អន្តរជាតិ
ចិន មិនសូវប្រតិកម្មខ្លាំង ទោះអាមេរិក អះអាងថាបានត្រៀមខ្លួនដើម្បីតទល់ចិននៅសមុទ្រចិនខាងត្បូងក៏ដោយ អ្នកនាំពាក្យក្រសួងការបរទេសចិន
× មិនដូចពេលមុនៗឡើយ រដ្ឋាភិបាលក្រុងប៉េកាំង ហាក់ដូចជាមិនសូវបង្ហាញជំហររឹងទទឹងខ្លាំងដើម្បីតបតទៅនឹងការអះអាងជាថ្មីរបស់រដ្ឋាភិបាលក្រុងវ៉ាស៊ីនតោន ដែលបានលើកឡើងថា អាមេរិក បានត្រៀមខ្លួនរួចជាស្រេចសម្រាប់តទល់ជាមួយនឹងចិននៅសមុទ្រចិនខាងត្បូង ប្រសិនបើចិន បន្តសកម្មភាពតវាទទីខ្លាំងនៅតំបន់នោះ។
ឆ្លើយនឹងសំណួរថាតើចិន គិតបែបណាចំពោះការលើកឡើងរបស់មេបញ្ជាការកងទ័ពអាមេរិកប្រចាំប៉ាស៊ីហ្វិក ដែលនិយាយថា អាមេរិក បានត្រៀមខ្លួនរួចស្រេចដើម្បីប្រឈមនឹងចិននៅសមុទ្រចិនខាងត្បូង ប្រសិនបើចិន បន្តសកម្មភាពវាទទីនៅទីនោះ មន្ត្រីក្រសួងការបរទេសចិន បានអះអាងថា ស្ថានភាពនៅទីនោះ គ្មានអ្វីប្រែប្រួលឡើយ ពោលគឺ ស្ថានភាពសមុទ្រចិនខាងត្បូង កំពុងតែមានស្ថិរភាព និងការវិវត្តល្អ។
ខណៈអវត្តមានការប្រកាសជំហរផ្នែកយោធាតបវិញនោះ អ្នកនាំពាក្យក្រសួងការបរទេសចិន លោក Geng Shuang បានថ្លែងក្នុងឱកាសសង្ខេបព័ត៌មានប្រចាំថ្ងៃនាថ្ងៃទី១៤ ធ្នូយ៉ាងដូច្នេះថា៖«យើងសង្ឃឹមថា អាមេរិក អាចអនុវត្តតាមការសន្យារបស់ខ្លួនក្នុងការមិនចូលដៃជាមួយនឹងភាគីណាមួយនៅលើជម្លោះអធិបតេយ្យនៃសមុទ្រចិនខាងត្បូង គោរពការប្រឹងប្រែងរបស់ប្រទេសនៅក្នុងតំបន់ក្នុងការរក្សាសន្តិភាព និងស្ថិរភាពនៅក្នុងសមុទ្រចិនខាងត្បូងនោះ»។
សូមរម្លឹកបន្តិចថា នៅថ្ងៃទី១៤ ធ្នូ ម្សិលមិញ មេបញ្ជាកងទ័ពអាមេរិកប្រចាំតំបន់ប៉ាស៊ីហ្វិក លោក Harry Harris បានអះអាងថា អាមេរិក បានត្រៀមខ្លួនរួចស្រេចហើយក្នុងការប្រឈមជាមួយនឹងចិន ប្រសិន ចិន នៅបន្តសកម្មភាពវាទទីរបស់ខ្លួននៅក្នុងសមុទ្រចិនខាងត្បូង។ សេចក្តីថ្លែងការណ៍នេះ ត្រូវបានធ្វើឡើងក្នុងសុន្ទរកថារបស់លោកឧត្តមសេនីយ៍រូបនេះក្នុងដំណើរទស្សនកិច្ចទៅកាន់អូស្ត្រាលី។
លោកមេបញ្ជាការកងទ័ពអាមេរិកប្រចាំតំបន់ប៉ាស៊ីហ្វិក
នាឱកាសដដែលនោះ លោកឧត្តមសេនីយ ក៏បានសង្កត់ធ្ងន់យ៉ាងដូច្នេះថា៖«យើង នឹងមិនអនុញ្ញាឲ្យតំបន់រួមគ្នា(សមុទ្រចិនខាងត្បូង)ត្រូវបានបិទជាលក្ខណៈឯកតោភាគីបានឡើយ បើទោះបីជា មានមូលដ្ឋានជាច្រើន ត្រូវបានសាងសង់ឡើងនៅក្នុងតំបន់សិប្បនិម្មិតនៃសមុទ្រចិនខាងត្បូង។ យើង នឹងធ្វើកិច្ចសហប្រតិបត្តិការ នៅពេលយើងអាច ប៉ុន្តែយើង នឹងក៏នឹងត្រៀមខ្លួនដើម្បីប្រឈមផងដែរ នៅពេលចាំបាច់នោះ»។ នេះបើយោងតាមការការដកស្រង់សម្តីលោកឧត្តមសេនីយ៍រូបនេះដោយភ្នាក់ងារព័ត៌មាន Reuters។
បន្ថែមពីការប្តេជ្ញាចិត្តនេះ ប្រមុខការពារជាតិអាមេរិកប្រចាំតំបន់ប៉ាស៊ីហ្វិករូបនេះ ក៏បានបញ្ជាក់ដែរថា អាមេរិក ក៏នៅតែបន្តសកម្មភាពល្បាតនៅក្នុងសមុទ្រចិនខាងត្បូង ក្រោមច្បាប់អន្តរជាតិដដែលនោះ។
សូមជម្រាបផងដែរថា ជម្លោះសមុទ្រចិនខាងត្បូង គឺជាជម្លោះអធិបតេយ្យ ដែលមានរដ្ឋពាក់ព័ន្ធដូចជា ព្រុយណេ ម៉ាឡេស៊ី ហ្វីលីពីន វៀតណាម តៃវ៉ាន់ និងចិន។ ចិន បានទាមទារស្ទើរតែតំបន់ទាំងស្រុងនៃតំបន់ជម្លោះក្រោមអំណេះអំណាងប្រវត្តិសាស្ត្រ ខណៈរដ្ឋពាក់ព័ន្ធផ្សេងទៀត ទាមទារដោយភស្តុតាងផ្នែកច្បាប់នោះ។ ខណៈពេលដំណោះស្រាយនៃជម្លោះនេះ មិនសូវជាមានពន្លឺប៉ុន្មាននោះ មានរបាយការណ៍រូបភាពផ្កាយរណបជាច្រើន បានបង្ហាញថាចិន បន្តសកម្មភាពវាទទីជាច្រើនហិកតា និងទាំងសាងសង់កោះសិប្បនិម្មិត ដោយមានទាំងបំពាក់សព្វាវុធផងដែរនោះ។
បើទោះបីជាអាមេរិក មិនមានទឹកដីជាប់ជាមួយនឹងតំបន់វិវាទនោះក៏ដោយ អាមេរិក បានប្រលូកខ្លួនយ៉ាងជ្រៅលើបញ្ហានេះ ទាំងផ្នែកការទូត និងទាំងផ្នែកយោធា ដ្បិតបើបណ្តោយចិន ឲ្យធ្វើសកម្មភាពបែបនោះ សមុទ្រចិនខាងត្បូងដែលជាច្រកពាណិជ្ជកម្មមមាញឹកលំដាប់ទីពីររបស់ពិភពលោកនេះ នឹងត្រូវគ្រប់គ្រងដោយចិនហើយ។ ផ្នែកការទូតនោះគឺ អាមេរិក តែងតែចេញសេចក្តីថ្លែងការណ៍រិះគន់ចិន ក៏ដូចជាលើកបញ្ហាសមុទ្រចិនខាងត្បូងនៅក្នុងកិច្ចប្រជុំក្នុងតំបន់ ដែលមានវត្តមានចិននៅទីនោះផងដែរនោះ។
សម្រាប់ផ្នែកយោធា អាមេរិក កន្លងមក បានធ្វើសកម្មភាពទាំងតាមមធ្យោបាយនាវាល្បាត និងយន្តហោះស៊ើបការណ៍មកកាន់ជម្លោះដែលស្ថិតក្បែរតំបន់ដែលចិន បានសាងសង់នៅក្នុងតំបន់ជម្លោះ ក្រោមហេតុផលថា ដើម្បីអនុវត្តសិទ្ធិសេរីភាពនៃការធ្វើនាវាចរណ៍ និងសេរីភាពនៃការហោះហើរដែលផ្តល់ដោយច្បាប់អន្តរជាតិនោះ។ ជាងនេះទៅទៀតនោះ អាមេរិក ក៏បានសហការណ៍ជាមួយនឹងបណ្តាភាគីជម្លោះដែលរួមមានទាំងហ្វីលីពីន និងវៀតណាមក្នុងការពង្រឹងសមត្ថភាពការពារដែនសមុទ្រដើម្បីទប់ទល់ជាមួយនឹងចិនផងដែរ។ តែក្រោមរដ្ឋបាលថ្មីរបស់ហ្វីលីពីន អាមេរិក ហាក់ដូចជាមិនសូវមានសកម្មភាពយោធាប្រឆាំងចិនដូចមុនទៀត ដ្បិតរដ្ឋបាលថ្មីនេះ មាននិន្នាការខ្លាំងប្រឆាំងនឹងអាមេរិក៕
Tag:
ចិន
អាមេរិក
សមុទ្រចិនខាងត្បូង
© រក្សាសិទ្ធិដោយ thmeythmey.com