុមតំណាងរាស្ត្រគណបក្សសង្គ្រោះជាតិប្រចាំរដ្ឋសភាផង និងតំណែងជាប្រធានក្រុមមតិភាគតិចនៅរដ្ឋសភាទៀត។ អ្នកនាំពាក្យគណបក្សប្រឆាំងនៅតែប្រកាន់ជំហរថា ឯកឧត្តម សម រង្ស៊ី គឺជាប្រធានក្រុមមតិភាគតិចនៅក្នុងរដ្ឋសភាតែម្នាក់គត់ ចំណែកឯកឧត្តម កឹម សុខា គ្រាន់តែជាប្រធានក្រុមតំណាងរាស្រ្តគណបក្សសង្គ្រោះជាតិប្រចាំរដ្ឋសភាតែប៉ុណ្ណោះ។ 
ការប្រកាសរបស់រដ្ឋសភា ឲ្យឯកឧត្តម កឹម សុខា កាន់តំណែងជាប្រធានក្រុមមតិភាគតិចនៅរដ្ឋសភាផង ជាប្រធានក្រុមតំណាងរាស្ត្រគណបក្សសង្គ្រោះជាតិប្រចាំរដ្ឋសភាផង បានធ្វើឲ្យមានភាពចម្រូងចម្រាសកើតឡើងរវាងការសម្រេចផ្ទៃក្នុងគណបក្សសង្គ្រោះជាតិ និងស្ថាប័នរដ្ឋសភា។ ខ្លឹមសារសំខាន់នៃសេចក្តីប្រកាសរបស់រដ្ឋសភា នៅថ្ងៃទី ៦ ខែធ្នូ ដែលចុះហត្ថលេខាដោយសម្តេច ហេង សំរិន ប្រធានរដ្ឋសភា បញ្ជាក់ដូច្នេះថា៖ «ប្រការ ១ ទទួលថ្នាក់ដឹកនាំតំណាងរាស្រ្តនៃគណបក្សសង្គ្រោះជាតិ ដែលមានសមាសភាពដូចតទៅ៖ ទី ១ ឯកឧត្តម កឹម សុខា ជាប្រធាន ទី ២ ឯកឧត្តម យឹម សុវណ្ណ ជាអនុប្រធាន ទី ៣ ឯកឧត្តម យ៉ែម បុញ្ញឫទ្ធិ ជាអនុប្រធាន។ ប្រការ ២ ទទួលស្គាល់ឯកឧត្តម កឹម សុខា ជាប្រធានក្រុមមតិភាគតិចនៅរដ្ឋសភា»។
ការប្រកាសទទួលស្គាល់របស់រដ្ឋសភាបែបនេះ ខុសស្រឡះពីការលើកឡើងរបស់ឯកឧត្តម សម រង្ស៊ី ប្រធានគណបក្សសង្គ្រោះជាតិ ដែលថ្លែងការពារតំណែងរបស់ខ្លួនតាមបណ្តាញសង្គម Twitter ថា តួនាទីប្រធានក្រុមមតិភាគតិចនៅរដ្ឋសភា ដើម្បីជជែកជាមួយសម្តេច ហ៊ុន សែន នៅតែជារបស់ឯកឧត្តម ចំណែកឯកឧត្តម កឹម សុខា អនុប្រធានគណបក្សសង្គ្រោះជាតិ គ្រាន់តែជាប្រធានក្រុមតំណាងរាស្ត្រគណបក្សសង្គ្រោះជាតិប្រចាំរដ្ឋសភាសម្រាប់ជជែកជាមួយសម្តេច ស ខេង តែប៉ុណ្ណោះ។
ឆ្លើយតបនឹងសេចក្តីប្រកាសទទួលស្គាល់តំណែងឯកឧត្តម កឹម សុខា របស់រដ្ឋសភា លោក យឹម សុវណ្ណ នៅតែប្រកាសជំហរតាមការសម្រេចផ្ទៃក្នុងគណបក្សសង្គ្រោះជាតិថា ឯកឧត្តម សម រង្ស៊ី គឺជាប្រធានក្រុមមតិភាគតិចនៅក្នុងរដ្ឋសភា ចំណែកឯកឧត្តម កឹម សុខា គឺជាប្រធានក្រុមតំណាងរាស្ត្រគណបក្សសង្គ្រោះជាតិប្រចាំរដ្ឋសភា។ « យើងនៅតែប្រកាន់ជំហរតាមការសម្រេចផ្ទៃក្នុងគណបក្សសង្គ្រោះជាតិដដែល។ ឯកឧត្តម សម រង្ស៊ី គឺជាប្រធានក្រុមមតិភាគតិចនៅរដ្ឋសភា»។ អ្នកនាំពាក្យគណបក្សសង្គ្រោះជាតិ បញ្ជាក់ប្រាប់សារព័ត៌មានថ្មីៗទាំងយប់យ៉ាងនេះហើយ ក៏បន្តលើកឡើងដូច្នេះទៀតថា៖« ខ្ញុំមិនដឹងថា សេចក្តីប្រកាសរបស់រដ្ឋសភា ទទួលស្គាល់តំណែងឯកឧត្តម កឹម សុខា ឲ្យជាប្រធានក្រុមមតិភាគតិចនៅរដ្ឋសភាផង ជាប្រធានក្រុមតំណាងរាស្ត្រគណបក្សសង្គ្រោះជាតិប្រចាំរដ្ឋសភាផង ខុសឬយ៉ាងណាទេ។ លោកទៅសួរខាងរដ្ឋសភាទៅ»។
លោក ឡេង ប៉េងឡុង អ្នកនាំពាក្យរដ្ឋសភា បានបកស្រាយប្រាប់សារព័ត៌មានថ្មីៗថា សេចក្តីប្រកាសទទួលស្គាល់តំណែងឯកឧត្តម កឹម សុខា របស់រដ្ឋសភា គឺមិនខុសនោះឡើយ។ លោកថា ឯកឧត្តម កឹម សុខា ត្រូវទទួលតំណែងពីរជំនួសឯកឧត្តម សម រង្ស៊ី។ លោក ប៉េងឡុង ដែលជាអគ្គលេខាធិការនៃរដ្ឋសភាផងនោះ ពន្យល់បែបនេះថា៖« ព្រោះឯកឧត្តម សម រង្ស៊ី គាត់ត្រូវបាត់បង់សមាជិកភាពជាតំណាងរាស្ត្រហើយ ដូច្នេះគាត់ មិនអាចធ្វើអ្វីបានទេ ជាពិសេសគឺមិនអាចចរចាជាមួយសម្តេច ហ៊ុន សែន។ ទើបថ្នាក់ដឹកនាំរដ្ឋសម្រេចផ្តល់តួនាទីដល់ឯកឧត្តម កឹម សុខា»។
យ៉ាងណានៅពេលដែលសួរថា តើការសម្រេចឲ្យឯកឧត្តម កឹម សុខា កាន់តំណែងជាប្រធានក្រុមមតិភាគតិចនៅរដ្ឋសភានេះ អាចខុសពីការស្នើសុំរបស់គណបក្សសង្គ្រោះជាតិ ដែលត្រឹមតែស្នើឲ្យឯកឧត្តម កឹម សុខា ធ្វើជាប្រធានក្រុមតំណាងរាស្ត្រគណបក្សសង្គ្រោះជាតិប្រចាំរដ្ឋសភានោះ? លោក ឡេង ប៉េងឡុង គ្រាន់តែឆ្លើយយ៉ាងខ្លីដូច្នេះថា៖ « ខ្ញុំអត់អាចបកស្រាយបានទេចំណុចនេះ។ នេះជាការសម្រេចរបស់ថ្នាក់ដឹកនាំរដ្ឋសភា»៕
Tag:
កឹម សុខា
សម រង្ស៊ី
រដ្ឋសភា
© រក្សាសិទ្ធិដោយ thmeythmey.com
